Na veite na suahtakpih theihi

Na veite na suahtakpih theihi

America gamah tangvalno khat thukhen zum panin a sih nading thu a kikhen hi. Tua thu a zak uh ciangin a nu leh pate lungsim tamkhamin a om uh hi. A tanuno uh, numeino (thongkiapa’ naunu)in a nu, a pa leh a u pa hehpihhuai sa lua ahihmanin amah nangawn a om maimai thei kei hi.

Tua numeinonu in Abraham Lincoln in a u’ mawhna maisak zo dingin a lamen ngiat hi. Banghanghiam cihleh Abraham’ migitna, a tangthu a za kha ngei hi. Tua ahihmanin a nu a pa’ kiangah, “Kumpipa’ kiangah pai-in, ka u’ a suahtak nadingin ka ngen ding hi. Amah in ka u a hehpih ding hi” a ci niloh mai hi. A sawtsawt ciangin a nu a pa tawh Washington lam zuanin hong pai petmah uh hi.

White House a tun uh ciangin, galkapte leh Private Secretary te in a lut’ ding uh na phallo uh hi. Ahi zongin numeino in khitui luangin a thu a la teng a gen’ciangin hehpih huai sa uh a, a lutsak zel uh hi. A tawpna ah Lincoln’ om na room hong tung petmah ta hi. Tua room sungah Senator te, General te leh Governor (kumpipa) dongin, kidona tungtang thu a na holim ngeingai uh hi.

Numeino in a u’ tungtang thu, a sidinga thu a kikhenna thu khitui luangin hong gen ta leuleu hi. Abraham Lincoln in numeino mel a et ciangin hehpihhuai sa in, a thugente in a lungsim dengkham ahihmanin a khitui hong tolh ziahziah hi. A u pa pen mawhnei hiphial mah taleh tua numeino’ hangin amawhna a maisak ta hi.

A mawh a khial pen khat hitaleh na sanggamte’ aadingin khitui luangin na thum’sakleh, nangma’ hangin a mawhna a kimaisak ding ahi hi. Mawhnei nang leh kei’ aadingin khua-ul sisan luangin Jesu in hong ngetsak ngaungau-in, ama’ hang bekbek tawh, tawntung sihna dan thuak ding kimlai, i theihloh kalin hong na kimaisak a na hi gige hi. Tdkhen