Parish ihcih in banghiam?
Pawlpi Code of Canon Law sunga honghilh na ah, Parish ih cih in Christian thu ummi pawlkhat kigawm in, tucing (pastor ahih kei leh parish priest) khat ii khutsung ah aki ap, diocese akici Siadaw ukgam acing akem Siadawpi pa ii ukna nuai a, a om pawlpi khenno khat ahihi. Can. 515 §1. A parish is a certain community of the Christian faithful stably constituted in a particular church, whose pastoral care is entrusted to a pastor (parochus) as its proper pastor (pastor) under the authority of the diocesan bishop.Tua banah Parish khat ihcih pen, thuzui mite utthu, deihthu a akipia leh, aki phuankhia, akihongkhia hilo in, phuatkhiat theihna thuneihna anei ahi diocesan bishop akici Siadawukgam acing akem Siadawpi pa bek in, phuankhia thei, phiatkik thei bek hi. Ahi zongin tuabang a anasep na ah, amah (diocesan bishop) in presbyteral council aki ci, tua diocese sunga om Siampi te kipawlna ii amuhna, angaihsutna leh adeihna te hoihtak ngaimasa dinghi. Can 515§2. It is only for the diocesan bishop to erect, suppress, or alter parishes. He is neither to erect, suppress, nor alter notably parishes, unless he has heard the presbyteral council.
Hih atunga thu te in, Parish ihcih banghiam cih Canon Law sunga honghilhna ih etna hi in, ihbul phuh in, hi Canon Law khiatna agennuam ihi kei a, hi bulphuh in Parish ihcih bangci telding ihhiam cih a ennuam ihi zaw hi. Parish ihcih in, thu ummi te pawlkhat kigawm in, amau te pen Siampi khat ii khutsungah ki ap hi, ci hi. Banghangin, Siampi khutsungah ki ap sese hiam? (Canon Law agen ihih lohna thu iki phawksak kikkik nuam hi). Banghanghiam cih leh khatbek ahi (one), asiangtho (holy), mikhempeuhtawh akisai gupkhiatna bucing (catholic[1]) ahi, Nungzuipi te tungpan kitatsatna omlo in (apostolic) hongki zomsuk Christu Topa hongpiak nuntakna thu pen, Parish akici thu ummi te pawlkhat kigawmna ah apicingtak in a om theihnang ahihi. Lamkhat panin genleng, Parish ih cih in, gupkhiatna bucing nuntakpihna mun cihna ahihi. Tua gupkhiatna bucing thuzui mite in nisim in anuntak pihtheihna dingun, tua gupkhiatna thupha te apiasawnding, ahawmsawn ding, agen khia ding, alakkhia ding Siampi khutsung ah aki ap ahihi.
Hih thuhangin, Parish ihcih in thuzui mite pumkhat leh pawlkhat suahna akilahkhiatna mun hi in, Pawlpi cih akhiatna ihmuh theihpen nazong ahihi. Parish pen kipawlna mawkmawk (associations) hi lo hi. Ei thangah zui a phuattawm theih ahi kipawl nate (charism zui a kipawlna ahi, khangno kipawlna, nupi kipawlna, thungen pawl kipawl na cih kipawlna tuamtuam te in Parish ii khiatna mialsak leh sel theilo dinghi.) leh Parish kibang thei lo hi. Parish ihcih in, tua Parish huam sunga om mikhempeuh tetawh kisai in, amau te akem siampi pa tawh pumkhat asuakna uhhangin, Pawlpi akici, khatbek ahi, Topa phuatsa Pawlpi tawh pumkhat, cikhat, sakhat, guikhat, khuakhat in kizom in kihual na mun ahihi.
Hih thuhangin, parishioners aki ci, parish sunga om thuzui mi te in, Parish pan bangngah ding cih lamet natawh 
angak te hilo in, parish bangci picing sakding, Pasian mai le mite mai ah, hih parish in bangci bangin, khatbek ahi, asiangtho, mikhempeuhtawh akisai gupkhiatna bucing ahi, Nungzuipi te tungpan hongki zomsuk Pawlpi ii Pasian nasepna bangci in kilangsak theiding ihhiam ci in, khut khat khai, khe khat khai a, mapankhawmna, nasepkhawmna, mun ahihi. Hibanga mapanga nasepna ah eimau mun, eimau vaipuak ciat (according to one’s role) ah maliam na omlo a, ma panciat ding ahihi.
[1] Catholic cih pen universal cihna hiziau lo hi. Catholic cih pen mikhempeuhtawh akisai gupkhiatna bucing (Catholic or Catholicity means the fullness of saving truth present and open everywhere) cih na ahihi. Catholic pen mikang pau hilo in, universal tawh akhiatna kibang thei ngeilo hi. Ahi zongin, Catholic cih kammal khiatna sungah, universal cih kihel hibek hi. Tuhun ciangin, Catholic pen universal tawh akhiatna akibanglian dan in atelkhial mitampi om thei hi (Theologically, the meaning of ‘Catholic’ is much deeper and broader than that of ‘universal’. There cannot be an identification of meaning between the two words. The term ‘Catholic’ has a meaning of ‘universal’, but is not identical.).
Rev Fr Damian Dal
(Nimdildial)
Comment piaknop aomleh...