Naupang leh Screen Time ~ Nu Sung

Naupang leh Screen Time ~ Nu Sung

Thupatna – Leitung paizia a kikhel tawh kizui in neek leh dawn, gamtat ziate zong kikhel hi. Tuhun pen “IT hun/smart devices” hun hi a, set vanzat thak tuamtuam mun khempeuh ah om kawikawi in zong kilimzat tek hi. “Screen time” i cih teh screen mai ah hunzatna genna hi (gtn. phone, computer, tv, ipad, tablet mai ah). Hih pen adiakin naupangte adingin phattuamna om a, a kidophuai thute zong na om hi. Tua bang thute nu leh pate theih ding leh zuih ding pawlkhat kong hawmsawn nuam hi.

I. Phattuamna

Screen time hong piaktheih ahi phattuamna pawlkhatte:

Kizopna: Gam tuamtuam leh mun tuamtuam aa om meltheih u le naute tawh kimeltheihna leh kizopna dingin hoih.

Pil sinna: Tuhun in internet sungah pilna leh theihhuai tampi pen a baihsa in kikoih ahih manin ki-en thei in kisin thei kimciat hi. Naupangte adingin zong a kibawl pilna sinna tampi om hi. Tuate zang thei leng a phattuamna tampi om ding hi. Adiakin tulaitak Covid-19 hun sungin hihte tungtawnin sang kikah a, pilna sinnate kizon beh thei hi.

II. Kidophuai thute

Screen time in phattuamna hong piak mah bangin siatna zong tampi ong tun thei cih thu ih kitheisak nuam hi. A nuai aa te pen adiakin naupangte tungah screen time hangin a piang siatnate ahi hi;

• Thauluatna (overweight)
• Pau theih pahlohna, adiakin naupang kum tawmzaw deuhte (Delay of speech development)
• Ihmut cimlohna (Sleep-deprived)
• Lunglut lohna, na dangte ah lungsim piak theihlohna (Inattentive)
• Lungtomna/lunghamna (aggressive and less able to self-soothe).
• A pualam thu (a hi tatak thute) ah lunglutlohna (Less interest in real world)
• Mi tawh kizopna lamah khantoh ding zah khantohlohna (Delay in social development)
• Mittha zawmna (Weaken eye sight)
• Screen time lo aa om theihlohna (Screen dependency)

III. Zuih theihding thute

A. WHO (World Health Organization) te in a thukanna tungtawnin naupangte a kum uh tawh kizui in ‘screen time’ ah a zuihhuai thute hong lakkhia uh hi.

• Naupang kum (0-1 yr): Etsak vetloh ding (no screen time)
• Naupang kum (2-4yrs): Ni khat naikhat val etsak loh ding (maximum one hour each day).

B. Naupang kum 5 pan nuaisiah te screen etlohna dingin ahih theih zahin hanciam ding kisam mahmah hi.

C. Screentime hangin a piangthei siatnate naupangte teltheih dingin hoihtakin genin kikup pih in. Amau mah tawh thukimna leh amau ngaihsutna te la in la, a hun ciangtan na (schedule) bawl sak in.

D. Lupma leh an-neek laitak in zatloh ding hoih penpen hi. Pawlkhat nu le pa in screen-time tawh an pia ki-om kha thei a, hih pen pelhhuai hi.

E. Naupangte et youtube/cartoon te ahih theih leh nang en masa in. Ahih theih leh amau tawh enkhawm in la, kikuppih in.

F. Naupangte mai-ah screen time i zatdan kidawm ni.

G. Innkuan hun (family activity, trip, etc.) a tam thei bang pen piak hanciam ni.

Thukhupna – “Zang thei leng zatui, zang thei kei leng siatna” cih kawlte paunak a om mah bangin, IT/setvan khantohna ii ong puak ahi hamphatnate zatui a suahna dingin hanciam ciat dingin kong zawn nuam hi.

“A hun ii paipih hi, kikeptheih hi kei” cih ding hi lo zaw aa, “where there is a will, there is a way” (sawmna a om leh a lampi om hi) a kicih mah bangin veina leh utna a om nakleh zuihlah omlo hi. Naupangte tungah screen time i piak theih kidophuaite a peel zo leh a piaktheih phattuamnate a lasiam kimciat dingin Nu le Pate kong zawn nuam hi. Biak Sung (Nu Sung) – UNICEF, Myanmar, Child Protection Officer