Nupate’n theihhuai mahmah pawlkhat (Part 1)

Nupate’n theihhuai mahmah pawlkhat (Part 1)

(1) Nupa kaal-ah thusim a om nak leh nupa kaal kizopna cidam thei lo ahih manin, nupa kaal-ah thusim omsak hetloh ding ahi hi.

(2) Nupa(pumkhat) hikhin ihih nung sang, sum tuam kep/neih cihte i zat loh ding thupi hi. Nasem tuaktuak ihih leh zong i neihsa khempeuh gawmkhop liailiai ding ahi hi(A diakdiak in gamdang a om, nupa tampitakte’ ii buaina leh kilem lohna pen sum tuam kep/neihna hang na hi gige hi). Pumkhat hihang, kici lanlan napi-in, banghang in tuam neih, tuamzat, tuam tattat ding ihi hiam?

(3) Nupa cih pen, ki maisak thei-in, ki telsiam theih ding thupi mahmah hi. Ahi zong ki maisak/telsiam zawh loh ding zah dongin, mawhna, khialhna i bawl khak hetloh ding thupi zaw lai ahih manin kikep siam mahmah ding ahi hi.

(4) Nupa kilungtuahna hoih mahmah hi. Ahi zongin a hoih lo lamah i kithutuah khak loh ding thupi hi. Na zi/pasal cih bangbang mang pah loin Pasian’ deihna tawh kituak lo ahih leh nial ngam lel in.

(5) Midangte tawh kizopna zong hoih mahma hi. Ahi zongin na zi/pasal in, hua nu/pa tawh kizop ding deih lo cih na theih nak leh kizoppih dah lel in. Midang khat tawh kizom a, no nupa in nabuailawh keei, na kitot lawh keei sangun, midang khat tawh kizom se lo lel a, no nupa kaal, no Innkuan sung a nop ding thupi zaw hi.

(6) Midangte’ mai, midangte’ muhna-ah na zi/pasal tai lala, hap lala kei in. Mite’n hong neu muh lel ding uh a, nang leh nang zong a kizuakzuak na hilel hi.

(7) Nupate in, i tate’ mai, i tate’ muhna-ah kitot/kisel cihte kidop huai mahmah hi. Tate’ muhna-ah kitawng kisel, kivua cihte aom ciangin tate’ lungtang sungah khaici hoih hetlo khat a vawhvawh ihi gige hi.

(8) Nupa ki-itna hong kiam in, nupa kaal kizop dan hong nuam nawnlo ahih khak leh, kiteen ma-a i ki-it/ngaih lai hunte khawng lungngaih kik ding leh i kiteen lai-a Pasian’ mai leh mite’ mai-ah i ki kamciamte khawng lungngai kik a, ei mahmah in, i ki-itnate i thaksuahsak kik ding ahi hi.

(9) Na nupa kaal thu peuhmah midangte’ tungah genkha ngeikei in. Nupa buaina leh nupa sungah thu leh la khat a om ciangin, ei nupa mahin ki telgen(ki ဖြေရှင်း) ding hi-a, midangte’ tungah va koh, va gen ding hi masa lo hi.

(10) Nupa in Pasian’ thu sungah nopsakna pen a manpha mahmah hi-a, nupa in piangthak a, khamtheih guihtheih khawng i zat sese loh pen, Pasian’ hong piak thupha lianpi khat ahi hi. Khazih sungah, David Tuang