“Pasian’ Sound Box” vai genta ni e maw!

“Pasian’ Sound Box” vai genta ni e maw!

Hih thu hong piankhiatna pen Elisha asih khit kum khat khit teh ama’ guh leh misi khat aki sukkhak ciang a tua misi pen hingkik lian cih thu ka lung ngaihna pan in “Pasian’ Sound Box” cih thulu hong suak ahi hi. A LST mun sim masa photphot ni mataw:

Kumpite Nihna 13:20-21

20 Tua ciangin Elisha si a, amaute in amah a vui uh hi. Tu-in Moab mihonte in sik-hiau sungin tua gam simzel uh hi.

21 Tua ciangin amaute in misi khat a vui laitakun, amaute a sim dingin a hong pai mihon khat mu uh a, amau zong a misi uh Elisha’ han sungah lawn uh hi. A misi in Elisha’ guhte a sukkhak phetin hingkik a, tua ciangin ama khe-in a ding hi.

Zolai sung ah akigen loh hang kawllai leh mikang laite en leng Elisha sih khit akumkik ciang a thupiang hi.

Sound Box

Sound Box ih cih pen akiza zolote zaktheihna ding a kibawl hi. Elisha zong Pasian in a sound box in na zang a akhansung in ama’ tungtawn in na lamdang tampi piang hi. Asih khit ciang nangawn in Pasian in Elisha i guhte nangawn sound box a azatsak ahi hi.

Elisha sihma deuh in Israel kumpipa Joash tung ah Pasian in a sound box ahi Elisha i kam tawh Syria te 3 vei zo ding cih agensa hi. Elisha sih khit teh Galte’n asim taktak ciang in Israel te’n tua Pasian’ gensate phawk nawnlo in lau in tai uh hi. A misi nangawn uh zong gina in vuilo in Elisha i hansung a lawnsuk ziau uh hi. Ahih hang tua hansung ah Pasian’ Sound Box na om khinkhian ahih man in tua sound box tungtawn in Pasian in a hopih kik ahi hi. Agalte uh 3 vei zo takpi uh hi.

Pasian’ Sound Box Tuamtuam

1. La Sound Box

Moab kumpipa Balak in Israel te asamsiat ding in Balaam cial hi. Balaam in tua Kumpipa’ kiang zuan in apai laitak in atuanna La pen Pasian’ Sound Box nahi mawk ahih man in a la hong pau hiau hi. (Gamlak Vakna 22)

2. Ciang Khut Sound Box

Moses in tuute asatna ding ciangkhut hoih mahmah khat sui hi. Asuih kawmkawm in tuutal thumang hetlo pen bang amitkha ah om phial khading hi. “Na kidawm o lawm hih tawh kimu ding hi cei” bang cikha phial ding hi. Aizong tuu satna ding a abawl ciangkhut pen Pasian’ Sound Box hong suah teh tua ciang khut aliiktoh ziau pen San Tuipi nangawn lau in taii keek mawk hi. Pasian’ Sound Box pawlkhat pen agin seloh hang San Tuipi nangawn in lau in taii hi.

Aron’ ciangkhut zong Pasian’ Sound Box hong suah teh zan khat thu in nguum in, sel in, gah in. almond gah zankhat thu in na min mawk hi (Gamlak vakna 17).

Nang zong Pasian’ sound box asuak thei gige na hi hi. Ciangkhut ih cih pen ahawng ki khok in akeu khit teh ciangkhut asuak pan ahi hi. Asel theihna ding lampi omlo hi. Aizong Pasian’ sound box asuah teh zan khat thu in sel thei mawk hi. Sel bek lo in gah pah hi. Gah bek hilo in min pah hilai hi. Pasian’ sound box nasuah nak leh na sel theihlohnate hong sel ding hi. Gah a na up nawnlohte hong gah ding hi. Pung in na up nawnlohte hong pung ding hi. Hallelujah !

Topa’ lawnna ngah ngiat inla. Pasian in na nuntakna a Sound Box in hong zatsak ngiat ta hen. Amen !

Gennop tampi tawh

Nong it

(Mung Laan Thang)
Zangkong