Piancit tezong ISIS galdo kipan ta, Bomb tang 20 khiatzo

France, Paris khuapi sungah mipi 129 aki kaplupsak lungkim hetlo uh ahih manin, Piancit (France) tezong ISIS te lehdo kikding kipanta uhhi. Sunday ni akipan ISIS te ii ukcip ahi Syria gamsung aom Raqqa khua mitsuan in Piancit galvanleng te’n kapziahziah ta cih Fox News pan kiza hi.

Piancit te galvanleng French Fighter te’n ISIS te galkap kaihkhopna, Training piakna leh aphualpi teng uh ah Bomb tang 20 khiatsukkhin uhhi cih French Defense Ministry inzong pulakna neikhin hi.

United Arab Emirates (UAE) gam leh Jordan kuamsung tengahzong U.S. Forces tawh kipawl in Piancit te’n nasiatak in galdo ding uh cihi.

Raqqa (Al-Raqqah zong kici) pen Syria gamsung aom khuapi khat hi a, ISIS te ii phualpih khuapi in azat uh khuakhat zong ahihi.

Amasa penpen aphu lakkik theihna pen Sunday ni in kipanthei pan a, galvanleng 12 tawh akuankhia uh cihi.

ISIS te’nzong Online Statement akhahkhiatna uh a Piancit khuapi Paris pen “the carrier of the banner of the Cross in Europe” cisese uhhi. ZD Sawltak