Nekna dawnna leh Vantunggam tunna
Pasian ukna gam ahi, vantunggam in, nekne dawnna tawh kisai thu hilo in, Christ Jesu ii upna tawh, Khasiangtho makaihna leh Khasiangtho sungah nuntakna ahi Pasian deihna banga gamtatna, kilemna, Topa sungah lungdam na ahihi. Hih bang nuntakna anungta mite in Pasian lungdamsak in, midangte zong lungkimsak hi (Rom 14: 17- 18). Mikhat peuh in nekna dawnna tawh vantunggam atanlawh hi loin, nek loh dawnloh na in zong vangtunggam hongtun ahi kei hi (cf. Rom 14: 15-16). Ahi zongin nekna dawnna hangin midangte adingin siatna, puukna ahih loh ding nakpitak in kidopding thu ahih nathu Paul in hong theisak hi. Nek le dawn ann le tui te in Pasian tawh hong kinai sak ahi kei a, nekloh dawnloh na in zong Pasian mai ah maipha ngahna ahi tuankei hi (1 Korin 8: 8). Tua ahih manin, “Mi khat peuhmah mah in nekna dawnna tawh kisai in note thu hongkhen kei ta hen” (Col 2: 6).
Nekna dawnna in mite adingin siatna, puukna ahih leh nek loh dawnloh ding ahihi. Christian thu um mite adingin ciamteh huai thu pawlkhat in:
(i) Nekna dawnna in Pasian mai ah, maipha ngahna hongpiak loh mahbangin, samsiatna zong hongpia hipah tuanlo hi.
(ii) Vantunggam tunnang lampi in, nekna dawnna, nek loh dawnloh na tungah kinga kilamh lampi hi lo a, Jesu Topa ii upna hangin midangte tung itna, midangte tawh kilemna, Pasian Khasiangtho makaihna leh ama sungah lungtaitak a, nisim nuntakna te tungah azung aphut ahizaw hi.
(iii) Nekna dawnna hangin midangte adingleh ei mahmah adingin hoihna pialo in, siatna, Pasian tawh kigamlatna, kitot kiselna, innkuansung buaina le supna akipan hoihlohna apian sak leh ne lo dawn lo ding Pasian deihna ahihi.
(iv) Topa Jesu in namit in hongmawh sak leh namit khelkhia in, nakhut in hongmawhsak leh na khut sattan in, tua hileh vangam natungding hi (Mt 5: 29) ci in honghilh hi. “Ken aman taktak konggen in ah, asanggam a u anau amudah mi in, thukhen na thuaklo in a omkei dinghi” (Mt 5: 22) ci in, hong hilh lai hi.
Tuhun khangthak Christian akici pawlkhat in in, ne lo dawn loh napen vangam tunna sa khial uhhi. Ne lo dawn lo in omzo hina pi, migensia lo a omzolo, zi tung, pasal tung mawh amaisak thei lo leh amai sak sawmngiat lo nangawn ki om hi. Jesu Topa ka umhi ci na pi in, azi tawh annkuang a uumkhawm thei lo, apasal tawh mehkuangkhat asawk khawm theilo nupa tampi ki om ta hi.
Zu nadawnna za natepna in mite te leh nang adingin siatna leh, Pasian tawh kigamlatna hongpiansak leh zu, za te dawnlo teplo in na omzawhnangin hangciam ding ahihi. Tua mahbang na leii in migensiatna, thusia genna sungah
gamtangin, na leii hangin innkuansung, u sung nau sung, lawm le gual sung, pawlpi sung cihte ah siatna supna piangsak in, nang ading le mite adingin, Pasian tawh akigamla sak kammal te paukhiatna in i zat leh, pau lo in omzawk ding ahihi.
“Migilote, Pasian’ Ukna sungah a lut hetlohna ding thu na thei uh hi. Note kihaibawl kei un. Numei tawh a paktatte, milim biate, mi zi ahih kei leh mi pasal tawh a mawhte, pasal leh pasal a khialte, a gutate, a huaihamte, zukhamte, mi gensiate, ahih kei leh mi’ na a sutte khat beek, Pasian’ Ukna sungah lutthei hetlo ding hi”(1 Korin 6: 9-10).
By Rev Fr Damian Dal
Leuven, Belgium
Comment piaknop aomleh...