Ohio ah thubuai aom manin sihdan piakding mi 8 ahun kisotto

Ohio ah thubuai aom manin sihdan piakding mi 8 ahun kisotto

Feb. 11, 2017: US gam Ohio state ah state in sih dan a piakna zia (state’s execution process) thukham lamsang (legality) vai-ah kiselna a om manin Ohio Governor John Kasich in sih dan thuak ding mi giatte a hun sotto hi. Tu kum bulin Ohio state in sih dan piakna dinga kizang zatui thum zatna ding vai pulakna (proposed) a bawl hangin magistrate judge in tua zatuite thukham tawh kituak lo hi ci a, tu-in Ohio state in a kizat theihna dingin ngen in, hek hi.

Mi thahna dinga kizang tua zatui nam 3te pen thongkiate’ zengsak (paralysed) in, a lungtang uh khawlsak ahih manin thukhen (judges) ten zat ding kham uh hi. Ronald Phillips kicipa in a lawmngaihu’ tanu kum 3 mi buanin a thah manin Feb. 15 ciangin thah ding ngak a, Ohio governor in a thah hun ding May 10 in sotto hi.

Governor Kasich in thahna ding vai thukhenna hekna/tona (legal challenge) hangin a hun kisotto a, ahih hangin state in hih hekna kizo ding hi ci-in a lamet thu gen a, state in thukhenna hekna a zawh ciangin sih dan tuakte kithat ding hi ci hi. Ohio state thonginn (prison) thukhen khat in sih dan piakna dingin zatui Pentobarbital kici state sagih- Alabama, Arizona, Florida, Georgia, Missouri, Texas leh Virginia panin hong piakna dingun a kinget hangin hong kipia nuam lo hi ci hi.

US gamah mi thahna dinga kizang zatui (lethal injections) pen a deih bangun a kicing ngah loin buaina tuak state tampi om a, tuate lakah Ohio zong kihel hi. US in 1999 in mi 98 zatui zangin sih dan na pia a, tua khit nung nakpi takin kiam suk a, 2016 in mi 20 bek zatui zangin kithat hi.

US gam-a state tuamtuam a sih dan (Capital/death punishment) kipiak zia a tamna pen tawm en pak ni:

US sunga state 50 lak panin state 31 in sih dan piakna omsak uh hi.1976 panin Texas state sung bekah mi 540 sih dan kipia a, tua khit Oklahoma leh Virginia ah mi 112 tuah sih dan kipia hi.July 2016 in US sungah thongkia mi 2,095 in thah ding ngak uh a, California state sunga thongkia 741 in thah ding ngak uh a, ahih hangin 1976 khit nung mi 13 kithat pan hi.

#Behlapna: Mi thahna dinga zatui kizanga kithatte pen nuam takin si tuan lo uh a, a zatui in deih bangin na a sep kei leh sih dan tuakte sih pah loin hamsa sa mahmah uh hi. Hollywood movies “The Green Mile” kici Tom Hanks, David Morse, Bonnie Hunt, Michael Clarke Duncan, James Cromwell, Michael Jeter, Graham Greene, Doug Hutchison, Sam Rockwell etc. in a piah, 1999 kum-a kibawl na en le uh cin na tel ding uh hi. ource: BBC/ Thang Khan Lian