Obama in “US in IS piannading in kihuh mahhi” ci

Obama in “US in IS piannading in kihuh mahhi” ci

Dec. 8, 2016: US President Obama in zanhal in Florida-a MacDill Air Force base ah terrorism dona ding vai a genna ah, “2003 in Iraq i simna hangin IS hong piang khia ahih manin tua bangin i hih khialte hih kik loh kisam hi. US in terrorism ei guakin kido lo a, Iraq gam kiim-a gamte tawh sim khawmin gam 70 phial tawh kipang khawm in ISte Syria leh Iraq ah kido a, ISte tung lam panin 16,000 val vei kikap ta hi.

Tu ni-in IS ten a leitang uh a kim khat val uh khahsuah ta uh a, mi tamna khuapite a tamzawte a khahsuah manun un a galdo nopna lungsim uh thanem tuam mahmah hi. ISte dona dingin American galkap honpite (battalions) bek kizang loin local forces (rebelste a genna) kizangin US adviserte leh galhiam tawh kihuh a, tua bek hilo-in US Special Forceste kizang hi,” ci hi.

Obama in hih terrorists kici ten Islam paulam in gal a do hangun terrorism i dona ah biakna khat bek (Islam) i do ding cihna hilo a, terrorism dona pen US leh Islam kidona hi i cih khak leh US in suamna nasia zaw sem i tuak kik banah i thubullet/ kingakna thu bulpi (principles) kikhahsuah ding hi ci-in Trump hilh bawl hi. Trump in a vote zon lai-in terrorism kipatna bulpi pen Muslimte hi ci-in Muslimte US ah lutsak loh ding a tangkopih banah IS hong pian’na dingin Obama in a khut zang hi na ci mun mahmah hi.

Trump in August kha in Florida ah ISIS phuankhiapa (founder) pen Obama hi a, a co-founder pen mi gilo lungsimkawi (crooked) Hillary Clinton hi na ci hi. Ahih hangin Hillary in a dawn’ kikna ah Trump pen (Muslimte lutsak loh ding cih kampau a zatna hangin) IS galkap dinga mi laklut siam penpa (“best recruiters” for Daesh) hi na ci hi.

October 2016 in Komsomolskaya Pravda in Syrian President Bashar Assad interview a neihna ah Assad in IS (Daesh) pen USte mit nauta nuai-a hong kipiangkhiasak hi a, US in ISte a sim tham leh a lang tangin huh den hi na ci hi.

More: Malaysia UNHCR zumpi pan Community makai leh mipi tetung zaksakna

November 2014 in journalist panin Russian MP a suak Alexei Pushkov in IS pen USte piangkhiasak hi na ci a, IS hong pian’khiatna dingin US leh USte pawlte Gulf/Arab gam-a kumpite hi a, sum tawh huhna pia ziahziah uh a, Syria President Bashar Assad laihkhiat ding ngimna lian pen nei in a pian’khiatsak uh hi na ci hi. Source: Your News Wire/ Thang Khan Lian