Pa, Napoleon azopa ke’n zo!

Pa, Napoleon azopa ke’n zo!

Kum 1885 pawlin Piantit (France) galkapmang (General) Napoleon leh a pawlte in Europe gambup a zawh khit ciangin a maban England gam zong sim lai ding cih a ngaihsun hi. Tua thu Englandte in a zak uh ciangin lau-in a ling uh hi. Ahizongin tua banga launa bek tawh mawk-om’ theihthu hilo ahihmanin, England galkapmang General Wallington in zong a galkap teng khawmin, Napoleon pawlte sim dingin a kuankhia uh hi. Ki ummawh lopi-in Napoleonte va zo kha zenzen uh hi.

England kumpite in tua thu a zak uh ciangin nuam lua in lasakna, lamna tawh Willingtonte dawn dingin hong kithawi uh hi. Galkapmang General Willington leh a pawlte zong inn a tunkal ding ngaklahin lam ngeina zong tawn nawn lo-in lam dawt, lam nai theithei tawnin a tembawte uh hong nawhhawl’ mahmah uh hi.

Lam nai pen dingin a ngaihsut uh tuipeeng khat-ah hong pai uh hi. Ahizongin tua tuipeeng monglam piauzangah papi khat in huan a na nei citciat hi. Papipa in a tapa kum 13 mikhat kiangah, “Bawi aw, tuni-in Willington leh a galkapte in i huan nawk’ hong sawm uh hi. Tua bangin hong pai mawk le-uh i an teng kisia mang ding hi. Tua ahihmanin i huan kongkhak-ah va pang inla, huanah lut sak het kei in” ci-in a tapa thu a pia hi.

A sawt lo-in Willington leh a galkapte kiphu muaimuai-in hong suak uh a, kongkhak hongin paisuak pah ding a sawm uh hi. Ahizongin naupangpa in kongkhak hon ding na phal hetlo mawk hi.

Lam makaite in naupangpa’ tungah nakpi takin ngen uh a, “Ka nau aw, kong hong honsak mai in; ka siatsak khempeuh uh kong lohkik ding uh hi; a zah tampi-in kong loh ding uh hi” ci-in suai lompi khat a piak uhleh naupangpa in, “Bangzahin manpha in a zah tampi hitaleh kongkhak hong sak lodinga thupiak ka hi hi” a ci hi. Galkapte lah a honhonin hong tung zuahzuah ta hi. Lampi dang lah om lo hi.

A sawtna ciangin General Willington hong tung petmah hi. Thu om dan khempeuh a theih ciangin tua naupangpa thawmvau-na tawh kipai thei lel dingin a ngaihsun hi. “Naupangpa aw, galkapmang hangsan Willington, Napoleon a zopa ka hihlam na thei hiam, manlang takin kong hong in” a ci hi.

Naupangpa in zahtakna pia in bansah a, “Pu aw, Napoleon a zo mithupi Willington in ka pa’ hong thupiak a nial dingin hong sawl teitei dingin kong um kei hi” ci-in a dawng zen hi.

Tua tengleh Willington in tua naupangpa’ muanhuai zia a theih ciangin lamdang sa mahmah a, “Hih naupang banga thupiakna a lenkip galkap tawm beek nei leng, Europe gambuppi haksa lo takin ka zo ding hi” ci-in a galkap hon teng tawh a kilehkik muaimuai uh hi.

Tua khit ciangin naupangpa a inn-ah tai vingvenga, “Pa pa aw, Napoleon a zo Willington ke’n zo ka hi maw” ci-in kipak takin a pa’ kiang a kidenna hi. Tdkhen