Nupi khatin kum 2 aphapan atanu mawtaw sungah nusiakha in sihlawh

Nupi khatin kum 2 aphapan atanu mawtaw sungah nusiakha in sihlawh

Nupi khatin kum 2 bekbek aphapan atanu pen mawtaw sungah nusiakha ahih manin atanu pen alum thuaklawh in sihlawh cih ST pan kiza hi. Zanni in Malaysia, Port Dickson ah thupiang hi a, naungek in khualum “heatstroke” thuaklawhlua ahih manin asi ahihi.

Hihvai tawh kisai in palik thunei ahi Port Dickson OCPD Superintendent Zainduin Ahmad in agenkhiatna ah tua nupinu pen kum 32 aphakhin khat hi a, aminpen Ms Hasmah Masroh hi ci’n genkhia hi.

Tua nupinu pen mimawkmawk hilo, pilnanei khat ahih banah Port Dickson Vocational College ah Lecturer sangsia khat ahihi. College huangsung aom mawtaw koihna Carpark ah atanu pen nai 4 sungtak nusiakha cimawk hi.

Nitaklam 1pm hunpawl ciangin mawtaw sungah atanu anutsiatlam phawkpan hi. Tuaciang in amanlang in taipah vingveng in, mawtawsung a et ciangin atanu pen khua phawknawnlo hi ci’n palik thunei te’n genkhia hi.

Tuaciang in anu in atanu pen Port Dickson Health Clinic ah taipihpah vingveng a, ahi zongin atanu pen asawtlo in sisuak hi.

Naungek ii aluanghawm pen Port Dickson Hospital misi kepna “Mortuary” ah kikoih hi. Anu pen khasia mahmah in, kapkawmkawm in taamlo kawmkawm a, “kata aw, khial mahmah ing, hong maisak in. Nanu in ngimna tawh kongnutsiat hihetlo hi” ci’n kapkap a, ameltheih tanau te mi 30 khawngin hehnem in ompih uh cihi.

Alawmte khatin agenna ah hih nupinu pen nisim in ata a upazaw pen Kindergarten ah khamasa hi. Tuakhit ciangin atangek pen naukepsak “Babysitter” te kiangah akhakkhit cinagin, nupinu pen zumkah in apaisuakzel cihi.

Zanni zong zingsangin ata a upazaw pen Kindergarten ah khamasa hi. A tangek pen amawtaw anungtukna ah naupang tutna tawh atutsak hi a, innpan apaikhiat laitak un atangek pen ihmu hi.

Tuabang tengah a tangek pen naukem te kiangah akhakding mangngilh in, nasepna ah kuansuak a, mawtaw Carpark ah akoihkhit ciangin azum ah paisuak vingveng hi. 1pm hunpawl ciangin atanu mawtaw sungah anutsiatlam phawkpan a, tuaciangin ziakai luakhin ahih manin, a tangek in asihlawh ahihi.

More: Video: US ah naupang kum 10 aphapan khatin mawtaw hattak in phenghawlgawp

Hihvai tawh kisai in Police te’n athu koihtak akansan laitak uh hi a, anu mawhhi ci’n aki theihkhiatleh thong kum 10 bang kiatheiding a, liausum zong RM20,000 bang ki liausak theiding cih kiza hi. Sawltak #zomidaily