New Zealand ah Khuado Pawi nuamtak kibawl

NEW ZEALAND GAMBUP ZOMITE’ KHUADO PAWIPI, A (5) VEINA NUAMTAK KIZO

New Zealand gambup Zomite’ Khuado Pawipi A (5) veina pen tukum 2015 October kha 23-25 ni dong Ni 3 sung nuamtak-in Auckland Khuapi sungah kibawl hi. Amasa pen in, hih Khuado pawipi pen kumsim in akibawl hi aa, New Zealand gamsung aa om Zomite’ tenna Khuapi 3 (Auckland, Wellington, Nelson) hih Khuapi 3 teng kigawmkhawm aa, kumsim in akibawl den Khuado pawipi ahihi.

Ka om na khuapi te uh zongh vanleng tawh naikhat bang akileeng leh Bus tawh pai ding hilengzongh nai 10 bang akihawlna vive hi-in, kikawmna haksatna tuamtuam kawmkal ah Pasian in hong kem in kuamah tuahsiatna, natna cih te om hetlo in hong gualzawhpih man in Topa tungah lungdamna lianpi ko masa nuam hi ungh.

Anihna ah, hih Zomite’ Khuado pawipi pen Pupa ngeina kepcingna bek hisak lo-in, Pasian thu mahmah tawh kop in cialpi tawh akithuah pahpah pawi khat aa kazat uh ahihi. Pasian in thupha ong pia in, kum khat khit kumkhat nuam semsem in kilawp semsem hi.

Hih Khuado pawipi ni 3 sung ah kimawlna tuamtuam (Sport) te leh Khuasung vakna (Trip) zongh kihel in nuam kisa mahmah hi. Inntek Zomi Innkuan Auckland te thusiamna tawh nisim zingsang leh nitak annhuan kicial ngiat in meh lim nono hong pia den uh aa, gilvah thei mahmah lai hi. Hun khempeuh ah nuam kisalua ahihman in hun kicingzolo, kihawmthawh den hi. Hun awngkhong cih peuhmah kinei vetlo in ni 3 sung vilvel akibawl ahihi.

Athumna ah, hih Khuado pawipi sungah New Zealand gam maikai tuamtuam te, adiakdiak in Auckland MP hong kihel thei in, Community tuamtuam te pan in zongh hong kihel thei uh ahihman tha kingah mahmah hi.

Atawpna leh thukhupna ah, tukum khuado pawipen Auckjland Khuapi ah kibawl hi aa, nuam mahmah leh mipi zongh tha kingah mahmah hi. Mikhempeuh maitaitak leh lawptak in hun kizangh den aa, kikhenni hong tun petmah ciang in bel hunlah hawmthawh leh lunglah zuangkawm teksa in innmaiteng ah sakhengkhang in mangpha kipaihtawh, holimsan in khuazanpi mahta leh ciah ding ngaihsunlo in kaciat ngeingai veve lai uhhi. Hih bang kumkhen khuado pawi te abawlzo semsem ding in mimalkim tungah Topa in thupha hong pia hen.

Lungdam,
Zomi Innkuan New Zealand Makaiteng aitang