Nupate’n theihhuai mahmah pawlkhat (Part 2)

Nupate’n theihhuai mahmah pawlkhat (Part 2)

A lungsim leh a pumpi za-ah-za nang adingin hong kipiakhia na zi/pasal tungah itna maan nei den in.

Na zi/pasal’ tungah “hong it ing” na cih ding khawng thasial kha hetkei in. “Hong it ing” na cih theih nawnloh hun hong tung ding hi. Mi pawlkhat in a zi/pasal tungah “hong it ing” a cih ding khawng haksa sa thei mawkmawk uh hi.

Ei’ nupa ki-it in nuamsa le’ng eima’ metna ding hi-a, ei nupa ki-it loin buaibuai mawk le’ng eima’ supna ding ahi hi.

Na zi/pasal adingin thuman in na cihtak ding mangngilh ngei kei in. Hong mu/tel gige Pasian mai-ah a nungta/khuasa den na hi hi.

Na zi/pasal theih lohin midang tawh kizop simna, gamtat simna cihte zangh kha vetkei in. Na kisikkik hun hong tung veve ding hi.

Innkuan sung nopna ding nu leh pa mahin i pat ding ahih manin nupa ki-itna lenkip in tate’ muhna-ah ki-it kilem takin nuntak, gamtat, kampau theih ding hanciam den ni.

Nupa in khamtheih/guihtheih khawng i zat hetloh pen Pasian’ thupha tampitakte’ lakah thupha lianpi khat ahi hi. Amen

Khazih sungah, David Tuang