Oxygen leh Pasian hu kibanglo

Oxygen leh Pasian hu kibanglo

LAISIANGTHO BULPHUH: JOB 27:3; ka sungah nuntakna a omlaiteng, Pasian’ hu, ka nakah ka diik laiteng,

LUNGSIM HONG PHAWNG DEN KAMMALTE

Cikha zato panin hong nusia Pastorte kammal; Rev. Cin Suan : “Pau Lun Oxygen hong beisak mahmah kei un maw” Rev. Gia Suan: “Huih kham keng ei, Huih kham keng ei, ka awm na lua ei, ka awm na lua ei” Hih kammalte ka lungsim ah mang thei mahmah lo ahih manin gim ta leng, maizum huai ta leh huhna ka ngen kawikawi kha zel hi.

BANGHANGIN KHANGMA ZEZEN KA HIHIAM?

Gamdang a te sun ahih manin zan lam pen ka ihmut hun tawm mahmah hi. Gamdang a omte mah kong muang a kong hopih nop manin ka zanmeng den hi. Messenger ah a eng kiukeu teng kong hopih sawm zel a, na theih loh kalin ka na tawp kik zel hi. “Topa aw kua hopih ding a, kua in ka gam uh hong huh ding hiam?” ci-in lungsim thungetna tawh kong teltel khit ciangin kong hopih a, nong huh ciat uh hi. Lungdamna lianpi hong ko hi.

A PA DIIK DING OXYGEN DEIH IN KAP

Tuzing tho hak pian ka hih manin ka lawm Pau Lun in hong hopih lam ka phawk pak kei hi. Ka phawk phetin ka hopih kik a, “Kawlpi meltheihte oxygen 40% bek om ta, na huh in” hong ci hi. Esther in a Pa diik ding oxygen a ngah zawh loh manin a kahna thu hong gen hi. Midang’ ading a kikoih bung khat ka ngen ngaungau a, a hun lapin kipuak thei bilbel hi. Hih lai ka gelh laitakin Esther in phone hong set a, “Sia aw lungdam lua ung, ni khat hong nuntakpih bek zong Pa nei lai suak kahih manun” hong ci hi.

A GAMLA PAN A NU ADINGIN KAHNA AW

Tua khit a sawt loin Malaysia pek pan hong kihopih leuleu a, “Sia aw ka Nu diik ding oxygen kisam lua, hong huh in” cih Tuangsan kahna aw hi leuleu hi. Mi’ ading a kikoih khat mah i vaihawmsak leuleu hi.

A KHASIAT HUAI HOPIHNA

Hong it mahmah Australia a om Nu Huai in “Sia aw, na kidawm un maw, Kawlpi a ka tanaute innkuan khat sungah covid 19 tawh thum tak si mawk ei” hong ci a, i khasiat suak ngeungau peuhmah hi. Kawlpi pen a dah huai mahmah dinmun hita hi.

A TAM MAN MAHMAH HUIH SIANGTHO

Oxygen cylinder bungpi khat Ks.185,000 a i leite tu nitak lamin Ks.235,000 hong hiziau ta hi. Mandalay ah zong khang ahih man ahi hi. Cikha zato ah cina gim ten zan khat bekbekin bung 3 bei uh ahih manin zan khat thu in Ks.705,000 a beisak uh ahi hi. Tuni ciang na nuntak sungin bangzah man na diik ta hiam? Topa tungah lungdamna ko ciat ni. Topa hehpihna lian lua hi.

OXYGEN LEH PASIAN HU KIBANG LO

I Lai Siangtho simna mah bangin nuntakna pen Pasian hu ahih lam ka phawk semsem hi. Cinate in oxygen diik leh nuamtuam sa mahmah napi nuntakna hilo mawk hi. Tutung a Cikha zato panin hong nusia i it mahmahte adingin i hanciam theih tawpin i hanciam ciat a, oxygen concentrator bung 20 bang a om hangin Pasian’ “HU” pen a paikhiat ciangin hong sihsan veve mawk uh hi. “Pau Lun, oxygen hong beisak mahmah kei un maw” cih leh “Huih kham zo keng ei” cih kammalte bek mah tuni dong a nungta lai suak hi.

NA KHAMUANG TA HIAM

Topa Jesu hong gupkhiatna na sang ta hiam? na innkuan un na kha muang ta uh hiam? Oxygen pen a nuamtuamsak bek hi a, nuntakna gum khia zolo ahi maw. Sia Do Khup