Pasian mai leh mite mai ah “Na mawhnuam un” ~ Suum Do Thang

Pasian mai leh mite mai ah “Na mawhnuam un” ~ Suum Do Thang

“ZAMPI KHUA PASIAN KHUA VAK IN TAAN ” cih thulu tawh lai tawmkhat 2012 November kha ni 15 ni in kong at a, lai asimkha Pu Pau Kap Thang in Pasian mai leh mite mai ah, “Na mawh nuam un” na cih pen bang cidan cih tel meel keiveng aw” ci-in hong dong kik ahih man in lai tawm kong at kik hi.

Luangel khua pan Pu Kai Suan in Mizo gam panin ih khuavak ahi Pasian thu leh Mizo lai, Mizo Christian la te na sin in Zampi khua ah Pu Thang Khan na hilh a, Pu Thang Khan in khuasung a om nungak tangval te nahilh sawn in Tapidaw, (Baptist Church ) hong phuan khia uh hi. Pu Thang Khan in pen Eden huan pan mi khempeuh mawhnei ihsuah lam natel hi.

Topa Jesuh pen ei mawhnei mite gumkhia ding a, Pasian tapa hih napan mihing bang a hong suahna thuzong na tel hi. Topa Jesuh in leitung ah hamsat gentheihna, zawn na, kisat nim in a pumpi khempeuh liamna, singlamteh tungah a khut, akhe te siktukkilh tawh kilh a, ling lukhu khu sak in, apang teipi tawh a kidawt man a, sisan tampi aluan na te thei in, asih khit teh kivui in, sihna in lenzo lo a, ni thum khit teh hong thawhkik nate na um hi.

Topa Jesuh in ih zawnna, ih natna leh in mawh na pan hong gumkhia zo hi cih na tel hi. Kei mi mawh ka hi hi, a ci thei mi, Topa Jesuh Honpa leh Gumpa a asang mi khempeuh in gupna ngah hi. Ken mawh na nei keng a cite peuh mah bel Jesuh tawh a ki sai kha lo ahi hi cih na tel mah mah hi.

Lai Siangtho sungah mawhnei ihhih lam mun tampi ah nagen a, kei mawhnei hi keng ih kicih nawnloh na dingin, Lai Siangtho mun pawlkhat kong at khia a, Kha Siangtho in mi lungsim lawng a, gupngah mi hong behlap na dingin thu kangen hi.

1. A khialsa mah in kei ka suak khia a,ka nu in hong paai cil a ki pan a mawhsa ka hi hi. (Late 51:5)

2. Mihai mi in alungsim sungah,”Pasian omlo hi”ci-in ngaihsun hi. A mau te sia uh a, kihuai gamtat-in ahoih-a a gamta kuamah om lo hi. A pil gamtat, Pasian a zong a om hiam cih atheih na ding in, Topa in vantung pan in mihing te hong ensuk hi. A mau te a vekpi un puk khin uh hi. A kibang in kisia kim uh a, a hoih gamtat khat beek om lo hi. (Late 14 : 1- 3)

3. Lai Saingtho sungah zong, “Pasian’ muh na-ah mi man kuamah omlo a, a man athei kuamah omlo a, Pasian tawh ki pawl ding a hanciam kuamah om lo hi. Kuamah in Pasian ngaihsut na neilo uh a,na-a kimang kuamah omlo a,a hoih-a gamta kua mah om lo hi. A kam uh tawh mi that uh a,a kam uh tawh zuauthu gen uh a,a kampau te uh gulgu tawh ki bang hi (Rom 3:10-13)

4. Mi khat hang in leitungah mawhna hong om a, tua mawhna hangin sih na hong piang hi. (Rom 5: 12)

5. Mi khempeuh mawh ciat uh a, a hong hon khia Pasian tawh ki gam la hi. (Rom 3: 23)

6. A hoih a manin gamtat ding thei napi in a gamta lo te a khial a hihi. (Jeim 4 : 17)

7. Mi khat peuh in thukham dang khat peuh a zuih hang in khat a khialh nak leh avekpi in a khial mah ahi hi. (Jeim 2 : 10)

8. A man in a gamta,a khial ngei hetlo leitung ah mi khat zong om het lo hi. (Thna 7 : 20)

9. A Khristian mipih amudah mi peuhmah mithat hi a,mithat te in nuntak tawntung na a neihlohna thu nathei uh hi. (1Joh 3 : 15)

Ei leitung mite mawhnei ih hih pen Pasian hehlo in a theihsa ahihi.Mawhnei ih hih lam ih ki telloh, mawhnei ih hih noploh pen Pasian heh hi. Ni sim in ih bawl Kha lam, taksa lam tawh ki sai mawhna te enpak dih ni.

Ki phatsak na,hazat na,up loh na, midang te mawh na muh den na,piak nop loh na cil luat na, thu tam nget lo, ngaihsut na hoih lo neih na, Pasian tung ah kiap zawh loh na, Pasian muan lah na, Pasian tung leh mite tung ah cihtak loh na (Thu man loh na), Midang te guallelh na ah lung dam na, nu leh pa mawh na, mit hah dan kep loh na, mi dang tawh a ki lawm lo ki lawmtat na, zuau gen na,mi gen siat na, hamsiat na leh kam ki huai zat na,guktak na leh guk tat na, zu kham na leh kham theih zat na,ngimna hoih lo tawh sepna genna,a ki lawm lo ki zepna, migi lo te lawm a neih na leh pai loh na ding mun ah pai na te ahi hi.’

Tua ahih man in Pu Thang Khan in Kha mit tawh en in mu ahih man in Pasian mai leh mite mai ah ” Na mawh nuam un /Na mawh na uh kisik kik un la na pu lak un ” ci-a Kha Siangtho lam lah na tawh ana gen khia hi ding in ka um hi.Pasian mai ah mawhnei hing ih ki cih ngamna in Pasian tawh hong ki pawl sak a,mite mai ah kei mawh zaw ing ih cih ngam leh mi te tawh ih ki lem theih hi. (Pau 3 : 3-4 sim in) Suum Do Thang (Agape Revival Ministry) – Zomi Daily