Nuntakna a lamsangzo nasepkician khat septheih nading

Nuntakna a lamsangzo nasepkician khat septheih nading

Na sem lah hilo, na semlo lah hilo, hilam lah hilo hia lam ah hilo, alaklawh a kihei kawikawi khangno nunna panin i nuntak sung hong vakzo, hong lamsang zo nasepkician khat sep theih nading ah koi ci sep ding cih thute..

(i) Bang sem nuam cih khentat in

Hih in a thupi pen ahi hi. Hih mun ah khangno pawlkhatte ki-awk thei hi. Bang sem, bang bawl nuam cih amah le amah a kitheilo mi pawlkhat zong ki om hi. Hi bangdan mi pen Kawlgam ah tampha deuh hi. Ahi zongin amau mawhna zong hipah lo hi. Hin (survive) na ding anletui, silhleten kicin nading hahkat na huhau in nun sung geelna kician neihloh (career lost, Passion lost) pen zong a hi thei thu khat zong ahi hi. Tua hi a, bang sem nuam, bang bawl nuam cih ngaihsun inla khentat in. Hun la in. Lai tampi sim in.

(ii) Hun geelna nei in

Timeframe khat neih ding kisam hi. I khentat khit sam hangin banghun ah bang sem ding cih hun geelna Timeframe kician khat aom kei leh piang theilo zel hi. Tua hi a, ni khat sung pan kha khat sung, tua pan kum khat sung tua pan nuntak sung tengin bang hun, bang ni, bangkum ah bang teng sem ding, bang ciang dinmun tung ding cihte geel kholh sitset ding kisam hi. Sep pah ding thute pen tomcing sitset in na geelna at inla, hunsau geelna (seppah theih lianlohte) a hih leh a huampi (general plan) ciang khawng bek geel lel in. Ahih hongin hih na geelna te pen a kikhel thei/ a nem geelna ahih ding kisam hi.

(iii) Lamlak nei in

Guideline hongpia thei, na pai nading lam hong lak thei ding mi, lamlak kisam hi. Hih pilna, hih lampi tawh nasep kician khat asem dingin khentat ta nahih manin hi tawh kisai in guide line, hong genpih, hong kuppih thei lam hong lak thei, na zuih sawm lampi ah a muitun khin, a gualzo khin a tawmpen mikhat kisam hamtang hi. Nang sangin u zaw khat, nu ahkl pa, i zahtak le i etteh mikhat cihte kiang va hawh in amau te tawh kam kikum khawm in.

(iv) Na siamna khangsak semsem in

I nun sung sep ding i khentat ahi nasep kician (profession) khat aa dingin i siamna skill pen i khansak semsem ding (Building New Skill) kisam hi. Khentat (Decide) khin, Hun geelna (Timeframe) nei khin, Lam lak (guide) zong neikhin ihih leh a tawpna ah akisam thu in mimal hanciamna ahi hi. Siam (skill) semsem na ding kilamna zong ahi hi. Na hih theihzah thasitlo in hanciam in.

(v) Nunnem in

Nunnem, mikang pau in ‘Be flexible’ ci hi. Koi mun, koi mun ah na sep khat peuhpeuh pen a baih, a ol cih omlo hi. Khasum /khasim na sum ngah zong nidang sangin tawmzaw kha thei hi. Gim zong gimzaw kha thei ding hi teh. Hite hangin lungkia in ken semzo nawnkei ning ci’n na lungkiat sak le na geelna tangtunlo (career lost) kha ding hiteh.

Lungnop theih nading in om hi. Nuntakna pen ahoih lam tawh en den in. Theihsiam in. Lungduai in. Kuhkal inla thuakzawh hatna ding hahkat in.

I vekin nasep kician khat ta tawh a gualzo, a nuamsa hih ding lunggulhna tawh mashable.com le Yoyarlay a ki at laite Zolai in kong lekkhiat kik ahi hi. Nk Khanno Ref: Mashable.com