Naupang kum 5 aphapan khat Cancer natna nei ahih manin anu apa te’n zato ah nusia

Naupang kum 5 aphapan khat Cancer natna nei ahih manin anu apa te’n zato ah nusia

China ah nupa khatin atapa uh zato ah luppih hi. Atapa pen kum 5 bekbek aphapan hi a, tua naupangno in Cancer natna nei cih atheih uhciang in anu apa te’n zato ah nusia in taisan uh cih SCMP pan kiza hi.

Southern China aom Hospital khatah thupiang hi a, zato ah akinusia tua naupangno ii aminpen Rong Rong kici hi. Orbital Rhabdomyosarcoma akici “malignant tumour” alamdang aom pakpaklo Cancer natna ngahkha hi ci’n Chinese Media te’n nung Thursday ni in pulak uhhi.

Southern China, Guangdong Province, Foshan khuasung aom Hospital ah naupangno pen aki nusia hi a, Doctor te leh Medical Staff te’n anu apa te ii phalna lai “Written Permission” omlo in zatui kibawl theiloding cihi. Legal takin zatui zaha bawltheih nading in anu apa te ii Written Permission akisam hi a, ahi zongin anu apa te’n Cancer aneih atheih ciangin zato ah anutsiat uh himawk hi.

Hih zato ah thunei Head Nurse khatin agenkhiatna ah hih naupangno pen abeisa October 10 ni in apa in zato ah hongpuak cihi. Zato akipual laitak in apumpi sungah tui tawmlua, Dehydration ahih manin, atha beigawp, zawcip in akipuak ahihi.

Mainland Chinese Law ah Cancer Treatment akibawlding ciangin Biopsy ci’n sathem lakkul a, tuapen innkuanpih te ii thukimna Written Permission kisamsak uhhi. Ahi zongin apa in hih atano pen October 23 ni in zato ah nusia hi.

Medical Staff te kiangah atapa akibawl nadingin sum kazon kulding hi ci’n zato panin apaikhia hi a, ahi zongin zato ah kuadawkkik nawnlo ahih manin, Hospital thunei te’n Police Report bawl uhhi.

More: Nisim Soft Drink bungnihval dawnna hangin Cancer ki ngahbaih (79% Risk)

Naupangno pen gawngmahmah a, bawngnawivui bek nethei sawnsawn hi. Zato nasem te’n amau tate ii silhlui puannak te puakin zato ah kikem hi. Naupangno ii anu zong ki kankhiazo nawnlo in, anu apa te’n zato ah anusiacip uh cimawk hi.

Dr. Liu Guoqing kici hih naupang akemkha zato pan siavuan khatin agenna ah Cancer pen khauhmahmah in, Late Stage bang hita a, adamkik nadingin zatui bawldingpen hamsa mahmahding hi ci’n genkhia hi. Sawltak #zomidaily