2017 kumsung Password lakah amuanhuailo penpen “123456” hikik leuleu

2017 kumsung Password lakah amuanhuailo penpen “123456” hikik leuleu

SplashData kici Security Company khatin 2017 kumsung in akizang, Leaked Passwords 5 Million val lakah amuanhuailo penpen kankhia uhhi. Leitung ah amuanhuailo penpen “world most-hacked password” pen hoihtak akankhiat uhciangin “123456” cih Password mah hikik leuleu cih mukhia uhhi.

Amuanhuailo penpen te lakah “123456” khatciangin azomah “password” cih hisawnsawn hi.

Hih atunga Password namnih tepen 2011 kumkhitzawh akipan amuanhuai hetlo penpen Password in aki ciamtehden, mitampitak in azatden uh ahihi. Tua Password namnih tepen Hacker te’nzong kankhiatbaih samahmah, upmawhzon tawh theikhiabaih mahmah uhhi.

Tua ahih manin, Internet azang khempeuh in Password akisapna, akizatna munte ah Password koih akul ciangin letter, number, symbol cihte helkhopding thupi mahmah a, tuahileh midangte’n na Password uh hong guksakding pen hamsa saktuam hi.

Letter, number, symbol cihteng helkhawmding cihciangin Peng77lam# cihbangdan ahihi. Tuabang in helkhawm lecin, Hacker te’n na Password pen kankhiatding hamsa satuam mahmah uhhi.

Tuaban ah Password khatbekbek muntuamtuam ah zatkawikawi hoihlo, muanhuailo hi. Gentehna: Facebook ah nazat Password leh Gmail ah nazat Password te kibatsak khaklohding thupi hi. Bnaghanghiam cihleh akibat ciangin khat ii Password akitheihleh adang khat ii Password zong akitheisa suakpahthei hi.

Tuabek thamlo, Password pen kha 3, kha 4 halta bangin khelzelzelding thupi hi. Mangkang te’n “Treat Your Password Like a Toothbrush” ci uhhi. Na Password pen hanawtna bangdan in laihzelzel un ci uhhi. Amaupen hanawtna azat uhciangin kha 1, kha 2 cihbangin khekzelzel uhhi.

Ahi zongin Zomi atamzaw in hanawtna kikhek mengmenglo ahih manin, Password zong khekmengmengding ki ngaihsunkhalo pahhi.

2017 kumsungin Hacker te’n kankhiat baihasak phadiak Password 20 te AFP Relaxnews te’n hih anuai abang in suaksak uhhi.

Top 20 most-hacked passwords of 2017:

• 1. 123456
• 2. password
• 3. 12345678
• 4. qwerty
• 5. 12345
• 6. 123456789
• 7. letmein
• 8. 1234567
• 9. football
• 10. iloveyou
• 11. admin
• 12. welcome
• 13. monkey
• 14. login
• 15. abc123
• 16. starwars
• 17. 123123
• 18. dragon
• 19. passw0rd
• 20. master

Nangzong na Faceboo, Gmail, Instagram, etc… cihte ah nazat Password pen amuanhuai mahhiam, hanawtna bangdanin nalaih zelzelhiam cih naki sitpha in. Hanawtna zong nalaih zelzel in 🙂 Sawltak #zomidaily