Paris khuapi buaina hangin mi 35 sikhin, 100 val kepcip thuak

Update:

Paris Concert Hall sungah migilo te’n akepcip uh Hostages lakpan mi 100 val zong ki kaplum cih tumah in kizakbeh leuleu hi. Adang Paris City sungahzong aki kaplum mi 40 val bang om ci ahih manin, tuciangciang asi pen mi 140 bang hita mawk hi.

Paris khuapi buaina hangin mi 35 sikhin, 100 val kepcip thuak

Piancit (France) gam ii khuapi ahi Paris khuasung teng ah Friday nitaklam in migilo te’n thau tawh simgawp uh ahih manin buaimahmah cih Fox News pan kiza hi. Paris khuasung munthum peuhmah ah kikapna leh Bomb puahtapna om a, khuasung teng buaigawp ahih manin France President Francois Hollande in gamgi khempeuh khakcip sakphot cihi.

Hih Paris khuasung buaina hangin tuciangciang thau tawh aki kaplum misi 35 valkhin ci a, tuaban ah adang mi 100 valzong migilo te’n kemciplai uhhi. Hih buaina sungah ama pumpi panin Bomb apuak khamsak Suicide Bomber zong mi nih kihelding in ki ummawh hi. Bomb khatpen French leh German National Team te kimawllaitak Stade de France Soccer Stadium ah apuakkham ahihi. Hih French leh German te kimawl laitak President Francois Hollande zong a en in aom hi a, ahi zongin amahpen bangmah kikap khakna omsamlo hihtuak hi.

Tuaban ah Paris khuasung aom Restaurant khat ahzong thautawi migilo te’n mi phialkapgawp uh a, leilak ah misi kigual phengphang ci’n tualai ah akihelkha khatin genkhia hi.

Hih buaina pen kuakhutma cih ki genkhia lianlo a, ahi zongin Petit Cambodge aom Cambodian Restaurant sung akapgawp thautawipa in mi akapkawmkawm in “Hihpen Syria ading hi” ci’n awng kawm kici hi.

France President Francois Hollande in Piancit gambup “State of Emergency” ci’n tangko khiasak pah a, Piancit gamgi khempeuh akhakcip sakban ah buaina vengnailo khathei dinghi cihzong genkhia hi.

Misi pen ki behlap khathei laiding a, Concert Hall pan matcip athuaklai mi 100 val te thuzong ki telcian nailo cih Associated Press te’nzong genkhia hi. ZD Sawltak