Numei khat Motorcycle in nawkpai in athawhma mawtaw in taihbehsuk in si

Numei khat Motorcycle in nawkpai in athawhma mawtaw in taihbehsuk in si

Malaysia, Kota Kinabalu State sung aom Jalan Sulaman kici lamzikpi tungah numei khatin lampi akan laitak in Motorcycle khatin nawkpaikha a, tuakhitciang mawtaw khatin atungpan taihsuk in sihlawh cih NST pan kiza hi.

Zanni Friday (Mar 10) nitaklam 8:45pm hunpawl in thupiang hi a, mawtaw inzong ataihkhak khitciangin Meter 50 (Pi 164) bang taalkaihgawp cisawnsawn hi. Tua numeinu minpen Karimah Musa Kantu kici a, kum 31 phakhin hi. Motorcycle ii phutpaihna, mawtaw in atungpan taihsukin taalkaihna te hangin apumpi leh alu limliam mahmah ahih manin, aphual mahah sipah hi.

District police Chief Assistant Commissioner M. Chandra ii genkhiatna ah hih numeinu pen lamzikpi akan laitak in Motorcycle in aphupai hi a, tuakhit ciangin Perodua Viva mawtaw in atungpan taihsuk cihi.

Tua Motorcycleist leh Perodua Viva Driver tepen anih un Tuaran panin State Capital Kota Kinabalu lam zuanin anawhtai mahmah laitak uh cihi.

Palik te muhkhiatna ah Motorcycle hawlpa in mawtaw anungpan amakhelhsawm laitak in numeinu lamkan laitaktawh kituakkha in aphupai hiding cihi.

Motorcycle in aphutpai ciangbektawh hileh bangmah sihlawh naliangding omlo himahleh atukna panin thokik mannailo in anungpan Perodua Viva mawtaw in taihsukkha, bekthamlo in Meter 50 bang taalkaihgawp ahih manin aphual ah sihpah kici hi.

Aluanghawm pen Queen Elizabeth Hospital ah Postmortem bawlding in kipuak pahhi.

Motorcycle hawlpa pen tawmkhat liamna ngahin Perodua Viva mawtaw hawlpa ahihleh bangmah liamna omlo cihi. Anih un kumpi thunei te’n thudotna neihpihding in kemphot uhhi.

More: Malaysia, Hang Tuah vengah Motorcycle 15 meitawh kihalsak

Adiakin Malaysia khuasung munkhempeuh phial ah Motorcycle zatkhuan kipiamawk ahih manin, mawtaw kikal khawngah utbangin taisak ziahziah uhhi. Khetawh lamkan te adingin lauhuai mahmah ahih manin, kidop siamding thupi mahmah hi. ZD Sawltak #zomidaily