Nuclear Plant a kizatna hang ~ Hau Za Cin

Nuclear Plant a kizatna hang ~ Hau Za Cin

Japan zinling hangin Fukushima munah Nuclear Plant kitam in radiation leakage hangin leitung in nuclear thu tampi bildawh tuam hi. Bang hangin Nuclear Plant kisam hi peuhmah hiam?

Tu laitak in leitungah nuclear power station 350 khawng kilam ding in a kivaihawm laitak hi. A kideihna bulpi pen meitui halna pan meikhu in huih niinsak ahih manin tua huihniin a omloh theihna dingin meikhu a piangsaklo nuclear power a kizang nuam ahi hi. A kibawl laitak pawlkhat kikhawlbawl a, dinkhawl hizaw, pawlkhat in bul pat pak nailo in Fukushima ah thupiang galet phot uh hi.

Banghangin mihing in ‘tha’ ahih kei leh ‘thaguipi’ (energy) kisam hiam? Tuhun khantohna ah tha omlo in nasep lianpipi kisem zo nawnlo hi. Meitha tawh kisem nasepna munpi te hangin mihing nuntakna tampi hong nuamtuam hi. Tha ngahna dingin huihnung, nizung, meitui, tuihual cihte kizang thei a, nuclear leh tuiluang (hydro power) zong kizang thei hi. Tha ngahna ding in huih niin saklo, tui niinsaklo, veng leh paam a buahbangsaklo kideih pen hi. Tua dingin Nuclear Power pen a hoihpen, tha lah tam a pia pen ahi hi.

Ahi zongin a lauhhuaipen zong hi kik leuleu hi.

Fukushima a thupiang hangin a kim a kianga teng khempeuh kisuankhia a, mehteh mehgah piang khempeuh zong radiation lut hangin kine ngamlo hi. Bawngnawi nangawn kidawn ngam nawnlo a, tuisik takpi zong kidawn theilo hi. Huih diik ding zong lauhhuai hong suakta a, nuntakna hamsa sak mahmah hi. Nuclear a kizatna dingah a kizat khak ciang a manphat mahmah hang a hilo lamah lehpai kha leh siatna lianpi piangsak hi.

Haksatna tampi pianga, nuntakna nangawn suplawh hi. Fukushima ah nasemte bang a innkuanpihte kiangah kam vaikhak uh a, “Cidama kong ciahkik kei uh leh zong gam leh nam adingin a kipia hi ung ciin na ciamteh un,” ciin radiation level tampi thuak in a kipumpiak uh hi. A khe vuah lut in, a pumpi uh zong a puansilh kek uh pan radiation lut kici a, ahi zongin a siahuaizaw dalna dingin sem giapgiap lel uh hi.

Fuskushima ah thupiang pen Japan Gal laia Hiroshima leh Nagasaki ah Atom Bomb kikhia Fat Boy zahin siahuai dingin a um pawl om uh hi. Ahih kei leh zong Chernobyl ah Nuclear Phualpi puakkham zah in siahuai dingin um uh hi. 1986 kuma USSR sunga Ukrain khuapi khat Chernobyl mun ah Nuclear Phualpi puakkham ah mi 43 bek si hi ciin kiciamteh mah leh (kumpi ciapteh), mipi upmawhna ah mihing 500,000 bang tuni dongin sikhin zo dingin ki um mawh hi. Tua laia radiation a nawkkha te cancer hangin a sipah tadinga kiummawh pen 30,000 bang pha hi.

Meitui leh meihol pan tha kingah mah leh meikhu in huih niin sak a, suangmeihol tawhna ah mi tampi in awmna (asthma) ngah in, suangkhuk cim hangin mi tampi si a, nuclear sangin lauhuaizaw hilo hiam ciin a kidot ciangin Japan ah anti-nuclear activist Mr. Yu Tanaka in “suangmeihol leh nuclear pen meitha ngahna dingin Japan adingin hoihlo hi” ci hi.

Tun leitungah nuclear accident thupi mahmah 4 kineita a:

• 1. Windscale, Britain, 1957;
• 2. Three Mile Island, USA, 1979;
• 3. Chernobyl, USSR, 1986;
• 4. Fukushima, Japan, 2011.

Gam khangto khinsa tampi in nuclear zatloh ding a deih uh hi. Gam khangto laitak pawlkhat in lah nuclear phualpi pan meitha ngah ding hanciam in hahkat uh hi. Tua lakah India zong kihel a, USA huhna tawh nuclear plant 3 bawl ding thukimzo uh hi. Tuma hun a nuclear accident te siathuaizia phawklo tawh kibang liang uh hi. Ei leh ei mankhawng kisiah tawh kibang hi. Mihing huaihamna leh a bei ngeilo behlapnopna lungsim hangin nuclear hanga thuakna zong a kipelh theilo suak hi.

Nuclear radiation pan a kingah khat bel – CANCER hi a, a kideihlo, deih veng aw ci-a mite awtsan nam hi mello cinatna khat ahi hi. Hau Za Cin (Phuitong Liim)