Nang ading kua thupi pending hiam? ~ Dr. Kaipi

Nang ading kua thupi pending hiam? ~ Dr. Kaipi

“Topa in kei hong ompih hi. Bangmah ka kihta kei ding hi…” LATE 118:6 TDB US te gam tangthu ah a Civil War uh pen a hamsat/ buai mahmah hun khat uh ahi hi. Hih thu hangin Kumpipa Abraham Lincoln in hun awng a kici limlim ngahmel lo hi. A sep/geel ding tamlua ahih man in, a innkuanpih te tawh zong suakta tak in omkhawm manlo liang hi.

Ni khat a Secretary of State William Seward tawh a Cabinet khan sungah thu kikum a om laitak un, a tapa kap beba sa in tuamun ah ong tai aa, ” Ka pa tawh kimu nuam ing!” ci hi.

Secretary pa in dawngkik in, “Na pa buai lua in, ong kimuhpih man ken teh. Haksatna na neih leh na sangsia te khat ongsap sak ning in ong hunsak ning. Tua aih kei aa vai thupi lua mahmah aih leh Sitni khat ong sapsak ning in tua in hoihtak ong vaihawm sak in teh” ci in gen hi.

Naupang pa in a kimuhnop pih pen midang khat zong hilo mawk hi. Secretary of State pa lah hilo, adang mipil misiam ulian te lah hi lo hi. Ama pa ngiat a munuam hi mawk hi. Apa’ tangmi kuamah deihlo hi.

Hih pen Psalm lai-at pa in a gen, “Ka haksat hun in Topa tungah ka kiko a, amah in ong suakta sak hi.” Pasian pen ama thungetna te a dawng pahpah pa hi.

Khatvei vei haksatna ih thuakkhak ciang in ih lawmhoih pen te tungkhawng kiko/ kinga kha thei hihang. Aih kei leh ei ong huh/panpih zo ding a ih upmawh mipil misiam, ulian mihau te khawng ki mai-et kha thei hi. Tua bangdan pen ei thu-um mite ading in pil vai lo hi.

Hamsatna, lungzinna khat peuhpeuh ih tuakkhak ciang in amasa pen in Pasian’ lamlahna kisam hihang. Naupang pa in ama pa tektek bek tawh a kimuhnop mah bang in, eite ong huhding aa kigingsa a om gige ih Pa kiangah pai hamtang zaw ni.

Thungen ni:

Kong biak uh Topa Pasian aw, nang ii’ nongcin nongkep bangin kuamah in kote ongcing ongkem bit zolo hi. Ka hamsat laitak un nangmah mah kong zong masa nuam uh hi. Zeisu, namin in thu kong ngen hi. Amen.

Asim mimal khempeuh ading in thupha ngah nipi suak ta hen. Dr. Kaipi