Naupangno khatin anu kiangah sumngen in benggawp

Naupangno khatin anu kiangah sumngen in benggawp

Naupang pasalno khatin anu kiangah sumngen in atupgawp laitak Video kizaih in, Social Media ah ki thehzak hi. Tua Video Clip pen Second 42 sungbek hi a, zanni in Malaysia gamsung ah Viral Video akithehzak ahihi.

Video sungah naupang pasalno khatin anu kiangah sumngen in, aban tupsak hi. Anu in nalua, nalua ci’n awngzakzak a, avekin hongpia in ci’n atapa in otsangawp hi.

Anunglam ah nupi khatin tua naupangno atotgawp zong kiza a, anu inbel kaneihteng kongpiak khit hi, nasem akuanding hi’ng ci’n dawngkik cihi.

Tua naupangpa pen apuansilh School Uniform tawh kibang a, sangnaupang khat hiding in ki ummawh hi. Anu kiangah asum neihteng apiakloh ciangin hehin atumgawp cimai hi.

Ampang Jaya police chief Assistant Commissioner Hamzah Alias in agenkhiatna ah hihpen Ampang kuamsung ah thupiang cihi. Hihvai tawh kisai in Police Report zong kibawl a, ahi zongin apa in atapa pen bangmah hongcihsak kei un ci’n ngetsak cisawnsawn hi.

Tua naupangno pen kum 15 bek aphapan ci a, sum adeih ciangin anu pen simmawhbawl in tumgawp ngamta hi.

Police te genna ah hih thupiang pen zanni Tuesday (September 26) ni zingsang 7am hunpawl in thupiang ci a, atanu khatin hihbang in anu atumgawp asanggampa gamtatna pen Video zaihin apa kiangah khak hi. Apa’nzong tua naupangpa ii sangsia te tungah khaksawn in, hihbang in agamtatna pen bangci thuhilhding kahiam ci’n huhna ngen hi.

Tua Video Clip pen mipi muhding in Social Media ah hongki khahkhiat ciangin, amukha peuhpeuh in lamdang samahmah uhhi.

Police te’nzong tua naupangno leh anu kiangpan in Statemen Record bawlkhin uh cihi. Tuaban ah tua naupangno ii azun zong sitsak uh a, zatui khamtheih Drug khawng azanghiam ci’n sitcianna bawl uh cih kiza hi.

More: USA, Georgia sanginn huangsung ah sangnaupang khat palik te’n kaplum

Hihcia phapan in apianna anu tungah sum ngenin benggam cileh, hih naupangno khangkhiat kalding anu apa te’n ngahlah zungzunglo khading hi. Nulepa akhasiasak, alungkhamsak te daupailua zungzung khollo uhhi. Nulepa khitui takkhat ih kiatsak khakleh….. Sawltak #zomidaily