Na nu in hong dampih nawn lo ahih manin, nute ni a kibawl simin lungzuang khua ngai-in na om kha mah ding hi. Bang bang ahi zongin, lungkia thanem kei in. Topa’n, tagah bangin kong nusia ngei kei ding ci hi. Topa’ bekmah muan leh suanin nei-in la, Topa’ tung bekmah na lametpen hi sak den in. Na nuntak buppi Topa’n tavuan hong la lel ding hi.
Na nu in hong dampih nawn lo ahih manin, nute a ki pahtawi simin, nang zong pahtawi nuam napi-in na pahtawi ding hong om lo dinga, na khasia-in na tha hong nem kha ding hi. Tua bang hun ciangin, na nu munah adingg khatpeuhpeuh (Pasian leh mi dang khatpeuh zong hi thei) om kha ding ahih manin, tua pen mah lungkim sakin pahtawi siam in. Na ngah dinga kilawm nute’ thupha zah mah ngah veve lel ding hi teh.
Na nu in hong dampih nawn kei leh, nute’ thu aki gen simin na gen ding zong om loin, na lungsim tam kha thei ding hi. Bang bang hi leh na nu om nawn ta kei leh, tuni ciang dong hong nusia loin, hong ompih den Topa’ hoihna gengen lel in. Tua in meigong tagah hong tangsak lo dinga, a niampen mun panin, a sangpen mun dongah hong tunpih ding hi.
Na nu a dam nawn loh hangin, eite biak Pasian dam mahmah a, na nu a om nawn loh hangin eite’ biak Pasian in hong ompih den hi. Na nu’n hong nusiat khit hangin, Topa’n hong nusia ngei lo a, na nu’ om nawn lohna hangin na thanem hangin, Topa thahat in vanglian hi. 
Lungkia thanem kei in. Topa’n na nu’ mun bek hi lo, na innkuan buppi mun vuah mun hong la dinga, thupha na san’ hun hong tung veve ding hi.
Na nu a dam nawn loh zenzen hangin, na nu in mihoih, mi manpha khat na suah ding leh lawhcing daupai-in mi nuamsa na suah ding hong deih tawntung ahihna phawk gige in la, siatna peelin Topa’ deihna lam zuih sawm den zaw in. Tua bang hi lecin na nu pen a omna kiu khat panin lungkim/lungdam mahmah dinga, Topa zong lungdamin thupha na ngah ding hi.
Na nu a om nawn loh hangin, na nu’ hong itna, hong deihsaknate leh ama nuntakna sungah ama nasep hoih pawlkhatte genkikkik lecin, tua zong na nu na itna na lahna khat hi gige hi. Nu adam nawn lote’ tungah Topa’n a lamdang lungnop tawldamna thupha hong pia ta hen. Amen.
Nu in hong dampih nawn lohte tungah, itna leh dahpihna tak tawh hong hanthawnin tha hong pia nuam ing ci-in,
Khazih sungah,
David Tuang
Comment piaknop aomleh...