Nambup huam panlakna leh kitelna ~ Pau Khat Suan

Nambup huam panlakna leh kitelna ~ Pau Khat Suan

Minam bup, Gambup huam a kipawlna leh malakna peuhmah election ciang a mipi’ teel tangmite ( MP/MLA) tawh khut kilen a ma pangkhawm ding hi a, tua election ah va kigolh lut a guptuam paihtuam va neihding hilo hi.

Election pan a mipi’ teel tangmite ( MP/MLA) in zong nambup huam kipawlna leh panlakna khempeuh tawh khut kilen a a pankhop theihna tantan gam leh nam ading a sepzawh, gualzawhna a sangsem a mu, a ngahthei ding hibek hi. Hih kipawlna leh panlaknate langpan bawl theih hilo hi.

Tangmi leh mipi kizopna a bridge/medium pen nambup huam kipawlnate hiding a, tangmi leh mipi nasep ma pankhopna zong tua kipawlna leh malakna mah a tawn ahih ding deihhuai penpen hi.

Tua in i nam sung, i gamsung ong cidamsak ding a, kipumkhatna piangsak in ong thahatsak ding hi. Tuabang i hihtheih ciang ei sung kipumkhat bek hilo in, namdangte leh midangte in ong zahtak ding uh hi. Election tawh kisai in nambup gambup huam kipawlna leh biakna pawlpite’ kihelna ding, panlakna ding pen “ang-masuan mapanna” a omlohna ding a etcik ding bek ahi hi. Mimal vai tawh thugen a malak ding hilo hi.

Tuabang hilo a, nambup leh gambup bang huamnuam napi election ah guptuam paihtuam nei a ong kigolhlut leh tua in i minam sung, i gam sung ong khenkham ding a, buaina ong masuan sak ding hi. Kikhenkhapna ii agah supna baina, thanemna leh buaina namkim nam leh gam ah ong tun ding hi.

More: ZNC pan ZCD nasepna leh Pu Chin Sian Thang naingangyi sepna tomkim

Ang-masuan panlakna peuhmah midangte’ molhtum suak lel a, thatang suang a gualzawh tungtuan sawmna in bangmah manlo, sum tawm tawh leitheih lel mi gina lo, kipawlna, malakna ong suaksak ding hi. Nambup huam a kipawlna tawh panlakna leh mipi’ tangmi kitelna ah pilvang a, namdang leh galte’ molhtum i suahkhak loh ding kiveng siam ni. Pau Khat Suan