Palm Sunday lungngaih ~ Rev. Zam Khat Kham

Palm Sunday lungngaih ~ Rev. Zam Khat Kham

“Topa’n deih hi” (Gk. Ho Kyrios chreian auton) a cih uh ciangin a neite in zong dong suk dong to nawn lo-in pia pah ziau uh hi. Kawm ziau uh hi. Topa’ deih hi ve’n. Hih lai ah lano hi, i Topa in a kawm.

Tua ma-in gunkuang zong kawm ngei hi. Tua ma-in naupangno khat’ sun-an. Gunkuang bel mipi’ tunga a thuhilh nading hi a, sun-an bel nalamdang a bawl nading ahi hi. A sawt lo, kal khat khawng ciangin mi’ han khat kawm leuleu ding hi. Mihing tapa in a lu ngak nading ama’ leitang cih theih ding nangawn a nei lo hi takpi!

Na khempeuh a Piangsakpa in neih bangmah nei lo hi. Kumpi kici buanga sakol khat zong nei lo hi. Mi’ lano peuh kawm lel hi. A kawm man nagawn a mawkna hih tuak sawnsawn lai. “Gualzawhna” tawh lapi’ ta lano tungah tuanga Jerusalem khuapi sunga hong lut Kumpipa tua bang ahi hi. A gol mahmah leh a kumpivai mahmah Arabian sakol tungah tuang lo-in a kawm tawm lano tungah tuang bek hi. A ganhing neu-in a tun sang lo ahih manin a khete a pang ah kai nguahnguah lelmawk hi.

Kumpi vai het lo hi. Cartoon kisuai cih lah hi lo! Ahi zongin amah tua bang maha hong pai ahi hi. Kiniamkhiatna masuan hi. Ama’n vang neihna cihte awlmawh lo hi. Mite in bangci muh ding cih khawng zong awlmawh se lo hi.

Jerusalem khuapi sung a lutna ah zong a lampi nuam pen tawn lo-in nitumna lam zuanin mual dung tawnin pai hi. Mi pawlkhat in lam dung ah na ngak keiisam uh. Tuate’ lakah pawlkhat in a puan uh suah khia-in tua lano’ mai ah phah uh hi. Khat khit khat, khat khit khat. A thahat zawdeuhte in singhiang kuaitanin a mai ah phah uh hi.

Lano in a tunga tuang Zeisu giksa tham leh kilawm hi. A tunga tuang pen zong lungsim vangikpi mah tawh a tuang ahi hi. Jerusalem nai semsem, a van gik semsem. Jerusalem khua tawh kinai semsem, Jerusalem tawh kigamla semsem leh kilawm!

Mite in kumpi bangin na dawn uh hi. Amah kumpi-a a kibawl sawm ciangin nial den hi. Mi tul nga a vak lai-in kumpi-in bawl sawm uh hi. Mual pang khat ah kihemkhia ziau hi. A innkuanpihte in Paisan pawi hun sungin Jerusalem ah a kilaak dingin “to” uh hi. “Ka hun tung nai kei” ci lel hi.

Ahih hangin tutunga Paisan Pawi bel a tuampi khat ahi hi. Mipi’ tungah kilaak sawm hi. Sakol tungah tuang lo-a lano khat’ tungah a tuan ciangin Zechariah in a genkholh kumpipa ahihna a lakkhia ahi hi.

Tua banga khua sung hong lut ciangin amah thah ding a tum den biakna makaite zong nidang bangin kisimmuh nawn lo uh a, a kilangin a thah nading thu uh kikum ta uh hi. Hong paikhia-in amah Messiah hi ci-in pulak ding maw, ahih kei leh hazatna tawh amah a thah nading uh vaihawm ding? Kumpi lukhu khusak ding maw, ling lukhu khusakin that ding?

Mipi bel lungdam hi. “Topa’ mina hong pai kumpipa in thupha ngah hen. Vantung ah nopna omin a sang pen mun ah minthanna om hen” ci uh hi.

Biakna makaite nuam lo uh hi. Mipite a hai bangin ngaihsun uh hi. Zeisu in tua mite kham leh ut dihmawk uh hi. Zeisu in mi honpi’ mai mah ah tua biakna makai a kicite tai hi. Makaite in tua mite a khem thuak bangin ngaihsun uh hi.

Jerusalem khuapi a kimuhna mun a tun ciangin i Topa a khitui luang hi. Bangtan kap hiam hong kigen lo hi. Jerusalem khuapi in a tuah ding gimnate mu khola kikho zo lo-in kidikin kap hi.

A sawt lo-in mi gilote’ khut sungah kipia in maizumna leh zahpihna thuak ding cih thei hi. Kivua kisatin kibawlsia ding, a tawpna ah kithat ding cih zong thei hi. A puan nangawn kihawkkhiatsak ding cih thei hi. Tuate’ hangin a khitui mal khat zong kia lo hi.

Jerusalem khuapi bel kah ngiat mah hi. “Tuni-in thei zen le teh maw…” ci ngeungau hi. Roman galkapmang Titus’ galkapte in khuapi umcihin sisan bangzah luang ding cih mukhol hi. Mite’ kahna aw leh thuumna mauna awte a bilkha ah za khol khin hi.

Tangthu siam Josephus’ genna ah, Titus in AD 70 kum Paisan Pawi kibawl hun tektekin Jerusalem khuapi sima sawtpi umcih hi. Khua sung mite a nek ding uh om nawn lo-in a kawnggak savun khawng nangawn uh huanin ne uh hi, ci zen hi. Mi tampi gilkialin puksi ngiat uh hi. August kha ciangin Roman galkapte khua sungah lutin khuapi leh biakinnpi suzan uh hi. Mual sang lama taite September kha ciangin kithat maimang khin hi. Jew mite awn khat val si uh hi. A si lo sunteng “sila” suak uh hi.

Zeisu in lano tung pan khuapi a et lai, a khitui luanga a kah lai-in tu-a thute mu khin hi. Tu-a thute bek mah ahi tam? Bangteng mu khol lai hiam? Leitung bup ah a mite a kibawlsiat nading, Adolf Hitler in awn guk val a thah nadingte zong mu khol lua ding hi. Russia gam khawnga tampipi a kithah nadingte mu khol khin hi.

I Topa kap mengmeng lo hi. A lawm it mahmah Lazarus a sih lai-in khat vei kap ngei a, tu-in minam khat leh a it Jerusalem khuapi a sih ding a ngaihsut ciangin kap leuleu hi. Lazarus bel han sung pan phong kik mah hi ve’n, Jerusalem in bel ama’ aw ngai lo hi.

Jerusalem leh Jew-te in ama’ aw ngai lo uh ahih manin leitung mun khempeuh ah kithehthaang uh a, 1948 kum ciangin Israel gam a kici hong piang kik pan hi. Tua nangawn Pasian in mailam hun ading a gelna a tangtun nading a kipatna hi a, Jew-te in a Messiah uh phawk nai lo uh hi.

Ni khat ni ciangin bel tua mite mah in “Topa’ mina hong pai pa in thupha ngah hen” a cih theih ni khat uh hong tung dinga Pasian in “a puksa David’ puanbuk hong lam kik” ding hi. Pasian’ gelna kuamah in khaktan zo lo ding hi. “Topa’ mina hong pai kumpipa in thupha ngah hen! Vantung ah nopna omin, a dang pen mun ah minthanna om hen!”(Luke 19:38). Rev. Zam Khat Kham