Nongsang Zodia? ~ Rev. Fr. Damian Dal

Nongsang Zodia?

Itna in atawntung abeithei lo lungnopna, tuiduh bangin duhin, dangtaak tawntunga, akisia theilo kizopna, kimawhsakna omlo kitelsiamna, leh atawntung kipumkhatna lam manawh in hanciam tawntung hi. It na ii kahna aw avengsak theiding mi ihzonga, leitungah muhhak ihsa mahmah hi. Itna in ama omnading munzongin, amuhloh ciangin, khuva bangin thumin, lawktaa bangin tau a, ahehnem zoding kuamah mulo hi. Itna anei mi in, a itmi zongin, amuhdong in lungkia lo hi. Tua hi in, itna in a itmi adingin, natna haksatna, supna leh baaina te athuakhangin lungkim tawntungin, ama neih itna in, gentheihnate tungah agualzosak vangliatna hongsuak hi. Itna in muhdahna te thuaktentan in, telkhialh nate sangsiama, etkhialhna te muhsiam hi. Itna in a itmite adingin kiniamkhiat natawh nasemin, kampau a, nungta tawntung ahih manin, etneu na, simmawhna, kosiatna leh pampaihna te thuakzelzel hi. Amah in nemngiingeai in om ahih manin, bangzahciang dongin tua itna thupi hiam cihthu itna neite bekmah in telzo in, thupisa hi. Itna in a itnu a itpa’ lungtangsung bekah khawlmunnuam zongin, amuh mateng tawlngalo in, zongtawntung hi. Ahi zongin atawntung in, munkhempeuh ah amah munkipia lo in, amah in konggei ah ngakin, kongkhak kiu tawntung hi. Cikciang kong honghonding hiam ci in, lametna tawh ngaktawntunga, konggei ah dingden ahihman in, mite in amah ahai sa uhhi. Ahi zongin, konggei ah dingin, konghong kiuden itna pen, konghon in khawlmun nuam apia kha mite ahih leh etin lawmin, nunnuam damtui dawn uhhi.

Itna in sihna sangin vanglian zawa, zong thahat zaw hi. Sihna in itna susia zolo in, tua itna khau pen sattat zolo hi. Tua thu hangin, itna neite kisih pih in, itna nei taktak te in, a itmi te adingun anuntakna uh piakhia in, itna lakkhia uhhi. Hihthu hangin, itna in abeitheilo kizopna hongsuak in, tua kizopna in nuntakna tui ahihi. Hih nuntakna tuipen itna pan hongluangkhia ahih manin, itna pen nuntakna tuinak ci in, pahtawina kammal tawh ihmin lawhhi. Itna nei pa/nu in, a itnu/pa kiangah kanuntakna nang ading kongpia hi, ci in hangtak in kiciam ngam hi(Kiteenna kamciampiakna). Itna in a itnu a itpa a dingin, anuntakna piakhia ngam ahih leh, tua itna in a itnu a itpa adingin nuntakna tui hongsuakta hi. Tua hi in, hongit ing cina pi-in, nuntakna dingthu, nuntaknop nadingthu, nuntak khopna dingthute genlo in, gello in, ngaihsunlo in, kamkumlo in, semlo in, bawllo in, kinlo in, ama aituam bek angaihsun, ama duhbek ne in dawnin, a ma utbek semin bawlin, ama utna pai-in vaka, ama utut in omlel leh tua in itna thuman thutak tawh kileh bulh ahihman in kilemlohna, kisiatna, kitotkisel na, kikhenkhapna piangsak hi.

Tate ka it hi cina pi in, tate sangsumding sangin, Khaingni, Kunpawng cihte leiding akinzaw, zuhai tawiding amasak zaw, zatep ding athupi sakzaw mitampi omthei hi. Mikhat in atanu sangsum ding, kha khat 1000kyat piakding piazo lo in, atanu sangkhawlsak hi. Ahizong in kalkhat in zuthawlnih ciang manman dawn a, zuthawlkhat ciang zanga (500 Kyat) man ahih manin, kalkhat in 1000 (tulkhat) manman zangzo bilbel hi. Tua mi in, atanu ka it hi, kasihpih ngamding hi, hongci leh kua in umngam ding ihhiam? Itna in nuntak na tui hi in, nuntakna apicingsak ding nasepna, kidekna, kipiakkhiatna, kihuhna, kimakaihna, kiho siamna, kamkhum zattheihna te khempeuh itna cihkammal sungah u nau te ahihi. Tua hi in, itna in kidekzawhna, itna in supngamna, itna in natngamna, itna in paingam ciahngamna, itna in ankuang uumkhawm ngamna, itna in hawmsiamna, itna in sihngamna hongpiak matengin, itna in eite lungtangsungah munngah lo ahihnathu hongphawk sak hi.

“Note kongit mahbangin, note khat leh khat na ki-it un” ci a, hongvaikhak Topa in, a itmi te adingin natna thuakhi, satna thuakhi, kosiatna thuakhi, simmawhna thuakhi, gensiatna leh cilphilhna thuak hi, anunung ciangin thahna thuakhi. Ahizongin itna in sihnasangin vanglianzaw a, sihna in itna zozo ngeilo ahih manin, itna nei Nazareth khuami Jesu in hansungpan hongtho kik in, eite honpa le Topa cihna za hongngah hi (cf Philipians 2:6-11). Pasian in ki-it na hi a (1Jn 4:8,16), itna aneite Topa sungah nungta dinghi. Hibang itna tawh hongit ing, “nongsangzo dinghiam” hongki ci leh….?

Rev Fr Damian Dal