Pawlpi maw Laisiangtho? (The Church or the Bible?) ~ Peter Suumpi

Pawlpi maw Laisiangtho? (The Church or the Bible?) ~ Peter Suumpi

Laisiangtho pen eite aading in akisam pen ahi hi. Pope kisam lo hi. Pawlpi kisam lo hi cih te ih zakngei tek ahi hi. Ahizong in Laisiangtho sung nangawn ah Laisiangtho bek athupi pen hi cih genna Theory na hilh lo hi. Laisiangtho sung ah kihel in a hong hilh thu in Pawlpi pen Laisiangtho sang in piang masa zaw hi cih ahi hi. Topa Jesu mahmah in zong Laisiangtho sung bang mun teng gelh ahi hiam? Gelh lo hi.

Topa Jesu in Laisiangtho gelh ding sang in ama min (Jesu Christu) tawh lungdamna thu hilh ding in Pawlpi khat bek na phut zaw hi.

Catholic pawlpi aading in Laisiangtho le Pawlpi anih in kisam hi. Tua Pawlpi le Laisiangtho te nih lak ah khat aom kei leh khat zong om zolo ding hi ci in um hi. Laisiangtho khat bek tawh kicing ci in asang mite aading in dotna tawmtawm hong om hi.

Khantna (1) Ciapteh ding in Laisiangtho pen Topa Jesu hong pai zawh AD 397 kum ciang dong tuni aa ih zat Laisiangtho bu bang in om nailo cih ahi hi. Laisiangtho pen Carthage Pawlpi khawmpi omma AD 397 ciang dong Laibu bu khat bang in kikaikhawm zo nailo hi. Tua hun lai in Yathih Siampi khat in Laisiangtho bu khat agelh ding pen kha 10 bang hun sawt hi.

Hih bang in Laisiangtho Laibu khat in hong piankhiat theih nading in Pawlpi in bangci kaih khop ahi hiam? Tua bang hun lai in Laisiangtho hong piankhiat nading in hih te Laisiangtho hi, hi te hilo hi cih khentat theihna thuneihna arrna pen Pawlpi sung bek ah om cih pen nial theih ding hilo hi. Hih bang in khentat theihna ding thuneihna arrna pen Laisiangtho sung ah om lo hi.

Nihna (2) Laikhetna hong pian zawh hun na ngawm in Laisiangthobu bu khat lei ding pen Christian te aading in haksa lai mahmah hi aa nidang lai laikhetna set omma AD 1500 ma lai ciangciang Christian khat in Laisiangtho bang ci neih theih ding ahi hiam?

Thumna (3) Matthew 18: 15 -17 na sung ah Topa Jesu in khentat theihna thuneihna arrna pen bang hang in Pawlpi tung ah kinga hi na cih ahi tam?

Matthew 18: 15 – 17 sung ah “ Na sanggam te uh na tung uhah hong khialh leh pai in no tegel bek theihin a khialhna va gen un. Na thu uh a hong man leh na sanggampa uh a ngahkik na hi uh hi. Ahizong in na thu uh hong man nop kei leh, Laisiangtho sung ah, minih ahihkei leh mi thum theihna bek tawh mawhsakna khat peuhpeuh man pan hi, acih mah bang in midang khat ahi aa, nih ahizong in tonpih un. Amah in tua mite thu amannop kei leh Pawlpi te tung ah a thu ko un. Pawlpi thu na ngawn a manno[p kei leh Gentail mite le siahdong te bangin na ngaihsun un.

“အကယ်၍ သင်၏ ညီအစ်ကိုသည် သင့်အား ပြစ်မှားကျူးလွန်လျှင် သူ့ဆီသို့ သွား၍ နှစ်ဦးချင်း သူ၏ ပြစ်မှားမှုကို ထောက်ပြ၍ ဆုံးမပါလော့။ သင်၏ ညီအစ်ကိုသည် သင့်ကို နားထောင်လျှင် သင်သည် သူ့ကို ပြန်လည် ရယူနိုင်ပေသည်။ သို့သော် သူသည် သင့်အား နားမထောင်လျှင် သင်နှင့်အတူ အခြားသူ တစ်ဦး၊ နှစ်ဦး ထက်ပိုသောသူများကို ဖိတ်ခေါ်လာလော့။ ဤသို့ဖြင့် ထိုသက်သေခံရှိသူတို့၏ နားချမှုနှင့် သင်တို့ ညီအစ်ကိုအကြား ကြေအေးရန် ပြောဆိုမှု စကားတိုင်းသည် ထိုသက်သေခံအဖြစ် ရှိနေသော နှစ်ဦး၊ သုံးဦးအကြားတွင် သက်သေတည်နေလိမ့်မည်။ အကယ်၍ သူသည် ၎င်းတို့ စကားကိုလည်း နားမထောင်ပါက သင်သည် အသင်းတော်ကို ပြောပါလော့၊ အကယ်၍ သူသည် အသင်းတော် စကားကို နာမခံလျှင် သူ့အား သာသနာပလူကဲ့သို့ လည်းကောင်း အခွန်ခံကဲ့သို့လည်းကောင်း ဆက်ဆံပါလော့။”

Lina (4) Christian te aading in abulpi penpen in “Laisiangtho” bek hi cih pen bang Laisiangtho mun ah kigelh hiam?

Ngana (5) Tuhun dan aa laithei mi atam nailoh hun lai ahi AD 1500 hun lai in laithei lo mi atamzaw te in Laisiangtho pen koi ci bang in sim thei ding uh ahiam?

Gukna (6) Hih laisiangtho ii zungpi le akip theihna ding khuampi te in bang ahihiam?

1 Tim 3 : 15 “Ahizong in ka hong zekai khak zenzen leh thuman thutak khuampi le bulpi, a nungta Pasian Pawlpi ahi Pasian innkuan sung ah bang ci gamtat ding cih na theih nading in hih ka hong laikhak in lam hong lak ding hi.”

Anungta Pasian innkuan pen Pawlpi ahi hi. Tua Pawlpi pen Laisiangtho ii khuampi le bulpi ahi hi.

Sagihna (7) Laisiangtho sung ah Topa Jesu in bang mun teng gelh hiam?

Giatna (8) Laisiangtho sung ah Topa Jesu in zungzuipi te kiang ah Laisiangtho na gelh un cih sawlna bang mun teng ah om hiam?

Kuana (9) Laisiangtho simm in adeihna na khiat pen man mah hi, manlo hi cih bang ci theih ding na hi hiam?

Sawmna (10) Laisiangtho bu sung ah bang teng kihel ding hi cih pen bang ci theih na hi hiam?

A tawpna ah akician mahmah dawnna khat tawh dawng ni cileng eite lam hong hilh pen Laisiangtho khat bek hilo hi cih kimu thei hi. Pawlpi pen ana piang masa zaw ahi hi.

Dotna – Topa Jesu in ama ii Pawlpi pen bang hun in na phut hiam?

Topa Jesu in ama ii Pawlpi pen anuai aa bangin na phut hi. Tua in Matthew gelh lungdamna Laisiangtho alian 16 aneu 18 na sung ah kimu thei hi.

“Ken hong gen in ah nang pen suangneu a cihnopna Peter na hi hi. Hih suangpi tung ah ka Pawlpi ka lam ding aa, sihna na ngawn in zozo ngei lo ding hi.

Tua bang ah Topa Jesu in Laisiangtho a bulhphut pawlpi na phuanglo zaw aa, lamlak ding in Pawlpi ana phuang zawkna pen adang laisiangtho mun te ah en dih ni.

Matthew 28: 19 sung ah Topa Jesu in “ Tua ahih ciang in note pai unla midang khempeuh, keima nungzui mi suaksak in, Pa min, Tapa min le Khasiangtho min tawh tui sung ah naphum un.”

Mark 16: 15 sung ah Topa Jesu in “Tua khit ciang in amau te tung ah, Leitung khempeuh ah note pai kawikawiunla, mi khempeuh tung ah Lungdamna Thu na hilh ta un.”

Mark 16: 20 ah “ Nungzui te zong mun khempeuh ah pai in thu a hilh uh hi. Topa in zong amau te nasep seppih a, a thu hilhna te uh manhi, ci in a lahna in amau te tung ah vangliahtna limte a pia hi.

Nungzuipi te in Laisiangtho thuciam thak na sim kha lo uh hi. Thucian thak zong a kigelh ding aa akithawi akipat hun zong ahi hi. Nungzui pi te in “akam uh tawh Pasian thu” hilh in lamlak kawm in ngeina tradition te tawh Pawlpi naphut uh hi cih thu pen anuai aa Laisiangtho mun te tawh kimu thei hi.

2 Thesalon 2: 15 sung ah “Tua ahih ciang in sanggam te aw, kam tawh ahi aa, lai tawh ahizong in ka hong hilh uh thuman te limtak in zui unla, kiptak in om un.”

2Timoti 2: 2 na sung ah “Mi tampi te theih in ka thuhilh, na zaksa thu khempeuh, midang te a hilhsawm thei ding in a citak mite tung ah hoihtak in a zuih ding un na hilh un.”

Dotna –Laisiangtho pen koi bang in hong piang ahi hiam?

Laisiangtho pen Catholic Pawlpi sung pan hong piang ahi hi. Thuciam thak pen AD 397 kum in Carthage khua aa Pawlpi khawmpi ah Pawlpi sung aa tulpi (Bishop) te le laithei te kikaikhawm in laibu te hong kaihkhop uh ahi hi. Laibu tuamtuam te hong kaikhawm in Laisianghtho in hong pian ma in mun dang tuamtuam te ah tua laibu te kithehthang in ana om ahi hi. Hih thu ih et ciang in tanglai Catholic Pawlpi in kum 300 val sung in Laisiangtho aom loh hang in ngeina (tradition) tawh Pasian thu na hilh uh hi.

Dotna: Kua in Laisiangtho sungah bang laibu te kihel ding cih khentat hiam?

Catholic Pawlpi in tua laibu neu te pen hoihtak sittel in Khasiangtho vangliatna tawh akigelh hi aa, koi te Laisiangtho in ciamteh ding cih hong khentat hi. . AD 1440 kum laikhetna set ahong pian ma in Catholic Yathih siampi te in tua Laisiangtho te pen akhut uh tawh na tei kik ngelhngelh uh hi in a nuntakna uh tua bang in Pasian aading kipia khia uh hi. Laikhetna set hong kibawl khit na ngawn in zong Laisiangtho bu khat pen tamman lua ahihman in innkim in neih zawh ding hong thu baih lo hi. Laikhetna set hong bawlkhia masa pa ahi John Gutenberg in AD 1456 kum in Catholic Pawlpi ii amasa penpen Laisiangtho bu hong khenkhia hi. AD 1534 kum ciang ciang ah Martin Luther letkhiat Laisiangtho om nailo hi.

Dotna : Laisiangtho bu sung ah Laisiangtho, khat bek in Christian te aading akisam pen leh abulpi pen hi cihna bang Laisiangtho mun ah kigelh hiam?

Kigelh lo hi. Christian khat aading in Laisiangtho bek pen lam man hong lak laibu le Christian te ii bulpi hi cihna mun khat zong omlo hi. Laisiangtho in agen in ah; Laisiangtho sung aa kigelh te ii khiatna mantak in khiat theih nadingin Pawlpi dot ding hi ci in na gelh hi. Tu in ahileh ei ii utdan dan in ih khiat pen akilawmlo le ahih huai het lo ahihna Laisiangtho mun te en dih ni.

2Peter 1: 20 sung ah “Na phawk ding uh a thupi mahmah khat in: Laisiangtho sung aa om thugen kholhna te, kua mah in ama pilna tawh ah khiatna gen thei lo hi.”

2Peter 3: 16 sung ah “Lai a hong gelhna sung ah a thugen te tu-ate mah agennuam ahi hi. A laigelhna sungah a telhak thu tampi om a, theihna kicing lo in lungsim kiplo mi pawlkhatte in Laisiangtho sung thu a utut un a kawihei uh bang in Paul thugente zong aman lopi in khia uh ahihman in siatna a tuaklawh uh hi.”

Sawltak 8: 30 na sung ah “ Filip zong ama kiang ah va tai a, kamsang Isaiah laibu a simna za ahihman in, Na laisim akhiatna na thei hiam? Ci in dong hi. Amah in mi khat peuh in hong hilh tellohpi in bang ci theih ding ka hi hiam? Ci in dawng aa, ama leeng tung ah Filip a tuang nading in a sam hi.”

Dotna: Tua dan ahihleh Laisiangtho te a hilhcian ding sia in kua ahi ding hiam?

Tua sia pen Catholic Pawlpi sung aa anungta Khasiangtho Pasian ahi hi. Laisiangtho pen akibang lo in khiatna akikhiatna hangin adang Christian pawlpi gawm tul 40 val hong piang ahi hi. Tua bang aa atam nianua kikhen tangna pen Khasiangtho Pasian hang hi peuhmah lo hi. Protestant pawl khat te in naungek tuisawp pen sang na pi in adang protestant te in sanglo uh hi. Protestant Christian te ii Christian upna tawh kisai in kipum khat in kip thei lo uh hi.

Ahihang in Catholic pawlpi ahileh upna kiciamna (the creed) le upna bulpi te aom mah bang in kipum khat in hong makaih ding tuucing alianbel siampi (Pope) kinei hi.

John 14: 26 sung ah Topa Jesu in “Ahizong in Pa in kei ma tang in a hong sawl ding Huhpa Khasiangtho a hong tun ciangin note tung ah thu khempeuh hong hilh ding a, note tung ah ka hong gensa thu khempeuh zong hong phawksak kik ding hi.”

John 16: 13 na sung ah “Tua ahihman in thuman hong lak ding Khasiangtho hong tunciang in thu khempeuh a man in hong hilh ding hi. Ama ngaihsuttawm thu hong gen ding hilo a, ama tung ah akigen thute le a hong tung ding thute a hong gen ding ahi hi.”

Sawltak 1: 8 na sung ah “ Ahizong in note tung ah Khasiangtho hongtun ciangin vangliatna tawh na kidim ding uh a, Jerusalem khuasung, Judea gam sung, Samaria gam sung le leimong dong in note in keima thu na gen ding uh hi, ci in adawng hi.

Nidang lai in Pawlpi in athupi upna tawh kisai dotna te adawng ding akisap ciang in Khasiangtho Pasian ii lam-lahna tawh Pawlpi khawmpi na bawl in kikum khawm in na dawng uh hi.

Sawltak 15: 1-2 na sungah “Judea gam in Antiok khua ah mi pawlkhat hong pai uh aa, innkuan khat bang in a om thu um mite kiangah, Moses thukham sungah akigen bangin na vum uh na at kei uhleh hotkhiatna na ngah kei ding uh hi, ci in thu hilh ding hong kipan uh hi. Hih thu huhau un Paul le Barnabas, le hih mite kikal ah nakpi takin thu kinialna om in thu kisel uh ahihman in Paul le Barnabas le Antoik khua aa om pawlkhat te Jerusalem khua ah vapai in hih thu tawh kisai in tua lai aa om sawltak te le up ate tawh kimuh nading un a vaihawm uh hi.” (Hih Laisiangtho mun sungah Pawlpi khawmpi in hih bang in kitelkhialhna te aom ciang in Laisiangtho na zang lo in kikupna tawh thu ana khentatna kimu thei hi.)

Sawltak 16: 4-5 na sung ah “Thu hilh in a paina uh khua khempeuh thu um mite kiang ah Jerusalem khua aa om sawltak te le upate in zuih dingin a khensat uh ngeina te gen kawikawi uh a, tua ngeinate a zuih nadingun a hanthawn uh hi. Tua ahihman in Pawlpi mite a upna uh ah kip semsem in a nini in mi akibehlaplap hi.”

Thukhupna in ah

Laisiangtho pen Catholic Christian te in athupi simlo hilo hi. Laisiangtho pen Catholic Christian upna ding in thupi mahmah hi. Catholic Christian te ii biakinn sung aa missa te zong Laisiangtho mun kammal vive tawh akigelh ahi hi. Catholic te aading in Laisiangtho pen Catholic pawlpi ii hilhna te tawh akibang in thupi in sang uh hi.

Catholic pawlpi aading in Laisiangtho le Pawlpi anih in kisam den hi. Tua Pawlpi omkei leh Laisiangtho bek anuntak theih loh bangin Laisiangtho om kei leh tua Pawlpi zong nungta thei lo ding hi ci in Catholic pawlpi in um hi. Lailet: Peter Suumpi (Dec 14, 2017) Source: ကက်သလစ်လူငယ်များစုစည်းရာ Facebook group #LST pen Android mobile app Tedim Laisiangtho