Pa Khan Do (kum 71, Buansing, Lay Seih Store) in hongnusia

Thalmual khuami, Kawlpi ateeng Pa Khan Do in tuni 20 July 2017 (Thursday) nitaklam 1pm hunpawl in ateenna Kawlpi pan hongnusia cih kiza hi.

Pa Khan Do pen Thalmual khuami, Buansing beh hi a, kum 71 phakhinta hi. Pu Nek Kam leh Nu Cin Nian te sungpan 01 June 1946 kumin Tedim Myone, Thalmual khua ah suak hi. Unau pasal 5 leh numei 1 pha uh a, amahpen a 4 na ahihi.

Pa Khan Do pen Kawlpi vanlengtual mailian ah Lay Seih Store kici ngeina vantuamtuam kizuakna sainei te hi a, Kawlpi lansong tuiphum (Kalaymyo Baptist Church) pawlpi mikhat ahihi.

Zomi sungah ihki pakpih mahmah kipawlna khat ahi ZYA (Zomi Youth Association) ah tulaitak General Secretary asem laitak ahi Pa Kam Suan Mung (E Mung) ii pianna zuapa zong ahihi.

Tuni sun 1pm hunpawl in cinakhol hetlo in, lungtang natna (Heart attack) tawh hong nusiavak cih kiza ahih manin, a innkuanpih tetawh akibang in Zomi Daily panin dahpihna kong pulak uhhi. A luanghawm pen 22 July 2017 (Saturday) nitaklam 2pm hunin sihvui hunbawlna keineiding hi.

Pa Khan Do pen 1976 kumin Nu Cing Suan Lun (Lunpi) tawh kiteeng uh a, Kawlpi ah teeng uhhi.

Pa Khan Do leh Nu Cing Suan Lun tate

• Pa Kam Suan Mung (B.A English)
• Pa Khup Sian Khai (B.B.A)
• Nu Nian San Kim (B.Eco)
• Nu Vung Theih Nuam (B.Com)

Pa Khan Do ii sangkahna

• 1959 kumin Thalmual khua aom State Primary School panin Tan 4 zo hi.
• 1960 – 1963 kumsung Mandalay Region, Meiktila khua aom Army Children High School ah Tan 8 dong kah hi.
• 1964 – 1966 kumsung Toungoo Kyauh Taing aom Seventh Day Advantist High School ah sangkah hi.
• 1967 – 1968 kumin Rangoon No. 1, Dagon High School panin Tan 10 zo hi.
• 1968 – 1970 kumsung Mandalay University ah Geography Major tawh sangkah zomleuleu hi.
• 1971 – 1973 kumsung in Ministry of Education, Wokers College ah lai-at L.D.C asepkawm in sangkah hi.
• 1973 kumin B.A (Geo) tawh Degree hong ngah hi.
• 1971 – 1975 kumsung in Ministry of Education, Minister’s Office Rangoon ah sem hi. Tua hunsung in:

a) Admin Department (Ministry of Education)
b) Colombo Plan Department (Ministry of Education)
c) UNESCO Department (Ministry) cihte ah nasem kawikawi hi.

1975 kumin kumpi nasepna panin ama utthu tawh nasep khawlin, sumbawl suangbawl kipan in Kawlgam leh India gamsung kawmkawikawi hi. 1976 kum ciangin azi tawh kiteeng uh a, Kawlpi ah ateengsuak uh ahihi.

Pa Khan Do pen Zomi sungah kumpisang panin Degree angah masalampawl hi a, khualehtui, minamvai cihtezong avei mahmahkhat ahihi. Kawlpi ahzong mawtaw (Jeep) anei masapawl hi a, khuasung, usung nausung leh minamvai ah kisapna khatpeuh aom ciangin iksik hetlo in zangsakden hi.

Related: Innkuan Khat Pawlpi Nih Zomite ~ Pa Khan Do

Pa Khan Do in adamlai in alaigelh Innkuan Khat Pawlpi Nih Zomite ~ Pa Khan Do cih thului simleng, ama lungsim puakzia, thuthuk a ngaihsutzia kitel mahmahpah hi. Pa Khan Do ii hong nutsiatna hangin adah akap khempeuh gumpa khasiangtho in na hehnepsak henla, ama kha in tungthangvan ah tawldamna ngahtahen! Sawltak #zomidaily