Nuntakpih ding ~ Dimno’ Pa

Nuntakpih ding ~ Dimno’ Pa

Ih nuntak sung pumpi cidam ding mah thupi masa pen a, pilna i zon theihna ding, sum i bawl theihna ding, i ki-it theihna ding leh a dang na khempeuh phial ah i pumpi taksa mahmah dam kei leh bangmah kibawl thei lo-a, a nopna ding zong khat mahmah om lo hi. Ih innsung ah nek theih ding tampi aom a, bank account ah sum tampi leh zat ding Mawtaw hoih tuamtuam i nei phial zongin i pumpi dam thei kei leh tua van le na, sum le paai te a kimanna om lo hi.

Tua ahih manin i nopsaktheihna ding, i lawhcingtheihna ding, i piltheihna ding leh i gualzawh theihna dingin a masa pen in i cidam ding hong kisam hi.

Tulai thuthang ahi, ‘Most people are digging their graves with forks and spoons (mi tampite-in a hankhuk ding uh sikkeu leh sikkeuka tawh to uh hi), ci hi. Hi takpi sa ing.

Nidang video sungah Japan galkapte-in a mi matte uh a thah ding uh ciang tupeek tawh lei to sak in, a mau pumpi a kita cia ding a zawh ciang a lei tawh khawl sak in, thau tawh kaplum a, tua a leitawhna sungah a phum ziauh uh mu ngei tek ding hi hang. Tupeek leh Kawbia tawh a mau sihna ding amau leh amau in to, cih ding hi.

Ahi zongin tuhun ciangin tupeek leh kawbia tawh kito nawn lo-in, sikkeu leh sikeuka tawh a ki toto hita hi. Cidamna ding tawh kituak cih sangin i kam i duh, a lim nonote leizaw in kine zaw ta hi. Cidamna tawh kituak ding dawn theih tuamtuam om napi, tuate sangin kham theih hita leh, soda tawh a kibawl a dang tuamtuamte kidawn zaw hi.

Nek ding nei lo, gilkial dangtaak in a si kitam nai het lo sam ding hinapi, duh peuhpeuh i nekna hang tawh i ngah natna hangin a si pen kisim zo nawn lo phial dingin um ing.

Tua manin khangthakte in i duh bekbek tawh vaihawm masa lo-in, pumpi cidamna ding tawh a kituak anteh thei puam leh sa ahi zong, dawn theih tuamtuam te teel in kipuah dingin hong zawn nuam ing.

Ih pumpi mahmah cidam photphot in hi leh a dang i lunggulh na khempeuhte damdam in hong om thei pan ding hi. Dimno Pa (October 22, 2019, Columbus City, USA)