Nih om… etcian masak kisam ~ Pau Khat Suan

Nih om… etcian masak kisam ~ Pau Khat Suan

Kipawlna thakthak, pawlpi thakthak leh maban thakthak a piangsak, a phuankhia thu nam nih (2) om a…. Pilna leh Haina ahi hi. Pilna tawh a kiphuan kipawlna leh pawlpi om a, haina (or) haiman a kiphuan kipawlna leh pawlpi zong om hi.

Pilna tawh kipankhia maban om a, haina (or) haiman a kipankhia maban zong om hi.

Pilna tawh kiphuan khia kipawlna leh pawlpi peuhmah ah pilna ki thupi ngaihsut ahihman in mipilte mah in ong pakta, ong bawm, ong phungvuh pah uh a, Haina tawh kiphuankhia kipawlna leh pawlpi peuhmah ah pilna ki thupi ngaihsut lo in, haina kipahtawi ahihman in a haiteng mah in nuam ongsa uh a, mipilte in tuamun nusia uh hi.

Pilna tawh kipankhia maban peuhmah ngaihsutna, geelna, kikupna tawh pankhop masawnna cihte ki thupi ngaihsut a ngim le tup kician ahihman in mipilte mah ong innteek thei pah uh hi.

Haina tawh kipankhia maban peuhmah kikupna, geelna tawh vaihawm maphutna cihbang omlo, na khempeuh ahun zui a bingphut leh mi nungdelh, khuahun nungdelh in buailel a, mipi ngaihsutna leh pankhopna sang makai khat le nih ii gen bangbang cih bangbang ah kizui palpal lel in, nungzuite in tua makaite pumgup a mapanna vive ahihman in mipil thu ngaihsunte tuamun utlo in, thu tampi a theilo a, zong a ngaihsun mello lelte bek mah tuamun ah ong innteek pah uh hi.

Na omna nakiim napaam khuadak in limtak enpha kik hi leteh na omna pen hih thu nihte’ “Pilna maw? Haina?” khatzaw sangsang tung ah kinga lel ding hi. Nang tawh a kituaklo mun a omkha nahih leh kihem ziau leteh na omdan ong nuampah ding hi.

Tawmvei nuntak sung hih nihte limtak encian masa a, mailam phu a kalsuan ding hoih hi. Pau Khat Suan