Nepal gamsung zinling nasia mahmah, mi 1500 val sikhin

Nepal gamsung zinling nasia mahmah, mi 1500 val sikhin

Nepal gamsung ah Saturday ni akipan Magnitude 7.8 thahatna tawh zin nasiatak in linggawp ahih manin mi 1500 val in sihlawh khinta uh cih BBC News in genkhia hi. Mihing a theihsa mi 1500 val in sihkhat in sihpekpakding cihpen ngaihsutmawk bekbek inzong mulkimhuailua mahmah hi.

Hihbang in Nepal gamsung ah nasiatak in zin alinglohzawh pen kum 80 valbang phakhin ta hi. Ahuaisiat penna munte ahihleh Nepal gam ii Capital ahi Kathmandu khuapi leh Pokhara khuapi te hiphadiak hi.

India, Bangladesh, Tibet leh Mount Everest gamte ahzong zinling kawikawi cih kiza hi.

Nepal Government in thakhat thu in State of Emergency tangko khiapah uh a, leitung gamtuamtuam panin gamtampi te inzong huhna kipanpah ziahziah uhhi.

Nepalese Information Minister in BBC te kiangah agenkhiatna ah mihing bekbek 1500 val in sihlawh khinding ci a, aliam abaizong tamlua mahmah ahih manin misi pen ki behlap toto khathei laiding cihmawk hi.

Misi bekbek 1500 ban ah innsia losia zong naktamkhia luamahmah a, Nepal gamsung pen khasiat huai mahmahmawk hi.

Huhna apiading gamte

US gamte in Disaster Response Team te paisakpah uh a, sumtang in huhna zong Dollar Million khat piakhia dinguh cihi.

India gam inzong vanlengneu honkhat paisak uh a, zatui zaha akisam khempeuh bekthamlo ami ngiat inzong Disaster Response Team mi 40 val paisakkhin uhhi.

UK gam inzong Humanitarian Experts mipil misiam mahmah mi 8 paisakkhin uhhi.

Pakistan gam inzong C-130 Aircraft te 4 paisak uh a, Mobile Hospital zato lupna 30 puasak uhhi. Tuabek thamlo nektheih tuamtuam leh zatui zaha akisam khempeuh zong puasakpah uhhi.

Norway gam inzong amau sum 30 Million Krone (US Dollar $3.9m) piakding kamciam piakhinta uhhi.

Germany, Spain, France, Israel leh European Union gamte inzong huhna piakding kamciam piakhin uhhi. ZD Sawltak