Malaysia, Penang ah Passport atuh abawlkhia Agent khat kiman

Malaysia, Penang ah Passport atuh abawlkhia Agent khat kiman

Malaysia, Penang State sungah Passport atuh “Fake Passport” abawlkhia kipawlna panin mi honkhat Immigration Department te’n mankhia uh cih NST pan kiza hi. Zannitak in, George Town, Jelutong sungah akiman hi a, akiman teng akigawm in mi 9 pha uhhi.

Immigration Department director-general Datuk Seri Mustafar Ali in agenkhiatna ah Passport atuh akibawlna aphualpi khatin aki ummawh Apartment sungpanin mi 9 kimankhia a, tualak ah naupanglai 2 zong kihel cihi.

Tua akimanteng hoihtak thu akisit ciangin tualakah Bangladesh gammi pasal khatpapen Fake Passport bawlna ah amakaipi ahihlam kimukhia cihi.

Hihpa pen Agent zong asemkawm hi a, Passport adeihpeuh sumngen in bawlsak mengmeng hi.

Hihte omna Apartment sungteng hoihtak aki pheklek ciangin Fake Passport bekbek akigawm in 94 zong kimukhia hi. Hih Passport tepen Bangladesh Passport tawh akibang in akibawlsa vive ahihi. Tuaban ah sumzong akigawm in RM15,000 ki mukhia hi.

Immigration thunei te genna ah hih Passport tepen nasepnei Boss “Employer” te tungah zuaksawnding in akibawlsak hiding ci uhhi. Banghanghiam cihleh Boss pawlkhat te’n anasemte buaina aomloh nadingin Passport atuhkhawng bawlsakziau uh a, tuahileh Malaysia kumpi tungah Tax zong akician in piakkullo ahih manin, sumbei tampi phatuam hi.

Immigration makaipipa Mustafar Ali in agenbehna ah hihbangdan Passport atuh kibawl cihpen akizak sawtkhin in, hih akimanteng hoihtak thusitna kinei totoding a, midangzong tampi kihelding in ki ummawh cihi.

Hihbang in Passport atuh bawlin asem Agent tepen Malaysia gamsung ah kum 20 valbang aomkhin ci a, Indonesia numei khattawh kiteengin Malaysia ah aki phualsah ahihi.

Hih Agent patawh akisawhkha te abanban in ki kankhiatoto dinga, aki helkha khempeuh ki mawkkoihlo, thukhun ombangin nasiatak in thu kibawlding hi ci’n genkhia hi.

Related: Kawlgam ah Travel Passport nam 9 in kibawlding ~ ZD

Myanmar gammi, adiakdiak in Kawlte phadiak Passport atuh atawi tampi om uhhi. Tua Passport atuhte pen etpakin ataktak tawh akibatsak mahmah uhhangin, hoihtak in ki velcianleh ataktak ahihlohlam kilang mahmah hi. Kuaman hihbangdan adiklo te ah ihki helkhak lohding thupi dinghi. Passport leh UN Card atuh, Fake Documents tawh hongki mankhaleh athu lianmahmah dinghi. Sawltak #zomidaily