Nainganzi nacih uh banghiam? ~ Zomi Quavadis

Nainganzi nacih uh banghiam? ~ Zomi Quavadis

Ken bangmah thei zo keng. Ahihang:
– Aizawl leh Tedim a kikhaihzia ka muh ciang ka lungtang na hi.

– Taingen khuakhunga Falam paina leh Tedim paina lampi a kikhaihzia ka muh ciangin ka lungtang na hi.

– Sang tuah sial a ih naupangte luikawm guamkawm lakah siiksia dalsia kaikhawm in a vaak uh ka muh ciang ka lungtang na hi.

– Sangkah dinga kilawm kum cingh lo naupangte bawm leh seeng tawh sangkah hun sial in gam sungah akuan khia den ka muh ciang ka lungtang na hi.

– Naupang ankham a gilvah lah hi lo, gilpuak keikai napi akhut akhe lah satak a om het lo ka muh ciangin ka lungtang na hi.

– Mihaute inn maiah dinga innteekte annek laitak cil valh liangin a en ih naupangte ka muh ciangin ka lungtang na hi.

– Lungdambawl zanvaak leh kumthak zanhah hun cianga puanlum nei lo, mei geia unau puanza zawng khawm liliaite ka muh ciangin ka lungtang na hi.

– Sangkahna ah lawmte van lei lai leh moh neek laitak khitui tawh a enen naupangte ka muh ciangin ka laidip na hi.

– Pate sa mat ni leh Sialsawm ni beka sameh a meh kha innkuante ka muh ciangin ka laidip na hi.

– Zomi nupi nausuak zo lo a si, ki at khial a si cihte ka zaak ciangin ka laidip na hi.

– Zomi tektek Zolai nam nih nam thum ih sin khak ding ka ngaihsut ciangin ka lungtang na hi.

– District a ngen tektek lakah Zomi te’n ih ngah khak loh zel ciangin ka laidip na hi.

– Zomi hinapi mite lakah Zomi a kicingamlo ka muh ciangin ka lungtang na hi.

– Malaysia, Singapore, India ah sum thalawh a om Zomi te thuak haksatna leh sihna te ka theih ciangin ka lungtang na a, Mizoram leh Manipur ah neektawm zonga om Zomi te hong kineumuhzia ka muh ciangin ka laidip na hi.

– Zomi kipawlna tampi tak lakah nungta napi a Active het lo kipawlna honkhat ka muh ciangin ka laidip na hi.

– Zomi leh Zomi namdang pau tawh ih kiho ngakngak a kul sese ciangin ka laidip na hi.

– Khuado pawi leh Zomi Nam Ni cianga Zomi bekbek Zopuan kibanglo vive ih silh ka muh ciangin ka laidip na a, tua sangin Mizo niik peuh teeng a Zomi pawi siim ka muh ciangin ka kah suak zo hel hi.

– Zomi tektek ih Zolai gelhzia a kibat theih mahmah loh zong ka laidip na hi.

– Media tuamtuam nei napi hangin deihsakna tawh mimal a Media sem ka muh ciangin Zomi min vawh a Media kicite koiah om hiam cici ingh. Khasum piak lah hilo a hanciam mahmah mimalte Media semte hehpih huaisa ingh. Amau hangin rhu kithei tuam aiciang ka lung lah dam hi.

– Ih lampi ziikte, ih lei bawlte zo man nailopi a hong kisiat pahpah ka muh ciangin ka laidip na a, ih khuasung meikhuamte ni bangzah a tang din zo tam cih ka ngaihsun ciangin ka dipkua den hi.

– Ih lampi a ih buak kultalte lopa in po nelh zo cih thu ka zaak ciangin ka lungsim nuam lo a, kultal a buak te’n tai kidem kawmin buak uh cih ka muh ciangin Charlie Chaplin ka phawk petmah hi.

Politics ih cih bang ahi diam tel zo keng.
I don’t really know what is Politics!

Zomi Quavadis