Na tanote aki samlo zatui/ zaha piak kidawm in ~ Hau Lun

Na tanote aki samlo zatui/ zaha piak kidawm in ~ Hau Lun

Ka ta a cisa nuam leh ki lawm, zatui pia khol ning. Ka ta a ci sa keei veh aw, nung aa Siavuan piak zatui te lei kik in piasin dih ning. Ka ta kapkap veh aw, agilna hiam? Huihza pia sin dih ning. An khauh na piak leh huihza pia pah in maw. Ka ta ek a thakloh ni nih bang hita, a gil zong puak keei, eknem za pia ning. Ka ta a sung pai leh ki lawm, sungkhak za piak pah kei leh.

Na ta a nap a tui ve, Burmeton pia pah oo. Ka ta bukkhuh vei mun lua in, bukkhuhza kem den ing. Ka ta in an duh kei veh aw, bang zatui pia leeng a hoih tam? Ka ta a khe kual mawk in, guh thaza pia ning. Ka ta a tun khang kei sa ing, Khanza pia ning.

Ka ta neu lai “……” acih zatui ka nuh leh a phual teng bei pah hiven, nang zong nuhsak sin ve (Vun natna nam tul tampi a om lak ah naupang ten a thuak deuh vun natna nam (20) val bang om hi. A thak a phual khempeuh na theih sunsun zatui pia kha kei in.)

A tung aa kammalte pen naupang nei innkuante leh kiim leh paam pan ih tamzak mahmah kammal te ahi hi. Na lawm leh gual, inn kiim leh paam pan na ta banglo khat a cih ciang deihsakna tawh zatui tuamtuam hong gen thei uh hi. Sum zon na-in zatui hoih nono hong ki zuak thei mah ding hi. Deihsakna tawh hong ki gen zongin na ta ading ki sam leh ki samlo tello pi in zatui bangmah piakloh hoih zaw hi.

Zatui cih pen

(1) Mihing te ading lauhuaina a omloh lam a kitel sa ahih ding thupi hi.

(2) Tua zatui na nek ding a ki sap takpi lam a thei Siavuante in hong sawl leh bek nek ding hi.

(3) Naupang kumzah, a pumpi gikzah tawh limtak tehkak in piak dingzah ki thei hi.

(4) Naili hal, nai guk hal, nai giat hal, nai 12 hal cih bangin hunman tak in piak ding ki sam hi.

(5) Ni 3 sung, ni 5 sung, ni 7 sung, kal nih sung cih bangin a ki ciangtan hun zahzah pelhloh in piak ding ki sam hi.

(6) Natna nam khat ading zatui namtam pi a omna lak pan a hoih pen ding, side effect a tawm pen ding, sum a tawm bei zaw ding cih bangteng ngaihsun in ki teel hi.

(7) Nuhtheih , sut theih, dik theih, dawn theih cih bang tampi a omlak ah cina tawh a ki tuak pen ding ki teel hi.

(8) Aki lim zat mahmah, lauhuaina a omkhollo zatui ih cih te nangawn tua natna ah tua zatui ki tuaklo cih bang na om thei ahih manin ei thu in piakloh ding hoih pen hi.

A tung aa bangin a thei Siavuan Siamah ten zong cinate zatui a piak ciangin limtak na ngaihsun phot uh hi. Tua ahih manin zatui/zaha pilna limtak na sin ngei kei leh, na sin zongin na tellohte piakloh ding thupi zaw hi. Zatui ki sam takpi leh ki sam takpilo na tel kei leh pia kei in. A thei Siavuante piak simloh kuamah piak dawn kei in. Ref: နေနေမိုးဆွေ/ Deihsakna tawh: HauLun Lam-etna