North Korea Leader Kim Jong-un ii sanggampa Malaysia ah kithat

North Korea Leader Kim Jong-un ii sanggampa Malaysia ah kithat

Malaysia Kuala Lumpur International Airport 2 (KLIA 2) sungah Monday ni in mikhat kisuamlum “Assassination” a, Malaysia Police te genna ah tua aki suamlumpen North Korean pasal khat hi cihciangbek genkhia masa uhhi. Sepang District panin Police Chief Abdul Aziz ii genkhiat masakna ah amipen kuacih ki kancian nailo cihi.

Ahi zongin tua asipa pen North Korea gammi Kim Jong-nam kicipa hi a, tulaitak North Korea Leader Kim Jong-un ii sanggampa hi cih Malaysian Police te’n gencianna neikhiata uhhi. Selangor CID Chief Senior Asst Comm Fadzil Ahmat in agenna ah hihpa pen Monday ni zingsanglam 9am hunpawl in Kuala Lumpur International Airport 2 (KLIA2) vanlengtual ah Macau zuandingin apai cihi.

Vanleng ngakin aomlaitak anunglam panin mikhatin lenin kamai tui “Liquid” hongbuak hi ci’n Kim Jong-nam in Departure Hall aom Receptionist khatkiang ah genin huhna ngenhi. Tuaciangin Airport’s Clinic ah kipuak a, tuahun laitak in alutang nasamahmah cihi.

Airport’s Clinic panin Putrajaya Hospital ah puakdingin apailaitak in siziau hi. Aluanghawm pen North Korean Embassy panin ngetna hongbawlkhin uh ci’n palik te’n genkhia a, ahi zongin hihthu kancianna amansiang mateng in aluanghawm kipialoding cihi.

Aluanghawm kheina Post-mortem pen tuni Wednesday (Feb 15) ni in kibawlding cih kiza hi. Hihpa pen Malaysia gamsung ah February 06 nipek in atungkhin hiding in ki ummawh a, Malaysia aomsungteng agamtatna munteng leh aki thuahpihteng palik te’n akankhiatsan laitak uh ahihi.

KL Airport ah asuamlum “assassination” abawlpen numeinih hiding in ki ummawh hi. South Korea’s TV Chosun ii genkhiatna ah Kim Jong-nam pen KLIA2 ah numei 2 in suamlum uh a, tua numei tepen North Korean Operatives te hiding in ki ummawh hi ci’n genkhia hi.

Kim Jong-nam pen ama Uncle khat ahi Jang Song Thaek acihpa tawh kilimthuah mahmah uh kici hi. Tua Jang Song Thaek pen North Korea ah athuneipen nihna in aki ciamteh hi a, ahi zongin 2013 kumin tulaitak North Korea Leader Kim Jong-un ii sawlnatawh ki thatlum mawk hi.

2011 kum inzong Macau khuasung ah North Korean Spies te’n Kim Jong-nam thahlupsawm ngei uhhi ci’n Media te’n genkhia ngei uhhi.

Kim Jong-nam pen 10 May 1971 in asuak hi a, kum 46 khawngbek hipan hi. North Korea Leader Kim Jong-il ii tapa nih aneih lakah amahpen a upapen ahihi. Anaupa pen tualaitak in North Korea makaipi asem ahi Kim Jong-un ahihi. Apa uh asih ciangin anaupa in apaza luahto hi. Ataktak in Kim Jong-un tawh apa uh akibat hangin, anu uh kibanglo “Half-brother” acihte ahi uhhi.

Kim Jong-nam pen 2001 kumin Japan gamah Passport atuh “Fake Passport” tawh lutsawm ahih manin kiman hi. Japan gamsung aom Tokyo Disneyland ahawhsawm cihi. Hih agamtatna hangin apa maizum hehsuak ahih manin anaupa innluahza apiazaw hiding kici hi. 2011 kumin apa asih ciangin anaupa Kim Jong-un in North Korea gam amakaihto ahihi.

Kim Jong-nam pen Macau khuapi sungah tam omzaw kici a, zipi 2 leh zineu khat nei kici hi. Macau leh Beijing khuapi te ah ta tampi nei kici hi.

Macau leh Beijing banah Singapore ahzong omzel kici a, Singapore ahzong lawmngaih khat neiding in kigen hi.

Austria leh France gamte ahzong zato vai “Medical Reasons” tawh zintheizel kici hi. Malaysia gamsung ah banghangin azin hidinghiam cihpen kitheician nailo hi. ZD Sawltak #zomidaily