Ni Thupi Ni 50, kum 50

Zomite sungah kum 50 khatvei kialpi tung den hi kici hi. Tua kialpi
pen Mautam kum zong kici hi. Israel minamte sungah kum 49 sung lokho,
nasem in na om ding uh a, kum 50 a cin kum pen na gamsung uh ah kua
mah in lokho lo in, na gam uh na tawlnga sak ding uh hi ci in, Mosi
thukham sungah ki gelh hi. Tuni a Pentecost Day icih pen “Paisan Pawi”
pan a kisimto ni 50 cinni a cihna a hihi.

Vantung lut nang Tawhtang apna

Zeisu in, “Vantung ki-ukna sung lut nading tawhtangte, nangma tungah
ka hong pia ding a, hih leitungah hoih lo na cihte, vantungah zong a
hoih lo hi ding a, hih leitungah hoih hi na cihte, vantungah zong a
hoih hi ding hi, a ci hi, Matthai 16:19 sungah ki gelh hi.

Pawlpi din nang gen

Tawhtang a ap ma deuh in, Matthai 16:18 Ken kong genin-ah: Nang pen
suangneu a cihnopna Peter na hi hi. Hih suangpi tungah ka pawlpi ka
lam ding a, sihna nangawn in zo zo ngei lo ding hi cih ki mu thei hi.
Ka pawlpi ka lam ding ci hi. Tua pawlpi bang ni-in ki phut hiam?
Pentecostal Day ni-in ki phut ding hi. Sawltak 2 sungah ki mu thei
hi.

Pentecost pawi kibawl madeuh thupiang

Pentecost pawi kibawl madeuh zingtung (before 9am) hun in, Zeisu a um
mi 120 te kikhopna Makunu Inndei tungnung a thungetna uh dim zihziah
in Khasiangtho hong ki buasuk a, a sung a thungen khempeuh Khasiangtho
tawh kidim hi. Jerusalem khuapi sung a om mipite in a mau ngeina
Pentecost pawibawl hun kipat ma a hih man in, mipite in pawibawl lozaw
in, tua Khasiangtho kibuakna thu a muh uh ciang in, lamdang sa mahmah
uh a, pawisim ding a gam 9 pan in hong pai mite in, hih mite pen
zukham hi kha ding hi ci uh hi. Ahizong in, Sawltak Piter in hangsan
takin hong dingto a, adang sawltakte in zong dinpih to hi, cih ih mu
hi. Kote in zu ka kham kei uh hi, zingtung nai 9 in kuamah in zu ih
kham ngeikei hi. Kamsang Joel in a genkholhsa “ni tawpni ciangin ka
Kha kabua ding hi” cih a tangtung a hihi ci in, hangsan takin na
tangko khia hi.

Peter in Tawhtang hong zanghta

Peter in Pentecostal Ni-in mi tulthum (3000) Zeisu min tawh Tuiphum
hi. Kha Siangtho ngah, Kamtuam pau uhhi. Hihte pen Lai Siangtho sungah
om kim hi. Ih Tawhtang Zeisu min hi veh aw sanggam. Dr. J.M.Pau
thugenna sung khat ah Billy Graham in, “Zeisu min tawh tagah te kemni
ahih hang Zeisu min tawh thupizaw hi. Zeisu mintawh i kep tak ciangin
kempai suakzo bek ding hihang. Zeisu min tawh puansilh sakni, ama min
tawh i silhsak manin kemzo bek ding hihang”, acih thupisa mahmah ing.
Zeisu ki um ciat ee, ki muang ciat ee ahi zongin ama thupia a
zuinuamlo a Thupha bek ki limgen kha zel hi.

Nung zuite in Jerusalem bek ah pan munhong la lo in, (Acts
2:38-41)Samaria khua hong tungin Zeisu Khris min mah zangin Tuiphum uh
hi. (Acts 8:12-17) Tua lai pan Gentailte kiang hong tung a, Zeisu min
mah hong zang leuleu uh hi. ( Acts 10:1,3,44-48). Tua lai pan Ephesus
khua hong tung uh a, Zeisu min na zang leuleu hi. ( Acts 19:1-6). Hih
thu pen Pawlpi khat bek, mimal khat bek ki pia zanzan kha thei hi.
Leitung mi khempeuh Zeisu aum a sangte ading hi khin hi.