Nangbek kisa khaken (1) ~ Dong Mung

Nangbek kisa khaken (1) ~ Dong Mung

Nawlkhin paampaihna thuak nang bek kisa kha ken…Mi gualzote’n tuateng mah na thuak masa phot zawzen uh-a, tua khitteh hong gualzo zaw uh hi. I Topa Zeisu mahmah in zong tuateng mah na thuak kha hi.

Simmawh zahkona thuak nang bek kisa kha ken….Mi lawhcingte’n tuateng mah na thuak masa phot zawzen uh-a, tua khitteh lawhcing zaw uh hi. I Topa Zeisu mahmah in zong tuateng mah na thuak kha hi.

Nuainet langbawlna thuak nang bek kisa kha ken…A muibun mi icihte’n tuateng mah na thuak masa uh-a, tua khitteh muibun in gual tungtuang zaw uh hi.

Neumuh lipkhapna thuak nang bek kisa kha ken…A ma tunin mi nuamsa ahite’n tuateng mah na thuak masa uh-a, tua khitteh nopsakna hong ngah zaw uh hi.

Maizum mindaina thuak nang bek kisa kha ken… Mi manpha icihte’n maizum mindai-in cih na’ng theilo lamet bei dinmun na tung ngei uh-a, tua khitteh mi manpha hong suak zaw uh hi.

Nang bek lai siamlo kisa kha ken.. Leitungah lawhcinna lianpipi ngah in a gualzo mi tampite eimah bang na hi uh hi. Lai i siamloh hangin i neih sunsun i siamna tawh gualzo thei lua hihang!

Nang bek sum le pai neilo kisa kha ken… Leitungah eimah bangin leiba-thangba hau dinmun panin millionair, billionair a suak mi tampi mah om hi. Tua leibate i lohzawh/ditkik zawh hun hong tung pelmawh ding hi.

Deihsakna ngahlo nang bek kisa kha ken… Deihsakna a ngahlo dinmun panin makai hoih, mi thupi a suak leitungah mi tampi om hi. Hong deihsakin tha hong pia ding zong mi tampi om lai veve hi.

Nang bek a lungkia thei kisa kha ken… Lungkiatna pen mikim in i tuah, i thuak, i phutkhak ahi hi. Ahi zongin lungkia suak loin a mainawt teitei-te’n gualzawhna ngah pelmawh uh hi.

Nang bek kisa kha ken… Nang tawh Immanuel Pasian hong omkhawm den hi.

Nang bek kisa kha ken… Nang hong huh ding Kha Siangtho Pasian hong omden hi.

Nang bek kisa kha ken… Pasian itna in hong nusia ngeilo hi.

Nang bek kisa kha ken… Nang hong cing dingin Vantung mite’n na kiimkot ah giahphual sat uh hi.

Nang bek kisa kha ken… Upna na kibatpih na sanggamte tampi om hi.

Nang bek kisa kha ken… Nang bek kisa kha peuhmah ken…

Mainawt in…Kalsuan in… Gualzawh matutna, lawhcin daupaina, lungnop khamuanna in na mai ah hong ngak hi. Lungdam, Dong Mung