Nasep puan ~ Hau Za Cin

Nasep puan ~ Hau Za Cin

Mi pawlkhatte nasep puan pen puan kisam lo hi! Pawlkhat leuleu pen puan silh lua kisa in a mel a puam nangawn kidawk lo hi. ‘Nasep puan’ cih pen nasepna dinga kizem dan ci leng zong kingah thei inteh.

Cidamna lam a sem nurses leh medical doctors te in nasep puan kang silh uh a, siangtho mahmah in etlawm ahih manin cidam huai a, cina mite adingin cidamna lungsim guan takpi leh kilawm hi. Galkapte nasep puan leuleu pen a gial bembam khawng hi a, lauhuai in lipkhaphuai ahih manin mikimin kineh ngamlo in kikihta a, galzo diak le uh kilawm hi. Khapi tung kah dingte kizepna leuleu lah kituamcip lua kisa huih nangawn a thawllo in kibitsak a, tui sung lut ding tuisiamte kizepna leuleu buangnai tawh kituncip in tui thawllo hi leuleu hi. Lamdang kawikawi.

Sangkah laiin kum nih sung khawng ‘uniform dress code’ kici in ‘puansilh kibang silh ding’ ci uh a, tua pen ka nasep puan uh hong suak hi. Sangkah theihna ding puansilh hipah hi. Tua puan nei kei leng sangkah kiphallo pah lian himawk hi. A tunglamah puanak kang, a nuailamah pheituam vom kizang hi. Khuavot cianga silh ding puanlum pen a vom hi a, a ngawng ah a kang tawh kigialsak hi. Vompi vun silh tawh kibang pah lian hi… he he..

Science laboratory ah nasep ding ciangin puanak kang kisilh a, khuttuam buangnai kibulh in, huihsia dik khak lohna dingin huihkhaihsiangna (gas mask) kibulh in na kisem hi. Tua bang hun laiin ka lungsimah nasep puan cih pen hong suak ngeilo hi. Lo kho dingin lokuan ciangin nasep puan kisilh a, tua pen inn ah i om cianga puansilh tawh kibanglo hi. Nasep puan pen a sia zaw deuh kisilh a, a kekzaw deuh, a deihhuailo zaw deuh, a ithuailo zaw deuh kizang sese hi. Ahi zongin Nipini kikhop khawng ciangin i puansilh a hoihpen kisilh a, i lawm leh gual tawh kikholh ciang zong ahoih theithei kisilh in, ‘i cih simsimnu’ kiangah i hawh ding bang ciang i puansilh hoih bek hilo a gimnam namtui nono tawh kikap, kizut nuam lai tazen hi hang!

Washington DC Hospital, President Bush te phaitam ah Sushi hual dinga ka kuan khat in a mun ka tun ciang sam tuamna (hair net) ka khuk kul, anhuante nasep puan puanak kang ka silh kul, awm leh kawngteng a nit lohna ding a khuhna (apron) ka silh kullai…. tua teng ka silh taktak ciang… “Aw! hih pen Sushi Hual ‘nasep puan’ himawk maw” ciin ka ngaihsun a, ka lungsim ah hih bang sem ding i hih leh hih bang nasep puan i silh kisam himawk maw ka ci hi.

Tua in thu tuamtuam hong ngaihsun sak a, “Rome khua ah na pai leh Rome mite bangin gamta in” cih pen a dik himawk mah e, nasep ut i hih leh nasep puan i silh kul himah hi ka ci hi. Makai i sep nop leh makai puan tawh kizem kul a, makai lungsim i puak kul hi. Sushi hual puan silhlo in Sushi hualna ah lut ding hong kiphalloh mah bangin makai lungsim, makai puan silhlo in makai i sep leh ki mainawtlo ding hi.

Galkap i sep nop leh galkap puan tawh kizep kul a galkap lungsim i neih kul. Sushi Hual ding ihih leh Sushi hual puan i silh kul a annek bawlsiam lungsim i puak kul, nek leh dawn i siangthosak ding hanciamna lungsim kisam…… Lo kho ding i hih leh zong lokho nasep puan leh lo kho lungsim i neih ciang bek in i khawh i tuk pungin i matut kizo pan ding hi cih hong ngaihsun sak hi.

Tua ahih manin i nasep puan in i lungsim zong hei a, i lungsim a kihei bangin i nasep zong kihat tuam, kizo, kineh diak tawh kibang hi. Sumbuk ngak khat puansilh sia nemnam tawh kizem leh van lei dingte thalawp hetlo ding ahih manin a kilawm a siangtho a kizem ding a ngeina hi. Pasian nasem Pasian thugen a siangtho penpen mun ah a ding dingte nangawn a silh a ten hong hi thilthel leh kilawm lo tawh kibang hi, tua mun pen a siangtho mun ahih manin.

Tua manin a nasep tawh kituak in a kilawm, a hoih, a siangtho zong a zon tohtoh kisam hi. Tua pen leitung dan bek hilo in Pasian dan zong hi a, Amah kiangah a pai ding peuhmah lungsim siangtho tawh a pai ding a deih Topa ahi hi. Mihing in a pua lam kizepna ki en a, Pasian in bel a sunglam kizepna na mu sitset hi.

Lawm, nang tuni bang sem? Bang tawh kizem? Na ma na tun zo hiam? I sepna ciat ah gualzo matut dingin Topa in hong thahatsak tek hen. Dr. Hau Za Cin (Phuitong Liim)