Pasian I Kisam Hi (We Need God) ~ Hau Za Cin

Pasian I Kisam Hi (We Need God) ~ Hau Za Cin

A minsia a ‘Pasian’ cih gamgam pen upna pawlkhatte in deihlo, a deihlo hilo zaw in hong bawl Pasian pen nak zahtakhuai lua mahmah, vanglian lua mahmah ahih manin a minsia in lawh ngam ding bang hilo hi a cih pen uh ka theihcil in lamdang kasa a, ahi zongin Pasian vangliatna leh a thupina i theih semsem ciang i Pasian pen nak zahtakhuai lua mahmah ahih lam i phawk semsem a, Amah i kisam hi. Tua ahih manin tua bang ngaihsutna leh upna a om thei lua ding himah ka ci hi. Bek thamloh Ama thu gennop ciangin zong a Amah direct in gen ngamlo in vantunga ‘pa’ (heavenly father) ciin Ama ukna gam pen vantunggam (Kingdom of heaven) ciin kiciamteh hi. Tua pen Judah mite in zong piangsakpa zahtakna a lahna uh ahi hi.

Kumthak i tun simin, hun thak, vaithak i pat ding simin Pasian i kisam hi. Bangci kalsuan ding, bangci mabun ding, bangci sep ding, bangci tangtun ding cih khempeuh ah mihing lam pan i sep theih khempeuh i sep banah hong makaih ding hong tonpih ding a kip a kho khut in hong let kei leh mihing tha lel tawh kipuk thei hi, ki tangtunlo thei hi. Tua manin a kimu theilo hong ompih tawntung Kha Siangtho ompihna leh makaihna i kisam tawntung hi. Vaithak pat ding ciangin ngaihsut siamna leh gelsiamna kisam a, tua gelna khempeuh a tangtunna dingin kalsuan dan a dik a hoih a lamzang kisam hi. Tua khempeuh mihing pilna in a batloh ciang tunglam pan hong makaih ding i pa Pasian i kisam hi.

Singapore Bible College ah sangsia a sem Rev. Christopher Chia in, “Lai Siangtho tamvei ka sim semsem, Jesu thu ka tam theih semsem ciang i Topa Jesu a lungdamsak penpen thu in A pa Pasian tawh a kikholhna, a kipawlna, a kizopna ahi hi,” ci hi. “Leitungah a vak sung khempeuh A pa tawh kinai tak in om tawntung hi. A pa tawh kigamla cih om ngeilo hi. A nuntak sung khempeuh thungetna tawh kidim a, A pa kiangah thungetna vive tawh kalsuan hi.

Nungzui 12 a tel pan kipan Gethsemane ah a kitaisan laitak zong, singlamteh tungah nang leh kei mawhna hanga a kikhai laitak in zong a laitah laitak dongin thungetna tawh A pa kizoppih hi. Tua ahih man in A pa in Amah tawh a omkhawm tawntung ding leh Ama nungah zong a mite a ompih dingin Kha Siangtho hong sawl suk hi.

Tua ahih manin nang leh kei zong tuni pan mailam ah i biak Pasian, hong bawlpa i kisam hi. Vaithak na neih leh Amah sam in, Amah dong in. Na khualzinna lampi ah na bah leh Amah samin Emaus lam zuan mite a ompih bangin eite hong huh dingin a nai om gige pa ahi hi. Haksatna gimna na tuah leh Amah sam in a khuangai, a lunglengte ahehnempa hi. Mawhna khempeuh a maisak a nuntakna thak tawh bul hong kipansak kik thei Amah bek hi, zuan in, sam in, na nuntakna ah zawn in, na lungsim kongkhak hon peuh lecin hong sungtum in hong teeng in nuntakna thak hong pia ding hi.

Kumpi inn sung nangawn pan a khangkhia Moses in zong Pasian na kisam a, mawhna a bawl Kumpi David nangawn in zong Amah na kisam hi. ‘Pasian lawm’ cih za a kipia liang Abraham nangawn in a tapa biakpiakna dingin a piak ding taktak ciang a lawm bek ahih loh lam leh a Pasian, a To zong ahihna phawk in a lungsim ah lawm bang hilo PA bangin Amah a lunggulh hi.

Mipil pen Solomon in Amah kisam a, kumpi lianpen David nangawn in Amah kisam ahih leh nang leh kei in bangzahtakin Pasian i kisam tam! Ama kamsang Ama mi zat Elisha leh Elijah te nangawn in zong Ama vangliatna a lahna ding un vantunga pa mah a sap uh a kisap leh eite in bangzahta in vantunga i pa i sap kisam ding ahi hiam. Tapa Jesu pian ding a thei zah donga pilna nei mipilte in Amah va bia uh ahih leh ei sa lah salo, vot lah votlo, huihnun na lamlam ah a kivei dongdongte in bangzahta in Amah kisam ding i hi hiam?

Tua ahih manin i vai khempeuh Amah ap in, Amah suan leng Amah in hong sem ding hi. Pasian i itna ah a kikal a nawngkaisak bangmah omkei ta hen. Pasian tawh i kizopna, Pasian i itna ah bangmah in hong dal keita hen. Pasian i kisam hi.

Na hau a na pil a na cithei tateu zongin Pasian na kisam hi. Pasian phawklo in nuntakna om thei kha mah ding hi, ahi zongin lungnopna kim, lungnopna kicing om theilo hi. Eite in Pasian i kisam hi. I minam sung i et ciang Pasian i kisam hi. I minam in i tuak laitak thute i ngaihsut ciang Pasian i kisam hi. I minam mailam ding i ngaihsut ciang Pasian i kisam sem hi. I pau, i lai, i ngeina kepcinga khantoh sak sawm a, puah a, mite theih dinga i mualsuah nop leh Pasian i kisam hi. Ka innsung vai, ka nasep vai, ka pawlpi vai hoih lel, tu laitak Pasian kisam keng na ci kha mai ding hi. Limtak ngaihsun phapha in, ngaihsun kikkik leng Pasian i kisam hi. Mihing eima khom in i lungkim laitak, hi i kisak laitak Pasian i kisap penpen laitak ahi hi.

Topa aw, kong kisam uh hi. Nangmah bek in ka minam uh nong gumzo ding hi. Tua dingin Pasian a kong neih khak man un ka lung uh dam hi. Nangmah in hong ompih in. Hau Za Cin (Phuitong Liim)