Notre Dame meikatna le Christian upna ~ Peter Suumpi

Notre Dame meikatna le Christian upna ~ Peter Suumpi

Notre dame Cathedral mei akat pen kal nih phakhin ta hi. Tua Cathedral pen kum 800 val phakhin in khang tangthu tampi nawk kha hi. Alam kipat le akizawh siang hun kikal AD 1200 kum sung in British le French te kum 100 sung gal akido hun zong nawk kha hi. French te pen nidang in Gaul minam te kici ngei hi. Gaul minam cih pen Latin pau in aklui cihna ahi hi. Aklui cih pen Christian biakna lam pan en leng thum vei vilvel Topa Jesu anial Peter akhanglosak aklui ciaptehna kici thei hi. Tua hi aa meikang Notre dame Cathedral biakinn dawn sang ah aklui lim atuang ahi hi.

France gam pen kum zalom 20 kipat hun lam in France kumpi in biakna le gamvai khenna thukhun hang in hih Cathedral pen French kumpi in hong la hi. Tu aa meikang Notre dame Cathedral pen Catholic Pawlpi aa cihsang in French kumpi aa hizaw kici thei hi. France gam in French revolution hang in Christian biakna among dong in anawlkhin gam hi kici thei hi.

France gam pen biakna vai asang kilkel lo Secularism (Leitung vai bek tawh kisai) akiplet penpen gam zong kici thei hi. Kum zalom 20 khit pan French kumpi in leitung vai bek ahi (Secularism) pen khangthak pilna sinna lam ah deihtak in hong guang ahihman in French te pen apu apa uh Catholic thuzui ahih uh hang in abeisa kum 10 hunte sung in Christian ngeina le upna te nusia in biakna neilo in hong om uh hi. France gam ah Catholic upna pen alung hihmawh huai zah dong in kiam hi.

French te tangthu en ni cileng Christian upna khauhpai te ahihngei lam uh kimu thei hi. French te in Christian upna pen Pope pa ii Christian missionary te tung pan aluahsuk uh ahi hi. Islamic galkap te in AD 700 pan AD 800 hun sung in middle east, Africa leilu lam le Spain tuikulh te galdo in la uh hi. Spain Christian te pen Islamic galkap ukna nuai ah kum 1000 kim bang om uh hi.

Rome nisuahna Byzantine empire aa om Egypt leilu lam mipil te ii panpihna hang in Islamic galkap zalian te in science pilna gahte na ciamkha masa uh ahihman in thahat kisa uh hi. Tua pan kipan Islamic galkap te pen Spain pan France gam ah hong lut uh hi. Tua Islamic galkap te pen French te in ‘Battle of Tours’ ci in Islamic galkap te tung ah galzawhna na la uh hi. Tua lai in gal lel uh hizen leh tu laitak Rome gam aa Vatican zong aom zolo ding hi ci uh hi.

Tua bang in French te pen Christian upna ana kembit te na hi uh hi. France gam ii Paris khuapi pen French Catholic pawlpi le pawlpi ii aminthang Paris University le Notre dame te hang in athupi pen Christian te phualpi khat hong suak hi. British – French kum 100 gal sung in France gam la ding aa hong pai agal zo deudeu British galkap te pen hong khawl hiau hi. France gam pan kum 15 apha Joan of Arc akici French numei no khat in Pasian piak mangmuhna tawh French galkap te maikaih in athahat mahmah British galkap te tung ah galzawhna hong la uh hi.

British te laksa leitang te zong hong lakik zo uh hi. Ahizong in kamsia tawh Joan of Arc pen British kumpi in man in meihalna tawh that lum hi. Tu hun in amah pen Saint Joan of Arc ci in mite in ciamteh in France gam aading athupi pen nihna misiangtho khat in ciamteh uh hi. Ama ii huhna kepna te zong French te in phawk tawntung uh hi.

French revolution hang in Christian langpanna lungsim te hong thahat semsem in Napoleon hun pan kipan Catholic muhdahna khaici hong om hi. Kum zalom 20 khit pan in French Christian upna hong kiam hut-hut hi. AD 1960 – 1965 kum sung aa kibawl Second Vatican Council khit pan kipan kum 1000 val bang akizang khin missa biakpiak dan pen hong kikhel hi. Missa tau le siampi te in singlamteh lam nga in mipi te nung angatsan ngeina pen Second Vatican Council khit teh siampi te le missa tau pen mipi lam ngat in hong kilaih hi.

France Cathedral meikatna pen khiatna tuamtuam in kikhia hi. Missa bawlna tau athak(Vatican II na khit akizang) pen biakinn dawn aa azum kiasuk in kha in kisia zan hi. Kum 1000 bang akizang khin missa bawlna tau lui zaw pen kisia lo hi. Tua pen aomsa ngeina bang in nidang aalizang missa biakpiak zia pen Pasian in deih zaw hiding hi aci zong om hi.

April 16, 2019 ni meikatna hang in Notre dame Cathedral pi ii tungkhuh pen nai khat sung in kisai khin hi. Hih meikatna pen mite in amawk kat hilo ding hi cih upmawhna nei uh hi. Kum 300 val aham tawsaw sing (Oak tree) tawh akibawl innkhum zawl te pen mei sa mahmah sikpehna te tawh minute 5 sung ih hal zong akangpak lo singgil te ahi hi. Meikat kipat tun in mei kilawh zia pen mi tampi upmawh bang in huih nunna lam biakinn kongkhak lam hilo in dak kikoihna tau lam ah leh pai se hi. Inn lam nasem te a ciahgaih khit uh ciang mei akang hi akicih zong uplahna tampi om veve hi.

Bitna nasia tak in akikoih hang in Cathedral meikat pen kiphawk pah lian lo se hi. Meikat laitak meiphelh te hong tunma in Cathedral asanna mun lam ah kua mah omlo hi akicih hang in thuthang kigenna channel khat ah mikhat biakinn tau dawn ah akileh kimu hi. Notre dame Cathedral mei akat ma kha khat lai in France gam sung ah Christian biakinn 10 kang khin hi. Hih te tawh kizom kha ding hi ci in agen zong om hi. French kumpi in zong Notre dame Cathedral meikatna thubulpi pen thukin in kan ding agen loh mah bangin meikat zawh kal nih ciangciang kumpi lam pan ahang pen hibang hi cihna khat bek zong om nailo hi.

Mei nasia tak in akat hangin kamphatna tawh biakinn ii mansi tawlet 3 kisia lo in aminthang Organ pi zong tawmcik bek kisia hi. Amanpha biak piakna vangil te pen ahun lap in kihemkhia man hi. Missa biak piakna tau athak bek siazan hi. Tu aa bang aa Notre dame Cathedral meikatna pen kum zalom tampi apha khin Christian te tangthu, akikhem khapna (ahl) kisiatna pen Pasian in hong awilohna kilatna hi zong kici thei hi.

Notre dame Cathedral meikatna en in akhasia French mivak te en leng amau tanglai vangil te hang aa khasia hilo zaw in kum 2000 val Christian upna kisia ta hi cih bang in ngaihsun zaw ding uh hi. Aman tak in cileng Notre dame Cathedral pen hih bang lian in akilam kik zawh ding hang in French te upna atha nem lai leh tua akilam kik ding French biakinn pi in zong khiatna hong nei tuanlo kha ding hi.

Ahizong in ngeina athupi sak Traditionalist Catholic te ahihleh atawntung in thasan uh hi. Khangno tampi tak akihel Traditionalist Catholic te pen French gam vai ah akihel mite hi aa mailam ah France gam aading kumpi ulian muan le suan asuak zo ding te ahi uh hi. Akhangno lai French Catholic bishop te zong French te ngeina nasepna te ah thalawp tak in kihel uh hi. Biakna neilo French tampi te Christian hong suah kik nading in thungetna tawh ih hanciam ding hi.

Notre dame hang in Christian upna hong lann kik nading, christian upna sung ah ciahkik nading sapna hi cih tel theih nading hanciam ding ahi hi. Christian upna pen ngimna tak tawh hong ki do hi cih pen Notre dame Cathedral meikat zawh kal khat khit ciang Sri Lanka bomb puakkhapna hang in ih mu milmial thei ding hi. Tua ahihman in ih upna te ah ih kip nading leh ih upna te ih kepbit theih nading lungsim te ih kisam hi. Lailet: Peter Suumpi