Pa ~ Rev. Lian Za Tuang

Pa ~ Rev. Lian Za Tuang

(1 Cor. 11:3) “Pa” cih pen i pianna, i makai, i siampi, hong huh le hong kempa cihte ahi hi. Pa’ Ni a tun simin, tate’n pate zahtak ding dan le pate thupitna cihte kigen dena, pa i cih kuate hiam, cih le pate’ mawhpuak cihte kitawm gen mahmah hi. Tua ahih manin, pa a hi khinte in, i tate’n hong zahtaka i thu hong man theih nadingin, pa i cih kuate hi-a, ken ka pate’ thu ka mang hiam, cih i kingaihsut masak ding, thupi ka sa hi. Eite’n i pate’ thu manglo pi-in, a thumang tate i lamet pen hi theilo hi. Tua ahih manin, pa ih cih kuate hiam, cih tawh i pan ding hi.

I. PA IH CIH KUATE HIAM?
A. Pasian hi.
Pasian pen na khempeuh, mihing khempeuh pianna ahih manin nuntakna nei khempeuhte Pa ahi hi. 1 Cor. 8:6 munah “Eite aadingin Pasian khat bek, Pa khat bek a om hi. Ama aadingin i nuntaknapa, na khempeuh a piangsakpa ahi hi. Eite tungah nuntakna hong pia, na khempeuh a piang sak Topa Zeisu Chris khat bek a om hi.” Na ci hi. Eph. 4:6 na sungah “Mi khempeuh’ Pa ahi Pasian khat bek oma, mi khempeuh’ Topa hi-in, na khempeuh hih kimin, mun citengah a om hi.” Na ci lai hi.

Nebuchadnezzar kumpipa in, thupi a kisak mahmah laitakin na khempeuh Pasian hang ahih lam phawk lo ahih manin, tua pilna a ngah dong Pasian in gamlakah gambawng suak sakin kum sagih sung om hi. Na khempeuh vansang pena om Pasian uk hi, cih a theih ciangin suakta sak pan hi.

Nuntakna khempeuhte’ Pa, i tawntung Pa hangin a piang i hih lam na kiphawk nai hiam? Ih tunna ciangciang, Ama hang ahih lam na mangngilh kha hiam? Israel te in a cihtheih hun teh amaute a Honkhiapa, Asampa le a tawntung Pa uh mangngilh pahpah uha, Pa’ tawsatna thuakin kum tampipi saltang uh hi. Ih tawntung Pa in, i khialh hun ciangin hong thuhilhin hong tawsat hi (Heb. 12).

B. Abraham hi.
Abraham pen tanglai pek panin Pasian in, a upna hangin na telkhia-a, tua manin thu-um khempeuhte’ pa kici hi (Rom. 4:11, 16). Israelte in ka pa uh hi, ci’n a kisaktheihpih mahmah laitakin, Zeisu in Pasian in hih suangte nangawn Abraham’ suante suak sak thei hi, ci-in upna neite bek i khalam pa ahihna na gen hi (Mat. 3:9). Leitung vaiah mi namlian, mi thupi hi ta le hang, i pianthak kei leh bel; i pa Dawimangpa mah hi veve hi (Jn. 8:44).

C. Gam ukte.
Joseph in, a neu tunga kipatin a pa’ itna ngah mahmah ahih manin, a sanggamte’n haza in, nakpi takin bawlsia a, thah ding nangawn sawm uha, a tawpna teh i thah liang sa’ng ci-in Egypt ah sila dingin zuak uh hi. Egypt gamah zong haksatna tampi phu ta leh Pasian tungah citak den ahih manin, gam makai (Prime Minister)dongin Topa’n lamto hi. A pa le a sanggamte tenna Canaan gamah kial hong tun ciangin antaw in, a sanggamteng Egypt hong pai-a, a neu lai peka a simmawh uh Joseph pen Egypt gamsung khempeuh a len ulianpi himawk ahih manin kua hiam, cih thei zolo uha, a tawpna teh Joseph kipulak hi. Tua pan a uteng in, a gamtat siatnateng kisuangin lau mahmah uha, ai’hang Joseph in, lunghimawh kei un, hiteng hong tun pen no hilo-in Pasian hi zaw hi. Mi tampi tak nuntak theih nadingin Pasian in Pharoah tungah pa in kei hong bawl hi, (…he hath made me a father to Pharoah,…)na ci hi (Pian. 45:8).

Daniel 2:21 sungah Pasian in a deihte kumpi, makai sem saka, a deihlote hemkhia lel ahihna na gen hi. Tua manin gam ukte pen Pasian in i pa dingin a koih ahi hi.

D. Upna ah i siate.
2 Kum. 2:12 sungah Pasian in Elisha’ siapa ahi Elijah vanah a laktoh tak teh, nakpi takin Elisha kiko-in, “Ka pa, ka pa aw,…” Ci hi. 2 Kum. 6:21 sungah Israelte kumpipa nangawn in, Elisha pen, pa ci-in na sam hi. 1 Cor. 4:15, 17 sungah Paul in Israel mite tungah “Chris’ thu hong hilh ding mi a tul a za-in na nei uh ahi zongin pa-a na neih ding uh kei bek a om ka hihna thu na phawk un. Banghang hiam cih leh note kiangah lungdamna thu ka hong hilhna hangin Zeisu Chris sungah nomau’ pa ka suak hi.” Na ci hi. Paul in, Timothy, Onesimus te a kipan thu-um mite pen upna ah ka ta cih kammal tam veipi tak na zang hi. Tua manin kha lamah i siate i pastor te pen i pa ahi hi.

Tu in, hih a tunga ka pate’ thu ka mang hiam, cih kidong in la, tua panin na tate hong bawl ding dan thei in.

II. PATE’ THUNEIHNA.
Mat. 28:18 sungah Zeisu in, leitung le vantunga thuneihna khempeuh hong kipia khin hi, na ci hi. Thuneihna sang pen a neipa in, innkuan sungah pa, pawlpi sungah pastor, khuasung gamsungah ukpi le kumpite koihin thuneihna na pia pah hi. Rom. 13:1-7 sungah ei tunga thuneihna neite’ thu man dingin hong gen hi. Amau thu manna pen amaute pa dinmun a pia Pasian’ thumanna hi, na ci-a, manlohna pen, Pasian’ thumanlohna hi, na ci hi. Pate’ thuneihna i nial khak leh lauhuai mahmah hi. Ih tawntung Pa, Pasian’ thu i nial khak manin pumpi, kha sihna dong hamsiatna i ngah hi (Rom. 3:23; 6:23). Tanglai in Israelte’n kumpi neilo uha Pasian in amaute Kumpi ahi hi. Pasian in Moses tung thukham pia bek hilo-in, gam le nam vai-ah a mite makaih nadingin telin thuneihna zong pia-a, Aaron pen biakna tawh a mite a makaih dingin na tel hi. Gamlakvakna 16 sungah Korah le a pawlte in Moses le Aaron thuneihna hong nial khak teh Pasian heh lua mahmah ahih manin a dinna lei kamka sakin a zi a tate uh le a neihsateng a valhtum hi. Israelte in hih thu hangin Moses le Aaron a mawh sak teh Pasian heh lua ahih manin mihing 14,700 thata, Moses le Aaron in mawh a sut sak manun adangteng suakta bek uh hi.

Thuhilhkikna 21:18-21 sungah Israelte sungah nu le pa’ thu manglo tate a om leh khua upate ap ding uha, tua pan suang tawh kidenglum ding, ci uh hi. Thukhente 14:1-3 sungah Samson in a nu le a pa’ awi loh pi-in dawibia Philistia nungak khat a tenpih manin, a thahat mahmah kimlai, a tawpna ah a mit kikhel sakin naupang khatin lamin zumhuai takin si hi. 2 Sam. 15 sungah Absalom in a pa David a langpan khak manin galdo a, a laa tawh a tai laitakin tawsaw hiangkawm ah a lu awngin tua pan galte’n manin thatlum uh hi (2 Sam.18:15).

Paunak 30:17 sungah “A pa a simmawh mipa, a nu’ thu a mang nuamlo mipa, va-ak in a mittang khelkhiat sakin musanete in a sa ne ding uh hi.” Na ci ngiat hi.

Paunak 20:20 sungah “Na nu le pa na samsiat leh khuamial sunga meivak sumit na bang ding hi.” Ci hi. Eph. 6:1-3 “Tate aw, na nu na pate’ thu na man ding uh Christian ngeina hi-a, ahi ding mah ahi hi. Thupiakna a lian khatin, na nu le pa zahtak in, cihna hi-a, khapna thu tawh kizom pahin, zahtak le cin, nang aadingin thu hong hoihin, leitungah na khan a sau ding hi, na ci pah hi.”

Tua ahih manin pate’ thuneihna i nialkhak leh bel thuneihna sang pen a nei i tawntung Pa in hong dop bawl lo ding, cih thu hi-a, leitungah nuamsa in sawtpi i nuntak nop leh nu le pa’ thuneihna nuaiah thumang takin nuntak ding ahi hi.

III. THUNEIHNA A ZANGKHIAL PA.
Innsung, pawlsung, khuasung le gamsung thuneihnate pen ei le ei a kipiak tawm hi lo hi. Ih nu pil penin makai sak ni, i u pil penin makai sak ni, ci-a, teltawm theih hilo-in, na khempeuh a piang sak Pa in a sehsa ahi hi. Pasian in, innkuan sungah Ama’ tanga thunei (agent) sem dingin Pa na koih hi (Eph. 5:22-23). Pawlpi in Chris’ khut nuaiah, zite in pasalte khut nuaiah, tate in nu le pate’ khut nuaiah, silate in a tote’ khut nuaiah cih bangin Pasian in na gual deudau khin hi. Tua thukhun i zuih kei leh buaina om ding hi pah hi. 1 Cor. 11:3 sungah, mi khempeuh’ lutang pen Chris hi-a, numei’ lutang pen pasal hi-in, Chris’ lutang pen Pasian hi, na ci hi. Pasian in a lian pen aksi dongin amau mun tek dingah bawlin koiha, a neu pen miksite dongah a mau panmun tek koih hi, cih phawk ni. Piangthak tampi takin Pasian hong piak ih talen le i dinmun i theih loh manin buaina, haksatna tampi piang hi.

Zomite sungah zi lel cih kammal kinei-in, zi lel pente in zong zaknop kisa tuanlo hi. A taktakin zi lelhna pen i it luat, i ngek bawl luatna pana piang hi gige hi. It luat manin ngek bawl paha a sawt teh a kumpi tokhom nangawn awn ta hi. Pasal ginat lohna le teilahna ahih manin zi lel pasalte pen a zumhuai le a lauhuai mahmah muna om ahi uh hi. A innsung pan a phungsung dongah kisia ding hi.

Sawltak Paul in, 1 Tim. 2:12 na sungah “Numeite in pasalte tungah aana nei in thu a hilh ding ka phal kei hi. Gamdai takin a om ding uh ahi hi.” Ci-in kician tak na gen hi.

Zi le tate tung, pate’n i thuneihna pen ei aa bek dingin zat ding hilo-a, Pasian’ minthanna dinga zat ding ahi hi. Israelte tungah Pasian in, na tu na tate uha kipan khang sawnsawn dongah hong kimangngilh lo-a, ka thukham a kizuih den nadingin Thuhilhkikna 6:7 ah “Na tate u tungah limtakin na hilh ding uha, na innsung uhah na lut uh ciang, lampi ah na pai uh ciang, na lup ciang uh le na thawh ciangun tua thute na gengen ding uh hi.” Cih na lim gen mahmah hi.

Eve’ mawhna Adam tung kisit a, siampi Eli’ tate mawhna Eli tung kisitin thu kikhen hi. Na innkuan sung bangci ciang hi-a, Pasian’ thukhun dan tawh a kituak hiam? Zite lelh manin phamawh kei, na cih khak leh, tu laitaka na dinmun dik le diklo in, khang tampi dong kimang ding thu hi. Pasal hoih in, zi hoih piang saka, zi hoih in, innkuan hoih piang sak hi. Khuasung gamsung hoih nading, innkuan pan kipan hi. Tua dingin na pate’ thu na mang hiam? Na tate’n na thu hong mang hiam? Na thuneihna na zangsiam hiam?

Zomi sungah Pa khempeuh in Pa’ dinmun diktak tawh gam le minam aading le i biak i Pasian aadingin mapangkhawm ciat ni. Topa’n thupha hong pia ta hen. Lungdam.

Zomi sungah,
Rev. Lian Za Tuang
Pastor, EBC, Tulsa