Ngilhmawh ding Zomi Nam Ni, Tulsa (20 Feb 2017)

Ngilhmawh ding Zomi Nam Ni, Tulsa (20 Feb 2017)

ZOMI NAM NI, TULSA pen 6:00-10:00 PM hunsung, The Other Side Event Center ah thupitak leh nopcitakin kibawlzo hi. Gampua ah ZOMI alom teenna leh atam penna ah ZIUSA &ZIOK makaite’deihsakna tawh ZOMI mipi tulval mai ah minamvai leh gamvai gentheihna ka ngahkhak manin, aangtang leh manpha sa mahmah ing. Tanu semte zong kizen thei mahmah uh aa hun-uk te zong kician mahmah uh ahih manin nitak 9:00PM hunin pawipi kimansiang ziau hi.

Thugente leh lasate zong abaihsa in om lianlianin munla pahpah uh aa ahi nemnum cih peuh mah omlo hi. ZIOK makaite leh tanu semte vaihawmsiam (management) luatna ahihi. Mipi zong hall dimleetin maitai siusiau leh lawptakin khutbeeng ziahziah uh aa i minam ni aangtangtak kimuak ziahziah hi.

Laamlak (dancer group) te leh lasate in zong i Zomi ngeina late leh minam itna gam ngaihnate lungsim takpi tawh hong sak ngeungeu mawk uh pen ilungsim hong sukha lua mahmah ahih manin, abeisa ah akhangkhang ZOMI makaite leh gam-le-lei ading amapang leh anuntakna apiakhia ZOMI salphate hong phawksakin khitui bang aluang himai hi.

ZOMI te minam itzia leh minam ah khanlawhna pen kuamata khamzawh ding hinawnlo imailam asawtloin alamdang zingnithak hong suak ding hua mualdawn ah kigal muh kiukiauta hi, cih ka phawk thak aa ka lungdamna kigen theilo hi.

Pasian ngimna lianpi khat tawh tukhang hunin akithehthaang ZOMI te asawtlo hun khat teh ituntunna gam leh minamte pilna siamna tawh tulaitak akhangthak inaute leh tate in apil asiamnate uh igam leh minam lamkikna ding (Zomi national building) leh minam zuunna/hamphatna (Zomi national interest) ading khaicii akituhtuh hitah maw! cih ka muthak phapha hi.

America ah a khangthak ding mailam ZOMI makai muanhuai ding tuailai momno Sianmang’lungdeihte liangko tungah minampi lungsim leh minam itna (Zomi national spirit) kiguan khin ahih manin, imailam ding limcii mahmah ka sa hi. Zomi te koimun koikuam itung zongin ingeina kipte kilen tintenin iteel ahi kilkello Vanglian Pasian hong piak ihihna (Zomi National Identity) ikep tinten leh iphungvuh tawntung ding tukhangin anungta ZOMI khempeuh liangko tungah akinga ahihi.

Union Of Burma aphutkhia minam ZOMI te (Founding fathers of Union Of Burma) ihihna teeltakin thei aa imaban a omlaite ah khut khat tawi khekhatkhai bangin iminam leh gam ading ma ipankhop naak leh hua lai ah ilametna aksipi mualdawn ah kigalmuh kiukiau ta hi. Tua ni zingsang ciang’n bel. By: Bob Tuangpi