Nazi na it lam kilangsak in (2)

Nazi na it lam kilangsak in (2)

Khat veivei, nupa kaal sungah itna om napi’n, tua itna bangci kilah khiat ding cih i theih loh manin, nupa kop khat hi napi a kimudah, a khelbawl tawh kibang thei hi. Mihing lungsim a huampi a kiet ciangin pasalte lungsim sangin numeite lungsim telcian ding haksa zaw hi ci uh hi.

Tua bang kawmkaal ah pasal pawlkhatte ina zite lungsim theih sawm lo sawnsawn uh ahi manin, a nupa kaal uah bang mah ahi lo tawh a kibang lel thu khat hangin a nupa kaal sung uh nuam thei mahmah loin om cipcip thei uh hi.

Tua hi a, bang thuteng in nupa kaal ki-itna selcip thei hiam cih thu tawm khat gen nuam hang. Thu nam nihta om ahi manin, a telsiamte ading hamphatna, a telsiam lote ading……..hi kha thei ding hi.

*** Na kikhop denkeei hangin bang kilamdanna nei tuam na hiam, ci zaw ding mawk, ahikeh, Biakinn na paisimin kei adingin zong thu hong ngetsaj den in ci zaw ding.

*** Lai nasim sim hang bang phattuamna nei na hia, thu hi lolo thei zawsop teh ci ding maw, ahikeh, ama deih theih laibu nam leisak ding in, a lungdam nadinga bawl zaw ding.

*** Na puansilh khempeuh tawh kilawm mai ve teh aw, ci ding maw, ahikeh, puan zong ahilo theithei deih na cia, muleng khai na bang lenlan-a, ci zaw ding.

*** Na theih loh kaalin vakna hawhna khat a neih leh phone tawh sam pah maw, ahikeh a vak theih nadingteng kan pah ding maw, ahikeh, ka hawh ka vakna khatpeuh pan inn ka ciah ciang na na om loh pen ka lungnuam kei, na vak ding leh zong hong theisak pelmawh in, ci zaw ding maw?

*** Pawibawlna le mipi omna munte ah amah tawh kilenkawmsa a maitaitaka vakkhawm ding maw, ahikeh na pai masa lel ve, hong nungdelh pel ning, ahikei leh man nai lo maw, daldal, hong ngakzo kei ning ei, na pai khol ning ei, na man teh hong kinawh mahmah o, ci zaw ding.

*** Amah tawh na omkhop hun sungteng mah hun nuampen nasakna thu gen ding maw, ahikeh, khualzin gamvak ding na lawp mahmahna thu gengen zaw ding.

*** Ni khat bit sung tawntung inn na a sep hang, a hoih a phatna khat zong gen ngei lo a om zaw ding maw, ahikeh, inn na nasep mana ken nuamtaka sum le pai a zong thei hi zaw ing, ci zaw ding.

*** Lungkhamna le haksatna khat a thuak ciang, a piang na khempeuh Pasian deihna hi le ei, cih san ding maw, ahikeh, Pasian tungah thungenin huhna ngen niei, cihpih zaw ding.

*** Nasepna pan na ciah ciang, ka om loh kaal bang sem na hia, a koi tengah vak, kuateng hong hawh cihte a kipan a neng a tawnga dong pah ciatciat ding maw? Ahikeh Sun thapai inn ah nangkia bek om ci le hang, na cimphawngin bangteng nasem a leh ci a hemdot zaw ding.

*** Amah tawh na kiten khak mah hampha na kisakna thu gen zel ding mawk ahikeh, na tate kiangah “Zi na neihding uh leh ngaihsun pha mahmah un maw, zi tuak loh pen na mahmah hi, ci a sim gen hiauhiau zaw ding.

Lungdam
Job Cinpi
Zomi Laisim Nuamte