Namdang zi leh pasal neihna ~ Pau Tun Thang

Namdang zi leh pasal neihna ~ Pau Tun Thang

Namdang zi leh pasal neih pen laisiangtho lui (OT) hun lai pek panin na om khin hi. Minam a tamzawte in namdang zi leh pasal neih ding pen deihlo uh a, adiakdiak in Japante bangin deihlo mahmah uh hi. Tua manin Japan minam pen a meel uh kibangkim pen (kahbia) tawm lo pen pah hi ci in kiciamteh hi.

Namdang zi leh pasal neih pen a hohna leh a hoihlohna awm tuak ding hi. A hoihna lam gen masa leng; namdang leh namdang kitengte pen a tate uh melhoih in, lai zong pil thei vanglak uh hi. DNA namnih kigawm hi mawk aih ciangin hoih kim zaw tawh kibang hi. A dang khat leuleu ah tanau hauhna hi. Ei leh ei i kiteen sang namdang tawh kiteng leng tanau kibehlapna khat suak hi.

A hoihlohna lampang en leu leu leng; Laisiangtho ah Pasianin amite namdang tawh kiteen ding na phal lo hi. Thusulkante (Research) bawl ten a muhkhiatna uah, namdang tawh kiteeng, a ang sanga tamzaw pen kisikkik hamtang uh ci hi. Namdang leh nam dang hong kiteen ciangun na khempeuh kilekkim( Adjust) tuak hong kisam hi. Tua ahih manin minam kibang kitengte sangin haksatna tamzaw pah pho hi. Ki itna zong minam kibangte pen kho zaw lai hi.

Numeite in namdang pasal a neih uh ciang a pasalte’ ngeina a zuih uh kul hi. Tua ahih manin a pasal’ nam pen ama’ nam hong suak ta hi. Pasalten namdang zi a neih uciangin a zite uh a mau nam hong suak hi. Namdang pasal neih sang namdang zi neih pen phadawm zaw deuh sam hi.

Nam kibang lo hong kiteen ciang un numeite in pasalte’ pau leh ham, gamtatzia, ngeina etc.te asin ding uh ahi hi.Pasalten zong a pattah ding uh a mawh puakna khat uh hong suak hi.Ahizongin eimite hi munah ki gina zolo hi.Namdang zineisa te in ka kampau hong zadah kei peuh leh; eimi namdang zinei pawl khatin a zit e uh pau leh ham peuh va zui zawsop uh hi.Namdang pasal neih zong lah pasal innkuanpih, tanau te in amau nam zaha ana it theihlohna mun uh tampi awm zel hi.Tua ahih manin namdang zi leh pasal neih pen midangte adingin ana hoih kha phial zongin ei zomite adingin hoihlo mah mah hi.

Ei zomite adingin namdang zi leh pasal neih pen minam mansuahna lel ahi hi.Minam lian te in a tate uh namdang zi leh pasal a neihkhak ding uh phal loin, ahih theihzah un kham uh hi.A tak takin ci leng eimi nam sunga zi leh pasal ding hong zong te khawng pen amau nam laka muzo phalo(luck lo)te khong hi nuam uh hi. Tua lamtak thei lo in i mipih a pil, a siam, a hoih tata namdangten tuahmang pah pah uh hi. Namdangte’ khemsa in awm nawn kei ni.Namdangte itna pen sum leh pai hang khong hi lel thei hi.Itna man tak tak pen minam kibang ki itna ahi hi.

Bang hangin Tedim khua ah Kawl galkap pasal nei tama, Hakha ah tam khollo hiam cih khong ngaihsun leeng zumhuai hi. Banghangin Lusei makpa hici hauh i hi hiam? Ei pau in pau napi vaimel(kala) pua awm keei ta mawk! Hite pen namdangte i thupi muh luat hang hi.Thupi i sak(Value System) khel hunta hi.Ei leh ei kithusim lo mawk hi hang.Ei leh ei thupi kisak theih ding hoih hi.

Vai(kala) lam bawlte leh Meitei singat te tawh kitengte khawng pen kilungdampih khollo napi;Mangkang(sap) pasal neite khong lungdampih mahmah dep hi hang. Namdang pasal nei mah hi veve mawk lo ahi uh hiam? Namdang zi leh pasal neih him him pen eima nam itlohna hi zaw hi. Zomi a it tak takte zomite bek tawh kiteng ding! Pau Tun Thang