Nuntak khuasakna-a ding lungsim zatui nam 10 ~ Khat Thang

Nuntak khuasakna-a ding lungsim zatui nam 10 ~ Khat Thang

Na Lungkiat hun ciangin hih thu nam 10 in na tha hong dimkikin, maban na zop zawhna hi ta hen ci masa ni.

1. Mi dangte mai ah na om ciangin lampi khak pa/nu hi lo-in lampi hon sak pa/nu na hih ding hanciam in.

2. Gualzawhna pen a hun le a mun cihte tungah kinga lo hi. Na nasepna peuh ah midangte etteh tak ding le mite muan theih ding dong a na hanciam tawntung nak leh gualzawh na in hong taisan ngei lo ding hi.

3. Tuahsia lawmlawm sing ee ci-in guallel kisa in na om kha hiam? Tuahsia na kisakna, guallel na kisaknate tungtawn pan na ngah khak thu theihnate pen na mai lam a dingin gual zawhna hi gige hi. Lungkia het lo in, haksatnate phu velvel lel in.

4. Mite’ hong gensiat hong nehpik ding lau kha het kei in. Nang lungsim singtho lam nang le nang na kitel nak leh nasep ding zom toto lel in. Na lampi tungah hong hawk lawklawk ui khempeuh na buaipih khak leh na ngim na tupna tung zo lo ding hi teh.

5. Gu nei ganhing, Kii nei ganhing gilote le a sia a pha ngaihsut gina mel nei lo mihingte tawh kigam lat sawm in. Tuate pawl in, na khitui luanna ding bek piang sak lel dinguh hi.

6. Mi duhhop huaiham lua, thu khat peuh a um baih pahpah, mi hehpih lua baih kha pahpah cihte pawl na hih khak leh kidawm in. Tua bang mite pen leitungah khem a tuak mun pente a hi uh hi.

7. Na-ngim, na-tup bangin hong pian loh sim in, na-ut peuhin om gawp kha kei in. Mihing a na pian khiat nungsang, manpha tak mah in nuntak siam ding hanciam kikkik in.

8. Na nuntakna meivak a tangsak na hih nop leh piakkhiatna hanciam in. Ngahna ah lungdamna a om sam hang in, piakkhiatna ah lungdamna pen sawtvei kimang zawin lungnopna kician piang sak hi.

9. Nang nopsak na ding bek tawh midangte khitui luang sak kha het kei in. A hoih loh lam thei gigu napi, tawmvei nopsak na ding lunggulh manin na khat peuh nasep giap khak leh khantawn guh natna lungzin na suak kha thei ding hi. Kidawm in.

10. Na maitai sak in, nuih mai le cin, Gualzawhna ding, lungdamna dingin kahlei khat hong suak kha ding hi. Na dah hun, na lungkham hun na ngawn in maitai sak zo na hih leh mi picing tatak na hi ding hi.

“Lungkham sinkhamna, thusia lasiate tungah kinga kha ken, Pasian hong piak thu theih siamna, ngaihsut siamnate na nuntak na ki-uk sak den in.” “Intelligence over Emotions” Khat Thang