Ngeina leh Christian Upna (1) ~ Rev. Fr. Damian Dal

Ngeina leh Christian Upna (1) ~ Rev. Fr. Damian Dal

Thukong honna: Mihing icih in, khatkia (tangkia) in ihnungta thei kei hi. Ih pian limin, minih kigawmna pan apiang te ih hihi. Ihpian nathu, athupi tak in, ihngaihsut kikkik ciangin zong, alamdang leh athuthuk thupawl khat ih phawkkhia thei hi. Numei khat leh pasal khat (Piancil 2: 18, 21-24, Mt 19: 4-5)(numei le numei , pasal leh pasal hi lo) kigawm na hangin, mihinga piangte ihhih manin, eite in, mithumna te ih hi hi. Tua in banghong theisak hiam ihcih leh, mikhat a ihpiankhiat takciang in, gui leh nam (minam) tawh ihkipelh theihloh zia hongphawk sak hi.

Tua napian na gui le nam (minam) pen na nun takpih, na khanpih, naki zoppih minam hongsuak in, tua in nang teeltheih thu, nang nialtheihthu, khuttung lumleh bangin ihdeihbanga khektheih thu hilo in, tua minam, tua gui ahoihsak ding, alamsang ding, apuahpha ding, aci phasak ding, Pasian atheisak ding, tua napian na, naminam te, Upna khuavak apia ding, leitung nopna, vantungnopna angahsak dingin, Pasian in nang pen tua gui, tua minam sungah mihing in ahong piangsak ahi zaw hi.

Kizopna leh ngeina: Minam khat ii pianziangeina (culture) ihcih in kizopna panin ahong piangkhia ahi hi. Tua kizopna sungah ‘ngaihsutzia kizopna, thuakzia kizopna, gamtatzia kizopna (patterns of thinking, feeling and acting)thuthum in minamkhat ihhih na hongkilangsak hi. Amasa pen mihing te kizopna ngeina in paukibang pauna (common language) ahi hi. Tua paukibang azang mite pen minam khat hongsuak to in, tua te in nisim kizopna ah, nuamna dahna ah, sepna bawlna te ah, zatkhawmding thukhun, sepkhawmbawlkhawm ding nasep, neihkhawmding van leh mun, thuciin leh la ciin a kipan, lasakzia, laamzia, silhzia teenzia, mokipii mo kilakzia cih atuamtuam ngeina (customs and traditions) te hongbawlto to uh hi.

Tua ahih manin, minam khat ii pianziangeina (culture) ihcih in, minam khat ii nuntakna bu cileng ihkhial hetkei ding hi. Greek minam te ading in, pianziangeina (culture) in paideia ci in, tua in mihing te apicing nuntak na lamah hongmakaih den asangpen pilna leh cimna ahi hi. Tua ahih manin, pianziangeina (culture) ihcih in, mihing picing ihsuak nangin, hongmakaih, lamhonghilh, hongcing hongkem minam khat ii neih ahi, asangpen pilna leh cimna kici thei hi. Atom in genleng, minam khat ii pianziangeina (culture) in, tua minam ii neih asangpen pilna leh cimna pan hongpiang khia kizopna ahi hi.

Tuhun leh pianziangeina: Tuhun ciangin, paunamdang pau te tawh ihkizopna hangin, pianziangeina dang (other cultures)nei te tawh, nisim naisim in ihkizom ta hi. Tua banga kizopna in, ngeina kithupuak loh na (cultural clashes) leh ngeina helhzauna (relativism) sungah eite hongtun pih hi. Tua in, minamkhat ii pianziangeina sungkhat nangawn ah kileh dona, kithupuakloh na (internal contradictions) te hongtung sakin, tua minam sungnatna adamsak ding zatui muhhak ihsa mahmah hi. Tua zatui manpha amukhia ding, azangsiamding leh, tua zatui muhzia, zatzia te mite tung ahawmkikding mite in, tuhun khangthak Christian te (Christian khangnote) ih hi hi. Philipian mite tungah Paul in hici bangin lainakhak hi:

“Sanggamte aw, thuhoih thupha ahi te, azahtaakhuai leh aphathuai thute, asiangtho thu te, thumanthutak tawh kisai thu te leh, aman, adik, atang, asiangtho, adeihhuai thute ngaihsut in na nei ding uhhi.”

Hi Laisiangtho in tuhun khangthak Christian ahi eite ading ahi hi. Hi (Zominam) minam sungpan mihing khat a hongpiang khiasak pa, Pasian ih upna hangin, minamdang te ii neih ahi, thuhoih thupha, azahtaakhuai thu, adeihhuai, aphathuai thu, aman, adik, atang, asiangtho thu te tawh ih minam leh ih minam ngeina ihpuah ihlamsang ding hi. Tua in, ei pianziangeina te mite atawh helhzau ding cihna hi lo in, asangpen pilna leh cimna zangin, ih minam sungah, mihing picing taktak ihsuak dingleh, mite zong tuamah bangin mihingpicing asuaksak ding te ih hi hi.

Ei neih (ei ngeina) sungpan ahoih, amanpha, adeihhuai, asiangtho, a etlawm te mite lakah, pakbang tawisiam in, mualtung kilam khuabangin kilangsak a (Mt 5: 14), Sabuaitung kide meivak bangin tangsak in (Mt 5: 15), Pasian hongpiak asangpen pilna leh cimna, siamna leh theihna ihneih te zatkhiat ding ahi hi. Tua in tuhun paizia leh ihpianzia ngeina te Pasian sungah honglemtuahding a, asiangtho, acidam leh akhangto minam hongsuak sak ding hi. Ngeina (culture) thu atom in ihgenkhit ciangin, tu in upna in tua ngeina tawh bangci kizopna nei hiam cih enlai ni.

Upna in Ngeina Lamsang: Leitungngeina le leitungah pupa khangpan a ihluahsut ihngeina tuamtuam te (culture (ngeina) here includes customs, traditions) leh asiangtho Pasian’ ngeina leh Pasian pianzia honglemtuah (reconciliation) thei thukhat bek om a, tua in Pasian sungah “Upna” ahi hi. Kamsangpa Isaiah tungtawnin Pasian in, “No ngeina in kei ngeina hilo in, no ngaihsutna, no paiziate te in kei ngaihsutna leh keipaizia hi lo hi. Vantung in leitungsangin asanzawk mah bangin, keima paiziate, keima ngaihsutna te note ngaihsutna sangin sangzaw hi,” ci hi.

Upna in Pasian ngeina, Pasian ngaihsutna leh mihingngeina, mihingngaisutna (Pupa khangpan ihluahsuk ngeina tuamtuamte akipan) kikal ah hongkidawh “Lei” (bridge) ahi hi. Christian khat (Christian khangno khat) ih hihna in, “ngaihsutzia, thuakzia, leh gamtat zia” cih, hi thuthum te Topa Jesu tungah phutin, ama sungah zungkha a, ama tungmah ah alamto (built up on Christ) (Col 2:6) ding cih na ahi hi. Lamkhatpan in genleng, Upna pilna zangin, Pasian ngeina te ei ngeina suaksakin, ei ngeina tezong Pasian deihna tawh kituak ngeina asuah, khangthak Christian momno te ihhih ding hun hongtungta hi.

Thukhupna: Pu Cin Sian Thang ii Zomikhawmpi USA tukpeng kidemna pawi a, hongthu genna ah, “Zomi khat in kapianga, Zomi khat in nungta in, Zomi in kasi dinghi’ cih honggen khia hi. Gam leh minam makai khat ahih natawh Pu Cin Sian Thang (ZNC) in gamle minam kammal khiatna (political term) tawh honggen a hihi. Tua kammal mahzangin ihthu kikup nasungah, akammal ihnungta sak nuam hi. Tua in, “Zomi Christian in kapianga, Zomi Christian khat in kanungta hi.

Tua ahih manin Zomi Christian khat in kasi ding hi,” ih cih ding hun hongtungta hi. Jesu Topa tungah ih upna in, ihngeina hoihlo, Pasian deihna tawh akituaklo, aki lemtuah theilo ngeinapianzia (cultures) te sawpsiangin Pasian mai ah asiangtho leh anamtui ngeinapianzia te suaksak (purification)in lamsangto (transformation)ding hi. Hi nasep asemding te in ei khangthak Christian te ih hi hi. Rev Fr Damian Dal