Nashville khua khualzinna (Zomi Nam Ni Zinmang)

Nashville Khua Khualzinna (Zomi Nam Ni Zinmang)

Zomi Innkuan Nashville te in, 70th Zomi Nam Ni thugen ding zingmangpi ding in hong cial ciangun, lungdam tak in ka na saang hi. Vanleng ticket ciah le kuan hong leisak nung, Hotel zong hong sapsak nung hong cii aa, ai zong ka innkuan pih nu’ zong hong zuinuam a hih man’ in mawtaw hawl in ka pai zaw uhhi. Nipi khat dektak Feb 19-25, 2018 kataam uhhi.

Vaitun’ ni in Pu Tual Khan Suan, ZINT makaipipa in Uptown Hotel ah zin hong tungsa in hong muak hi. Tua nitak an Suanpi zi Cingneu in an hong huan hi. Cingneu’ nu uu Ciang Hau pen kaneutung’ aa kithei Lawibual teng masa te kahi uhhi. Tua ban ah Gawngmual khua ka Pu Cin Khaw Dai tupa Thang Biak Kim te’n Feb 24, ni House Warming hih ding hong kho aa katam suak uhhi.

Pu Tun Hau Thang aa kipan Gawngmual suan tentawh ka’kimu khathei uhhi. Kum 50 kiimkiim ki theipih, Gualtam, Rev. Ngin Hang te innkuan, Rev. Do Za Kham te, Rev. Awn Sian Pau te innkuan, leh ka neu lawm Dr. Pum Hau Mang te, (Azi Ngai Dim bang ka zite uhtawh aneu a kipan Zangkung ah khang khawm “Zangkung Tu” taktak) tawh hunmuam ka zangh khawm thei uhhi.

Zomi Innkuan Tennessee makaipi te leh Nashville khua aom ka Zomi pih teng in, hong pibawl mahmah in “TUKPAK” bang hong tot uhhi. Kei PUANLAISAN khat leh Kazi PUANDUM khat tawh hong tuam uhhi. Sih ciang aa, Puanlaisan/Puandum tawh kituam mah bangin ka ngaihsun aa, kalung uh a kim mahmah hi. Labu sungah “Ka kilawm lopi hong itna bang hang hiam thei keng” acih mah bangin hong itna uh ka theiloh hang Zeisu leh aminam uh Zomi a it hang hi cih kathei hi.

Ih Zomi Nam Ni ih bawl ciangin, ih audience a tamzaw kum 18 nuaisiah hi. Amau te in, U.S a tun zawh uh kum 5 tungsiah bang vive hi. Ei pau sangin thupi lapi genna ah English tel zaw uhhi. Tua ahih ciang in mai kum, 71st vei Zomi Nam Ni ah, Zomi Nam Ni hong pian khiatna thu beek English a gen thei ding hong kisam ta hi. Tua leh thu gen te in a thugen te a’teltaktak aa maantak, taangthu maan ahih dingthupi hi.

Nipi khatbek taam kahih man’in Nashville khua Zomi te hoihna leh siatna, khuasak dan ka gen ding tampi ka theikei hi. Nashville khua leilupdan, (Topography) mual leh guam vive hi aa, ih Khamtung gam hong phawksak mahmah hi. Kopai hun sung khuahun zong nop mahmah hi. Nasep sumlawhna zong sia in ka um kei hi. Zomi atam zah khat in, Pawlpi zong aom dingzah mah na-om pah hi. House Warming ki bawlna Pu Kimsan te zong ZPC ten a hi uh aa, kikhop hun sungbang numei te in a lutang uh dial kaang tawh hong tuun pah uh hi.

Tumaa kum 35 lai aa, Myoma Ci Go-down sungah numei te a lu-uh dialkang tawh tuamin, “Zion Khua ih pai ding hi” cih khuangneu tumkawm in, lasa kawm aa, a tawn ziahziah lai, Mr. Marishaw (Tui mangpipa) tawh kawmvang pan ka et simsim lai uh ka phawk kik hi. Kalung bang hong leeng zawzen hi. Zomi te tenna khua nuam mahmah khat in ka ngaihsun hi.

Rev. Dal Deih Piang makai in, Tuithangkhua’ suan saanggam teng in zong tutkhop holimna khat hong neihpi bek thamlo, Tuithang leh Tungzang khua UNICEF tui ngahna lung dam kohna zong hong nei uhhi. Ka lungdam hi. Bhutan gam kapai maa, 1989 kum ciang Chin State sungah UNICEF Assisted Gravity Flow Water Supply Scheme, UNICEF in aa sep laitak or sepding in asan’ sa Project 29 te kei vaihawm sakloh omlo hi. Tuithang khuate in lungdam hong koh ciangin, Topa Zeisu in miphak 10 damsak aa, tua lak pan khatpa kileh kik in Topa Zeisu tung lungdam na kohi. Zeisu in, “Kong damsak mi 10 hi aa, adang 9 te koih-ah om hiam?” cih kalung sungah hong suak hi.

Tuithang khua te tawh ka kiholimna tung tawn in ka theikhak thute: UNICEF te huhna tawh kila Tuithang Gravity Flow water Supply pen a design mahbang, Engineer te lam bang in bangmah kikhoihlo, kisusialo in tuni ciang dong tui hoihtak ki ngah hi ci hi. Tungzang khua in zong tua bangmah in hoihtak kemcing uh hi dingin ka lam-en hi. Kamdawm ka zakna ah hih Project bekbek mah in a original design bang lian’ in akem lai hi cih ahihi. Tedim Sialtang Tui bang khasiat khuangaih huai zawzen hi.

Tuithang khua UNICEF tui ngahna thu in hi bang ahihi. 1981 kum Febuary kha bei kuan leh March kha kipat lam sungteng, Rural Water Supply Division (RWSD) pan U Ohn Maung leh kei, Sialtang tui detail survey bawl dingin Agricultural Mechanization Department (AMD) zumpi-in hongsawl leuleu hi. Tedim-ah zintun nading gelkholhna omlo ahih manin U Ohhn Maung tawh ko-inn (Pu La Cin Khup inn) ah ka kinga uhhi. A zanzan-in Pu Tual Khaw Mang (Head of the office of Tedim Township People Council) leh Pu Vum Za Nang (Secretary of Tedim Township People Council) te-in Mandalay Rum thol khat kengin hong delhphei pah uh a, ko pai na thu-uh kiholim na kanei uhhi.

U Ohn Maungin RWSD Director pa U Ngwe San in, Gravitry Flow Water Supply Schemes 5 ding feasibility survey, Khamtung gam, township dangte-ah zonlai ding hong kamvaikhak na’thu agen ciangin, Pu Tual Khaw Mang leh Pu Vum Za Nangin, hih hamphatna township dang kaaisak kei-ni, hong cipah-uha, tui haksa khua 5 ka kikumpah uhhi. Kei zong’ tui haksa khua katheihngei Tuithang leh Laitui khua te ka proposed khit ciangin, Sihzang kual lamzong khat hawmthei leng hoihding aiteh ci-in Thuklai khua ka proposed lai hi.

Pu Tual Khaw Mangin zong Thinglei kual zong khat sehni ci a, Pu Vum Za Nangin Mualbem khua zong sehni ci-in, hih khua 5, Tuithang, Laitui, Thuklai, Thinglei kual, leh Mualbem khua teng kipsak pahin, a siauhlua (Application) ding Township People Council zumpan bawlpah-in, RWSD zum ading leh UNICEF zum copy ding komau kapua sukkik pahuh hi.

1987 kum pawl UNICEF Gravity Flow Water Supply and Sanitation Project Officer pa’ Mr. D. Tewari tawh Tuithang khua ka zin uh ciangin, Tuithang leh Tungzang te kipawl in, vai hong muak, zin hong do khop nading kavaikhak sim hi. Tuinak ka va et uh ciangin, tuinak pen Tungzang gam ah om in leh tuilakna main pipe-line in Tungzang khua nawksuk ahih man in, Tungzang khua zong tawh tui piak khop ding in Mr. D. Tewari kaiangah ka gen hi. A man’ zong Project Cost per Capita tawm zaw ding ai ciang ci-in hong thukim pah hi. Tua bek thamlo Water Right a cih tawh kizawitawn zaw bek thamlo Tuithang khua leh Tungzang khua Water dispute omlo ding hi hong ci lai hi. Tua hangin Tuithang khua a’ding UNICEF tui Tungzang khua in zong a ngah ahihi.

Tuithang te tawh ka kiholimna uh ah, Tuithang khua in, a khuakim tai 3 pat hle ahing lai singkung phuksak vetlo in, singno suan sak aa, sing keu bek ansing tom sak hi. Kum 3 sung in khua kim ah sing kung lopaa hong nim kik aa, sakhi na nawng hong tam kik hi ci hi. Lainatna tagah sang inn pi khat zong nei uhhi. Tuithang khua pen a etteh huai mahmah Sanpyaih Myo khat ahihi.

Ih Zogam ah “Zaavom/Beng” ki ciin vai zong ka gen kha uhhi. Amau hong gen na-ah “Zaavom/Beng” pen ei gamsungah, Meitei (Talpaak) te’n hong ciingin hoih mahmah hi ci uhhi. Eimi teng sumlawh dingin hong cialin, “Zaavom/Beng” tawmta nisim in hong pia aa, ih mipih tengin Beng suai (Addict) in, siatna namkim ih thuak hi ci hi. Tua Beng kiciin na teng phiat ding in, Palik te, galkap te a pai uh ciang in sum a deihzah uh leh, “ISUZU” cileng telpah nuteh, deih bangbang na pia uh aa, kua mah in “Beng” kung suksiat saklo hi ci hi.

Sum tampi ngah uh aa, Meitei gamnuai mite a’ding thau, thauvui thautang tampi lei in thahat mahmah uhhi cilai hi. Sum hau uh ahihman in, Kawlpi khua sung ciang dong khawngah tengsim uhhi ci hi. Meitei te in, 1857 kum aa hong galleh uh, tun “Beng” gal tawh hong la kik uh ahihi. Tunai aa Thangpi (Ko Kyi) suahsak “Beng” ciinna lo Acre 56 ki phuktan hi acih zong “Bengnai” siak khit ciang hilel lodia aci pawlkhat omlai hi. Tua ah hileh ih gam leh ih mipih te bang cihut ding?? How to Safe Guard??

Ih Zogam leh ih mipih teng siatlawh veve, banghang ZRA te tua Meitei te “Beng” ciinna mun tengah ciingsak lel lo ii hia?. ZRA te hong thahat leh tua Talpak te hong nawh mang le uh, ih Zogam bitna (Security) hong om zaw ding hi. Ih Zogam hut (Safe guard) nading ZRA te “Beng” ciingsak ni. A mau zong hoihtak hong gamta in, thau, thauvui, thautang tampi tak hong nei in hong thahat vet uh hen. Tal Pak gamnuai mite sang deih zaw lai hangh! A hoihlo penpen pan ahoih khat hong piang zong hipah ding hi. (“Kawlpau in Asu the ka a kaung” acih hong hipah ding hi). It is absurd. Tua ahih vet kei leh ih gam-ah kuamah “Beng” kung khat zong ciingsak vet lo ding hihangh! Khupkhan Thang Taithul, Norman, Oklahoma Feb 28, 2018