Nute Ni ~ DK Nangno

Nute Ni ~ DK Nangno

Nute Ni ongtun sialin kanu’n la tawh ong thu hilh na te phawk kahih manin kong hawm sawn hi. Ka Pa ong nusiat in kum 8 ka pha pan a ko unau kambah ding bekbek 8 ka hi uh hi. Ka nuntaak nading uh ong lung himawh te’n ka Nu lawki suakin zuhuan tawh a tate ong vaak ding ngaihsutna napia uhi. Ka Nu utlo in Pasian mah na pom cinten ahih man in tu a ciang a tung ka hi uhi.

Ka Nu in ko a tate khat Pasian nasem dingin ong deih ahih manin hunbit Pasian nasem dingin kaki sinsin tei hangin lampi kihong thei mahmah lo hi. Ahih hangin a tupa Rev. Go Van Mung hunbit Pasian nasem dingin lampi ong kihong ahih manin ka Nu ama omna munpan lungkim gawp dingin ka deihkaih hi.

Hih thu hangin Pasian nasepna ah utbek lawpbek hilo in Ama sapna (calling) om keileh ahi thei vetlo ahihna zong ka tel a, Ama nasem ding in kei sangin ka Tapa deihzaw a hihna zong telna in kanei hi.

Pasian in a tangzai takin hong zatsak ta hen.

1. Tongdam, na nem nem ve aw na guallai ah, Tongsuah sia a gual tungtuang cih omlo e, Tongnem ci a mi singta’n ong lel a leh, Ngalliam vontawi tang na,nem sam diai aw e

2. Na tunsik in na zua sikin,vaimang lian tun aw ci aw. Vaimang lian tu’n aw ci in,la, vaimang tuanglam tam sak aw.

3. Tun aw ci,in ong lolo,ken aw, Nong lawhlawh leh ma na zam lah ding hi e, Nong lawhlawh leh ma nazam lah ding hi a, Na mazat ban in na tun lah ding hi e.

La masa pen pau le ham tawh kisai gampau loh ding thuhilhna hi in, La nihna pen Nu le Pa tang vaipuak nih a pua na Nu hi’ng cihna hi. La thumna pen kong nuntaakpih nawnloh hang in, lungleengin, kha kunkun, mawk kei un. Na maban uh zom,zolo ding hi uteh, cihna thapiakna hi.

Tu’n kum 74 sung ah a luutta ka hi a, hih ka Nu ong vaikhaak te mah a nuntaakpih ka hihi. Nute Ni a NU nei laite hampha uh ciai. Topa Thupha. DK Nangno