Nu leh Pa te leh tate kikal ah sumzat dan ~ Deih Tung

Nu leh Pa te leh tate kikal ah sumzat dan ~ Deih Tung

Nulehpa ih cih pen nuntak na nei husang khempeuh inki nei hi. A hi zong in tate a cing a kem, a vak, a hilh, a pan tah pen ei mi hing te leh ganhing tawmkhatte sung ah ki mu thei bek hi. Hih dan in nulehpa tavuan lak na hun pen a hun tawhkizui in ciangtan na khat a om pen a ngei na a hihi. Nu leh pa te leh tate ki kal ah khangtawn tung in tavuan a ki la pen mihing te bek hi ding in ka um hi.Innkuan sung ah sum zat dan dingtawm khat ih ki kumnuam hi. Hunsawt pi sung ki mang ding innkuan kikal thu a hih manin thukngaih sut kul in thupi hi. Nulehpa te leh tate ih om khop hun pen ahun in sai ding hi. Kum 12 nuai siah hun lai tak,Kum 18 phak lai tak, kum 18 pan 25 ki kal , kum 25 tung siah cih dan in ih khen thei dinghi.

Kum 12 kum nuai siah hun lai tak in apiang thei thu nam 2 in ki mu ding hi. Khat na ah tate it lua in neih loh pi pi sung pan neih sun suntawh tate deih bang bang lei sak, leh Nih na ah Sangkha zo,a annek ding vai hawmsak zo ka hih teh ka tavuan man hi cih in nam nih in ki mu hi. Sum leh paai nulehpa te in neih dan tawhzong ki sai ding inka um hi. Tanlang kah ding khat in nitak in moh man ding Kyats 500 pan 1000 ciang ciang ki lawm a ki tuak a hihi. A zen zen in sum ih piak zawh loh teh ihta te in sanginn ah mite moh neek eng gawp uh cih dan zong hoih tuan lohi. Nei hang ci in tam pi piakgawp na zong zongsat hoih lo khat hi a, pil vang huai hi. A zenzen in nata te sum cil dan ding na hilh leh nang zong cilzat in la na ta te muh na ah zop zat zuah zuah se dah in.

Sum hau nulehpa te in ih tate mohmanding sum ih piak a, ih piaksa sum pen azat zawh bei kei leh tua sum te pen bank ah khol kikleng sum met ki ngah in sum tam pi ki neih beh ding hi cih dan in pan tah thei leng zong sia lua lo ding hi. Bang hang hiam cih leh mihau te tate pawl khat sum tam pi nei uh a, migilo, guta tuam tuam in deih gawh uh a hih man in ih tate a dingin zong lungmuan huai lo a, lau huai zaw thei hi.Tua a hih manin tate khut sung ah (thu a ngaih sut theih ma uh)sumtam piak ding hoih lua lo zaw hi.

Ka inn veng vuah pawlpi upa sum kem khat a om hi. Tua pa in tapa khat leh tanu khat nei hi. A tate kiang ah pawlpi sum a kep pen a tate lak in hih pen Pasian sum a hih man in khoih zong khoih kha lo ding, hi lai ah na moh man ding uhhong koih sak ing, ci in a sum koih na mun khat sung ah koih khawm hi. A pa un a tate sum zat ding leh zat vet loh ding hilh a hih man in Pawlpi sum pen a tate in nengzong lawngngam lo pah uh hi. Bang hang hiam cih leh Pasian sum na lak vua, na guuk uh leh Pasian in hong tawsat ding a, na ci uh na ding hi ci a hih man in a tate in sum la ngam lo uhhi. A tate a ci uh a nat ciang bang in a pa un thusit a, Pasian sum la na hiam ? Sum na guuk man uh hi ding hi ci in thu sit lai hi. Hih ka cih nop na in nu leh pa te in zong tate sum zat dan hilh ding ki sam ka sak na a hi hi.

Tate pen kum 12 pan kum 18 ki kal pen a kep hak lai tak uh a hihi. Naupang dan in lah thu ki hilh thei den sam lo, ulian tadan in lah tavuan ki pia thei tuan nai lo in a buai huai mah mah lai tak a hihi. Hoih nuam,ki puah nuam, ki phasak nuam, ki lian sak nuam, mai zum thei, ki nungak sak, kitangval sak, sangkah na ah lah pil na maban thu pi mahmah lai tak a hih man in nulehpa te in tate pen pattah khialh loh ding a thu pit mahmah lai tak a hihi. Hih hun sungin Nuleh pa te leh tate a ki dem mah mah lai tak a hihi.

Ka zakngei thu khat hong genleng, inn kuan khat in ata pa uh tan 10 a kah kum in a ta pa in iphone khat ngen in, tua khit teh bawda hoih mahmah na ah kha 1 tein 6 bei in om hi. Nu leh pa te in sum na neih na uh pen ka thei hi. A hi zong in ih tate a ding in a pilna uh, a mailam ding uh a susia ding phone khat lei sak mawk leng lai simman nawn lo in a phone tawh a buai ding lam tak zong theih khol sa hi a, lai a zawh loh ding lam ih theih sa a hihi. Birthday hong tun ciang a lawm te tawh Hotel minthang khat ah va bawl uh a, tein 15 bei hi. Hih kum pen tein 15 bei a hih man in a mai kum a ding in tein 25 ki gin toh hongkul mawk ding hi.

Hih dan buaina tuamtuam te pen ih siang sak na ding in ol no khat a hihi.Nu leh pa te in zong ko sumka neih man un ka ut na na ah koih thei ung, a deih deih lei sak zo ung cih lamin hi lo zaw ding hi. Tate in zong ka nute in hih zah bek hongpia uh ka lawmte in tuazah tuazah zanghzo uh a, cih lam in engkhak ding hi lo hi. Sumleh paai vai ah innkuan sung sum lut tawh kisai in zat ding a hihi. Innkuan sung ah sumlut 100 a om leh mailam nuntak na ding a ding in 25, inn a vanzat nek leh dawn 50, piak khiat na 10, sum khol ding 10, a tuam tuama zat ding 5 cih bang hi leh innkuan sung sum lut lakpan ei zat bek bek 25 bang a hih mawk leh tate in ngaih sut phat huai kha ding hi. Tua 25 sung lak ah Tuition kahna, sangsap, lai bu man, lam sap teng a hih leh bel bei tak mah hi, a hizongin Phone sum ding, lawm leh gual tawh nop zat na ding khawng a hih leh ngaih sut phat huai hi.

Tanlang lai in mohmanin nikhat 500 pan 1000 khat na piak a, a deih deih uhna lei sak pen na tate ki siat ding a dah lo na hihi.Laisim ki gim lua in kalawm te tawh vak pak ning ci in nitak khat 2000 bang a bei leh asawt nateh na inn kuan sung sum lut 90% bang na tate in hong zangh to dinguhcih lung hi mawh khol in la theih kholhhuai hi.

A kipat tungpek,tate neu lai pek pan in tate tawh ki dem bawllo in thu ki kup tang tang ding thu pi hi. Tu kum a ding in bang kisam hang a, na sang kah na ding in sum tuazah bei leh inn van dingin bang lei ding ih hiam? Koi cih ding ih hiam cihkikup ding thu pihi. Tua dan in na inn kuan un na ki thu min tak uh teh tate inn zong innkuan ngim na hong thei ding uh a, sum deih bang bang hong zangh ngam nawn lo ding uh hi. Sum leh paai sang in nuleh pa te thu pi sa zaw ding in na nate pan tah in, sum aom loh hang nulehpa a om nak leh a lung nuamthei ding in na tate pan tah in. Pawl khat mihau te tate in a pate uh a it na, ahang pen sum a piak zawh man zong na hi thei hi.

Tate in zong sum nget ding bek, nulehpa mawh sak ding bek theih ding hi lo a, innkuan sung haksat na zong theih ding ki sam hi. Azenzen in nulehpa te in dam loh khat tuak insum a zon theih kei zen zen uh leh sum ih zon theih na ding in tate zong hanciam in ki ginkholh huai hi.

Kum 18 pan in kum 25 ki kal pen pawl khat te in zilehta nei ta uh a, pawl khat te lawmngaih nei in pawl khat te sang kahlai hi. Kumtam to to leh sepna, sin na vai ki hauto to a hih manin sum tampi tak ki sam hi. Hih hun sung in zong a mau leh amau in koi ci kal suan ding cih deih pha tak in hilh ding hun a hi lai hi. Tate in zong in nulehpa te pan pih theih zah in pan pih kik ding hun a hihi.

Nasep na khat peuhpeuh ah tate in a sep ciang inzong a sum ngah te uh nulehpa te a ap om a,a ap lo zong om hi. Pawl khat te in ap lah ap lo, ngenlah ngen lo in siang om uh hi. Pawl khat te leu leu pen a apsang in a tamzaw ngenkik thei a hih man in tate in zong theih huai hi. Innkuan tawhna om khit teh zong nulehpa te panpih in, na huhzawh kei leh zong nulehpa te buaisak se dah in.Tate gamdang pai na dingin innzuak in kipai sak a, gamdang pan hong ciah ciang zinei in nulehpa ennawn lo cih dan zong tampi ih omkhin a, hih bang thu te pen thu hoih hi lo hi.

Kum tam khit teh pawl khatte a mauleh amau in dingtang zo uh a, pawl khat te leu leuin kum tam khit dong nuleh pa te neihsa mah a nene a om hi. A hi zong na nu leh na pa asih ciang a lung nop na ding in nang leh nang na ki vak zawh na ding inhanciam in. Pawlkhat te a nuleh pa sang in tate hau zaw a, ta te in nulehpa a en kik lo tampi om hi.Pawl khat te leu leu tate in zi nei,pasal nei in zawng uh a, nulehpa te’n a etnawn loh zong a om hi. A hi zong in hih mun ah leitunga ih nuntak sung teng zi ih nei a, inn dang ah in om zong in ih nu leh ih pa, tate ki kal ah it na neih det ding thu pi ka sa hi.

Nuleh pa te leh tate ki kal ah sum zat dan pen leitungbei dong in omden ding a hih man in ngaih sut huai ka sa mah mah hi. Deih Tung